(ភ្នំពេញ)៖ កិច្ចប្រជុំវិសាមញ្ញថ្នាក់តំបន់ «RBC ថ្ងៃ២៥ សីហា ២០២៥» បានបញ្ចប់ទៅដោយបានទទួលលទ្ធផលជាវិជ្ជមាន។ លទ្ធផលសំខាន់ទាំងនោះរួមមាន ការបង្កើតស្ថានភាពនូវទំនុកចិត្តថ្មី និងការដាក់គោលការណ៍ច្បាស់លាស់សម្រាប់អនុវត្តកិច្ចព្រមព្រៀងឈប់បាញ់។ កិច្ចប្រជុំថ្នាក់តំបន់ប្រព្រឹត្តទៅនៅក្នុងខេត្តប៉ៃលិននេះ កំពុងក្លាយជាគន្លងដ៏សំខាន់សម្រាប់ការពង្រឹងសន្តិភាព និងស្ថិរភាពតាមបណ្តោយព្រំដែនកម្ពុជា-ថៃ។
Fresh Exclusive មានអត្ថបទស៊ីជម្រៅបញ្ជាក់ជុំវិញ ៥ចំណុចសំខាន់ ដែលសម្រេចបានក្នុងកិច្ចប្រជុំRBC ថ្ងៃ២៥ សីហា ឆ្នាំ ២០២៥នេះ៖

នៅពេលដែលបញ្ហាវិវាទតាមបណ្តោយព្រំដែនកម្ពុជា-ថៃ កំពុងទាមទារការដោះស្រាយដោយយុទ្ធសាស្ត្រ និងភាពវាងវៃដ៏ប្រុងប្រយ័ត្ន កិច្ចប្រជុំវិសាមញ្ញរបស់គណៈកម្មាធិការព្រំដែន ថ្នាក់យោធភូមិភាគកម្ពុជា-ថៃ (RBC) ថ្ងៃទី២៥ ខែសីហា ឆ្នាំ២០២៥ នៅខេត្តប៉ៃលិន បានក្លាយជាជំហានដ៏សំខាន់ ក្នុងការអនុវត្ត កិច្ចព្រមព្រៀងឈប់បាញ់ និងបង្កើតគន្លងឆ្ពោះទៅរកសន្តិភាពពិតប្រាកដ រវាងប្រទេសទាំងពីរ។

កិច្ចប្រជុំវិសាមញ្ញថ្នាក់តំបន់នេះ មានសារៈសំខាន់យ៉ាងខ្លាំង ព្រោះវាជាការអនុវត្តជាក់ស្តែងនៃលទ្ធផល កិច្ចព្រមព្រៀងឈប់បាញ់ ថ្ងៃទី២៨ ខែកក្កដា ឆ្នាំ២០២៥ ដែលបានចុះហត្ថលេខានៅទីក្រុងពូត្រាចាយ៉ា ប្រទេសម៉ាឡេស៊ី រវាងថ្នាក់ដឹកនាំកម្ពុជា-ថៃ។ តាមរយៈកិច្ចប្រជុំ RBC នាពេលនេះ ភាគីទាំងពីរបានបន្តពង្រឹងយន្តការសហប្រតិបត្តិការទ្វេភាគី និងកំណត់ចក្ខុវិស័យច្បាស់លាស់សម្រាប់ការកសាងសន្តិភាពពិតប្រាកដ តាមរយៈចំណុចសំខាន់ៗ៥ រួមមានការពង្រឹងកិច្ចសហប្រតិបត្តិការផ្នែកយោធា ដោយបង្កើនទំនាក់ទំនងប្រចាំរវាងកងកម្លាំងពីរភាគី ដើម្បីគ្រប់គ្រងស្ថានភាពព្រំដែន និងជៀសវាងការប៉ះទង្គិចឡើងវិញ, ការបង្កើតក្រុមការងារសម្របសម្រួល (CG) ដើម្បីដោះស្រាយបញ្ហាបន្ទាន់ និងទប់ស្កាត់វិវាទដោយសន្តិវិធីឱ្យទាន់ពេលវេលា, កិច្ចពិភាក្សាអំពីគណៈកម្មាធិការមូលដ្ឋានព្រំដែន (TBC) ដើម្បីពង្រឹងសហការណ៍កម្រិតសហគមន៍ និងដោះស្រាយបញ្ហាប្រចាំថ្ងៃតាមតំបន់ព្រំដែន, ការកសាងជំនឿទុកចិត្តថ្មី ដោយបង្កើតប្រព័ន្ធទំនាក់ទំនងប្រចាំ និងបង្កើតបរិយាកាសវិជ្ជមានសម្រាប់ភាពជិតខាងល្អនិង ការ ជំរុញកិច្ចសហប្រតិបត្តិការច្រើនវិស័យ រួមមានការដោះមីនមនុស្សធម៌ ការប្រយុទ្ធប្រឆាំងឧក្រិដ្ឋកម្មឆ្លងដែន, ប្រឆាំងអំពើជួញដូរគ្រឿងញៀន ជួញដូរអាវុធ និងការហៅទូរស័ព្ទបន្លំ (ការឆបោកតាមប្រព័ន្ធបច្ចេកវិទ្យា)។

