(ភ្នំពេញ)៖ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា បានផ្ញើលិខិតជូនឯកឧត្តម ជិន ថាញ់មិន (Tran Thanh Man) ប្រធានរដ្ឋសភា នៃសាធារណរដ្ឋសង្គមនិយមវៀតណាម នៅក្នុងឱកាសខួបលើកទី៨០ នៃទិវាបុណ្យឯករាជ្យជាតិ នៃសាធារណរដ្ឋសង្គមនិយមវៀតណាម។

សម្តេចមហារដ្ឋសភាធិការធិបតី ឃួន សុដារី បានបញ្ជាក់ថា «ឯកឧត្តមប្រធាន ជាទីគោរពរាប់អានដ៏ជ្រាលជ្រៅ! តាងនាមរដ្ឋសភា នៃព្រះរាជាណាចក្រកម្ពុជា និងក្នុងនាមរូបខ្ញុំផ្ទាល់ ខ្ញុំសូមចូលរួមសម្តែងនូវការអបអរសាទរ យ៉ាងកក់ក្តៅបំផុតចំពោះ ឯកឧត្តមប្រធាន នៅក្នុងឱកាសខួបលើកទី៨០ នៃទិវាបុណ្យឯករាជ្យជាតិ នៃសាធារណរដ្ឋ សង្គមនិយមវៀតណាម»។

ខ្ញុំបានកត់សម្គាល់ដោយការពេញចិត្តយ៉ាងខ្លាំងនូវចំណងមិត្តភាពដ៏យូរអង្វែង រវាងព្រះរាជាណាចក្រកម្ពុជា និងសាធារណរដ្ឋសង្គមនិយមវៀតណាម ដែលឈរលើ «មិត្តភាពជាប្រពៃណី ភាពជាអ្នកជិតខាងល្អ កិច្ចសហប្រតិបត្តិការគ្រប់ជ្រុងជ្រោយ និង យូរអង្វែង» ត្រូវបានពង្រឹង និងពង្រីកឈានដល់កម្រិតថ្មីមួយក្នុង រយៈពេលជាច្រើនឆ្នាំកន្លងមក ហើយខ្ញុំមានជំនឿយ៉ាងមុតមាំងថា ចំណងមិត្តភាពដែលមានស្រាប់រវាងប្រទេស ជាពិសេសរវាងស្ថាប័ននីតិប្បញ្ញត្តិទាំងពីរ នឹងបន្តរីកចម្រើនលូតលាស់បន្ថែមទៀតនាពេលអនាគត ដើម្បីបម្រើផលប្រយោជន៍ទៅវិញទៅមករបស់ប្រជាជន នៃប្រទេសជិតខាងយើងទាំងពីរ។

រដ្ឋសភានៃព្រះរាជាណាចក្រកម្ពុជា សូមបញ្ជាក់សាជាថ្មីនូវការប្តេជ្ញាចិត្តឥតងាករេរបស់ខ្លួន ក្នុងការបន្តលើក កម្ពស់នូវសុខសន្តិភាព ស្ថិរភាព និងវិបុលភាពយូរអង្វែង ដែលមិនត្រឹមតែសម្រាប់ប្រទេសជាតិទាំងពីរប៉ុណ្ណោះទេ ប៉ុន្តែថែមទាំងសម្រាប់តំបន់ ក៏ដូចជាពិភពលោកទាំងមូលផងដែរ។

ឆ្លៀតក្នុងឱកាសដ៏ថ្លៃថ្លានេះ ខ្ញុំសូមប្រសិទ្ធពរជ័យ ជូនចំពោះ ឯកឧត្តមប្រធាន ទទួលបាននូវសុខភាពល្អ បរិបូរណ៍ ជោគជ័យគ្រប់ភារកិច្ច រួមជាមួយនឹងការបន្តទទួលបាននូវវឌ្ឍនភាព និងវិបុលភាពជានិច្ចនិរន្តរ៍ នៃសាធារណរដ្ឋសង្គមនិយមវៀតណាម។

សូម ឯកឧត្តមប្រធាន ទទួលនូវការគោរពរាប់អានដ៏ជ្រាលជ្រៅពីខ្ញុំ៕