(បាត់ដំបង)៖ និយ័តករបរធនបាលកិច្ច (ន.ប.ធ.), ក្រសួងមហាផ្ទៃ និងរដ្ឋបាលសាលាខេត្តបាត់ដំបង នៅថ្ងៃទី២៥ ខែសីហា ឆ្នាំ២០២៥នេះ បានសហការរៀបចំសិក្ខាសាលាស្ដីពី «ក្របខណ្ឌច្បាប់ និងបទប្បញ្ញត្តិពាក់ព័ន្ធសម្រាប់ការគ្រប់គ្រង, ការរៀបចំ និងការប្រព្រឹត្តទៅរបស់បរធនបាលកិច្ច»។

សិក្ខាសាលានេះ ធ្វើឡើងក្រោមអធិបតីភាព​របស់លោក សុខ ដារ៉ា អគ្គនាយកនៃនិយ័តករបរធនបាលកិច្ច, លោកឧត្ដមសេនីយ៍ឯក ងិន បាណាល់ អគ្គនាយករង នៃអគ្គនាយកដ្ឋានភស្តុភារ និងហិរញ្ញវត្ថុ នៃក្រសួងមហាផ្ទៃ និងលោក យឹម សៀប អភិបាលរងខេត្តបាត់ដំបង នៅសណ្ឋាគារស្ទឹងសង្កែ ខេត្ដបាត់ដំបង។

សិក្ខាសាលានេះ ត្រូវបានរៀបចំឡើង ដើម្បីបញ្រ្ជាបការយល់ដឹងបន្ថែម ដល់សិក្ខាកាមពីក្របខណ្ឌច្បាប់ និងបទប្បញ្ញត្តិដែលមានជាធរមាន ពីការរៀបចំ និងការប្រព្រឹត្តទៅ របស់បរធនបាលកិច្ច ពីដំណើរការបង្កើត ការចុះបញ្ជី និងប្រតិបត្តិការសកម្មភាព ក្នុងក្របខណ្ឌបរធនបាលកិច្ចសង្គម។

កម្មវិធីនេះ ក៏មានការអញ្ជើញចូលរួមពីថ្នាក់ដឹកនាំជាន់ខ្ពស់ មន្ត្រីជំនាញនៃនិយ័តករបរធនបាលកិច្ច, តំណាងក្រសួងមហាផ្ទៃ និងរដ្ឋបាលសាលាខេត្តបាត់ដំបង និងតំណាងអង្គការ-សមាគមពាក់ព័ន្ធផងដែរ៕