លទ្ធផលទាំងនេះបញ្ជាក់ច្បាស់ថា កិច្ចប្រជុំ RBC ថ្ងៃទី២៥ ខែសីហា ឆ្នាំ២០២៥ មិនមែនជាការពិភាក្សាធម្មតាទេ ប៉ុន្តែវាជា ឧបករណ៍សំខាន់សម្រាប់ការពង្រឹងសន្តិភាព និងស្ថិរភាពរវាងប្រទេសទាំងពីរ និងសម្រាប់តំបន់ទាំងមូល។

* ពង្រឹងកិច្ចសហប្រតិបត្តិការផ្នែកយោធា៖ កិច្ចប្រជុំនេះ បានសម្រេចពង្រឹងកិច្ចសហការផ្នែកយោធា ដោយកំណត់យន្តការទំនាក់ទំនងប្រចាំរវាង កងកម្លាំងយោធភូមិភាគទី៥របស់កម្ពុជា និងបញ្ជាការដ្ឋានការពារព្រំដែនច័ន្ទបុរី-ត្រាតរបស់ថៃ។ កិច្ចសហការនេះនឹងជួយបង្កើនភាពសម្របសម្រួលក្នុងការគ្រប់គ្រងស្ថានការណ៍ព្រំដែន និងជៀសវាងកត្តាដែលអាចបង្កការប៉ះទង្គិចគ្នាសាឡើងវិញ។

អត្ថប្រយោជន៍សំខាន់លើចំណុចនេះ គឺកម្លាំងរបស់ភាគីទាំង២ នឹងអាចសហការយ៉ាងប្រសើរក្នុងការរក្សាស្ថិរភាព និងកាត់បន្ថយហានិភ័យលើការបង្កការប្រយុទ្ធគ្នាណាមួយឡើងវិញ។

* បង្កើតក្រុមការងារសម្របសម្រួល (Coordination Group-CG) ៖ កិច្ចប្រជុំ RBC ថ្នាក់តំបន់នេះ បានឯកភាពបង្កើតក្រុមការងារសម្របសម្រួល (CG) ដើម្បីដោះស្រាយបញ្ហាបន្ទាន់ និងសហការឱ្យកាន់តែប្រសើរជាងមុននៅតាមបណ្ដោយព្រំដែន។ ក្រុមការងារនេះ នឹងអនុវត្តតួនាទីជាកន្លែងទំនាក់ទំនងផ្ទាល់រវាងភាគីទាំងពីរ ដើម្បីឆ្លើយតបទៅនឹងស្ថានការណ៍កើតឡើងភ្លាមៗ។
អត្ថប្រយោជន៍សំខាន់លើចំណុចនេះ គឺថា ការមានក្រុមការងារសម្របសម្រួល CG នឹងជួយកាត់បន្ថយការយឺតយ៉ាវក្នុងការដោះស្រាយវិវាទ និងបង្កើតប្រព័ន្ធពង្រឹងទំនុកចិត្តរវាងគ្នានិងគ្នា និងស្មារតីជិតខាងល្អ ថែមទៀត។

* ពិភាក្សាអំពីគណៈកម្មាធិការមូលដ្ឋានព្រំដែន (Township Border Committee-TBC) ៖ កិច្ចប្រជុំនេះ បានពិភាក្សាអំពីសេចក្ដីស្នើបង្កើត គណៈកម្មាធិការមូលដ្ឋានព្រំដែន (TBC) ដើម្បីពង្រឹងសហការនៅក្នុងកម្រិតសហគមន៍។ គណៈកម្មាធិការមូលដ្ឋានព្រំដែន នឹងមានការចូលរួមពីអង្គភាពរដ្ឋ និងឯកជន ដើម្បីដោះស្រាយបញ្ហាប្រចាំថ្ងៃតាមតំបន់ព្រំដែន និងជំរុញសន្តិភាពកម្រិតមូលដ្ឋាន។
អត្ថប្រយោជន៍សំខាន់លើចំណុចនេះ គឺថា ការមាន TBC នឹងជួយបង្កើនស្ថិរភាពក្នុងតំបន់ និងធ្វើឱ្យសហគមន៍តាមព្រំដែនរស់នៅក្នុងបរិយាកាសសន្តិភាព។

