(ភ្នំពេញ)៖ ក្រសួងសុខាភិបាល និងទីភ្នាក់ងារសហប្រតិបត្តិការអន្តរជាតិកូរ៉េ (KOICA) បានរៀបចំវេទិកាចែករំលែកចំណេះដឹងស្តីពីការបង្ការ និងត្រួតពិនិត្យការចម្លងរោគកម្រិតខ្ពស់ (IPC) នៅមន្ទីរពេទ្យព្រះអង្គឌួង ក្រោមអធិបតីភាពលោកសាស្ដ្រាចារ្យ ឡឹម តារា រដ្ឋលេខាធិការក្រសួងសុខាភិបាល និងលោកស្រី CHOI Moon Jung ប្រធានតំណាងប្រទេសនៃការិយាល័យ KOICA ប្រចាំកម្ពុជា និងមានការអញ្ជើញចូលរួមពីលោកសាស្ដ្រាចារ្យ លូ លីឃាង នាយកមន្ទីរពេទ្យព្រះអង្គឌួង។

វគ្គបណ្ដុះបណ្ដាលនេះបានធ្វើឡើងរយៈពេល៥ថ្ងៃទី២៥-២៩ ខែសីហា ឆ្នាំ២០២៥ ដែលមានអ្នកចូលរួមប្រមាណជាង១០០នាក់ រួមមាន មន្ត្រីក្រសួងសុខាភិបាល មន្ទីរពេទ្យបង្អែកខេត្ត និងនិស្សិតផងដែរ។

លោកសាស្ដ្រាចារ្យ ឡឹម តារា បានថ្លែងថា ការទប់ស្តាត់ការចម្លងរោគនៅមន្ទីរពេទ្យគឺមានសារៈសំខាន់ខ្លាំងណាស់ មិនត្រឹមតែជាបញ្ហាបច្ចេកទេសប៉ុណ្ណោះទេ ប៉ុន្ដែវាជាបញ្ហាទាក់ទងទៅសុវត្ថិភាពរបស់អ្នកជំងឺ គុណភាពរបស់សេវាសុខាភិបាល និងសន្ដិសុខសុខាភិបាលជាតិ។

«ដូច្នេះថ្ងៃនេះគឺយើងបានពិភាក្សាគ្នា ដើម្បីពិនិត្យពិចារណាទៅលើវឌ្ឍនភាពនៃការបណ្ដុះបណ្ដាលកន្លងមក និងចែករំលែកនូវបទពិសោធន៍ពីកន្លែងការងារ នៅក្នុងការបង្ការ និងការត្រួតពិនិត្យលទ្ធផលដែលយើងទទួលបានកន្លងមកនេះ ពិសេសគឺបញ្ហាប្រឈមផងដែរ។ នេះជាឱកាសដែលយើងអាចស្វែងរកឃើញវិធីដើម្បីបំពេញភាពខ្វះខាត និងខ្វះចន្លោះ រវាងគោលនយោបាយ និងការអនុវត្ដជាក់ស្ដែងក្នុងការផ្ដល់សេវាសុខាភិបាលជូនប្រជាពលរដ្ឋនៅទូទាំងប្រទេស»។

លោកសស្ដ្រាចារ្យបានបញ្ជាក់បន្ថែមទៀតថា «នៅក្នុងវិស័យសុខាភិបាល ពិសេសនៅក្នុងផ្នែកពិនិត្យថែទាំអ្នកជំងឺនេះ អ្វីដែលយើងផ្ដោតសំខាន់ និងតែងតែក្រើនរំលឹកដល់មន្ដ្រីសុខាភិបាលយើង គឺយើងខិតខំកសាងយ៉ាងម៉េចឱ្យបានធនធាន គឺសំដៅការបម្រើសេវាប្រកបដោយគុណភាព ស័ក្កសិទ្ធភាព និងសុវត្ថិភាពដល់អ្នកជំងឺ។ ហើយនៅក្នុងនោះត្រួតពិនិត្យការចម្លងរោគកម្រិតខ្ពស់ (IPC) ជាមូលដ្ឋានគ្រឹះមួយដែលឈានទៅរកការពង្រឹងនិងពង្រីកគុណភាព ឬបច្ចេកទេសព្យាបាលដ៏ទំនើប ដែលបណ្ដុះបណ្ដាលអ្នកជំនាញជាន់ខ្ពស់ ដើម្បីឱ្យការបម្រើសេវាបានល្អ»។

មន្រ្ដីជាន់ខ្ពស់រូបនេះបានថ្លែងទៀតថា បើមានការឆ្លងរោគនៅក្នុងមន្ទីរពេទ្យ នោះនឹងធ្វើឱ្យការព្យាបាលមានភាពស្មុគស្មាញ អ្នកជំងឺសម្រាកពេទ្យយូរ ប្រើប្រាស់ថ្នាំសាស្ដ្រ និងថ្នាំសម្រាប់ព្យាបាលក៏ច្រើន ហើយពេលខ្លះពេលដែលព្យាបាលអ្នកជំងឺជាសះស្បើយវិញ ក៏មិនអាចមកល្អដូចដើមដែរ។ ដូច្នេះការកាត់បន្ថយការចម្លងរោគនៅមន្ទីរពេទ្យនេះ គឺមានសារៈសំខាន់ណាស់ មិនសម្រាប់តែការពារអ្នកជំងឺមកសម្រាកព្យាបាលនោះទេ គឺការពារទាំងក្រុមគ្រួសារអ្នកជំងឺដែលមកមើលអ្នកជំងឺ និងមន្ដ្រីសុខាភិបាលដែលជាអ្នកបម្រើសេវាផងដែរ ។ពិសេសបើសិនជាគ្រួសារអ្នកជំងឺ ឬអ្នកជំងឺដែលឆ្លងរោគនោះព្យាបាលពុំទាន់បានជាសះស្បើយល្អ ពេលត្រលប់ទៅគេហដ្ឋាន គឺនឹងនាំមេរោគនោះទៅចម្លងនៅក្នុងសហគមន៍ ។ដូចនេះត្រូវតែរួមគ្នាកុំឱ្យមានបញ្ហានេះកើតឡើង ដើម្បីពង្រឹងប្រព័ន្ធសុខាភិបាល ការពារ ឬគាំទ្រដល់បុគ្គលិកសុខាភិបាល។

ក្នុងឱកាសនោះផងដែរលោកសាស្ដ្រាចារ្យ ឡឹម តារា បានថ្លែងអំណរគុណដល់ KOICA​ ដែលតែងតែចូលរួមលើកកម្ពស់វិស័យសុខាភិបាលកម្ពុជា ពិសេសនាពេលនេះ ដែលបានសហការជាមួយក្រសួងសុខាភិបាល បណ្ដុះបណ្ដាលវគ្គដ៏មានសារៈសំខាន់នេះ។

ជាមួយគ្នានេះលោកស្រី CHOI Moon Jung បានបញ្ជាក់ថា «តាងនាមរដ្ឋាភិបាលនៃសាធារណរដ្ឋកូរ៉េ KOICA មានកិត្តិយសក្នុងការសហការជាមួយក្រសួងសុខាភិបាល ដើម្បីជំរុញការបង្ការ និងត្រួតពិនិត្យការចម្លងរោគកម្រិតខ្ពស់នៅកម្ពុជា។ វគ្គបណ្តុះបណ្តាលនេះលើសពីវគ្គបណ្តុះបណ្តាលទូទៅ ដែលជាបេសកកម្មដ៏សំខាន់មួយក្នុងការពង្រឹងស្តង់ដារថែទាំសុខភាព។ តាមរយៈការបណ្តុះបណ្តាល និងគោលនយោបាយស្របតាមបរិបទរបស់កម្ពុជា KOICA ប្តេជ្ញាក្នុងការរួមចំណែកអភិវឌ្ឍន៍សុខុមាលភាពរបស់ប្រជាជនកម្ពុជា»។

កម្មវិធីនេះត្រូវបានរំពឹងថានឹងពង្រឹងសមត្ថភាពផ្នែកថែទាំសុខភាពរបស់ប្រទេសកម្ពុជា និងរួមចំណែកក្នុងការអភិវឌ្ឍន៍ប្រព័ន្ធសុខាភិ បាលឱ្យកាន់តែប្រសើរឡើង៕