* កសាងជំនឿទុកចិត្តថ្មី៖ កិច្ចប្រជុំ RBC នេះដែរ បានកំណត់យុទ្ធសាស្ត្រដើម្បី កសាងជំនឿទុកចិត្តថ្មី (Rebuilding Trust) រវាងកងកម្លាំង និងប្រជាពលរដ្ឋពីរភាគី។ វាបង្កើតប្រព័ន្ធទំនាក់ទំនងប្រចាំ និងទទួលស្គាល់សារៈសំខាន់នៃការរួមគ្នាដោះស្រាយវិវាទដោយសន្តិវិធី។
អត្ថប្រយោជន៍សំខាន់ លើចំណុចនេះ គឺថាភាគីទាំងពីរអាចបង្កើតបរិយាកាសវិជ្ជមាន សម្រួលដល់ការជៀសវាងការបង្កើនភាពតានតឹង និងបង្កើតស្មារតីជិតខាងល្អ។

* ជំរុញកិច្ចសហប្រតិបត្តិការច្រើនវិស័យ៖ ក្រៅពីកិច្ចប្រជុំពិភាក្សាផ្នែកកិច្ចសហប្រតិបត្តិការយោធា, កិច្ចប្រជុំ RBC ថ្ងៃទី២៥ ខែសីហា ក៏បានផ្តោតលើសហប្រតិបត្តិការច្រើនវិស័យ ដែលរួមមាន ការដោះមីនមនុស្សធម៌តាមបណ្ដោយព្រំដែន, ការប្រយុទ្ធប្រឆាំងឧក្រិដ្ឋកម្មឆ្លងដែន ដូចជាការជួញដូរគ្រឿងញៀន ការជួញដូរអាវុធ ការជួញដូរមនុស្ស និងការហៅទូរស័ព្ទបន្លំ (ការឆបោកតាមប្រព័ន្ធបច្ចេកវិទ្យា), និង បង្កើនប្រសិទ្ធភាពក្នុងការពារសុវត្ថិភាព និងសន្តិភាពតំបន់។
អត្ថប្រយោជន៍សំខាន់ក្នុងចំណុចនេះគឺ កិច្ចសហការនេះជួយធ្វើឲ្យកិច្ចព្រមព្រៀង RBC មានលទ្ធភាពបន្តរឹងមាំ និងបង្កើតស្ថិរភាពប្រកបដោយអន្តរកម្មយូរអង្វែង។

លទ្ធផលនៃកិច្ចប្រជុំវិសាមញ្ញរបស់គណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) ថ្ងៃទី២៥ ខែសីហា ឆ្នាំ២០២៥ ត្រូវបានអបអរសាទរដោយនាយករដ្ឋមន្ត្រីនៃប្រទេសកម្ពុជា។ សម្តេចមហាបវរធិបតី ហ៊ុន ម៉ាណែត បានសរសេរនៅលើបណ្តាញសង្គម «ស្វាគមន៍ចំពោះលទ្ធផលវិជ្ជមាននៃកិច្ចប្រជុំវិសាមញ្ញគណៈកម្មាធិការកិច្ចការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៥ កម្ពុជា និងបញ្ជាការដ្ឋានការពារព្រំដែនចាន់បុរី-ត្រាតថៃ ថ្ងៃចន្ទ ទី២៥ ខែសីហា ឆ្នាំ២០២៥»។

កិច្ចប្រជុំ RBC នេះបានបញ្ជាក់ពីតួនាទីសំខាន់របស់សហរដ្ឋអាមេរិក, ចិន, និងម៉ាឡេស៊ី ក្នុងការជំរុញសន្តិភាព និងស្ថិរភាព។ ភាពចូលរួមរបស់កម្លាំងអន្តរជាតិទាំងនេះ ជួយផ្តល់សន្ទស្សន៍សុចរិតភាព និង ភាពអាចទុកចិត្តចំពោះលទ្ធផលកិច្ចប្រជុំ។ កិច្ចប្រជុំ RBC ថ្ងៃទី២៥ ខែសីហា ឆ្នាំ២០២៥ មិនមែនជាការពិភាក្សាធម្មតាទេ ប៉ុន្តែវាជាឧបករណ៍សំខាន់ ក្នុងការពង្រឹងកិច្ចព្រមព្រៀងឈប់បាញ់ ថ្ងៃទី២៨ ខែកក្កដា ឆ្នាំ២០២៥ និងបង្កើតគន្លងសន្តិភាពពិតប្រាកដសម្រាប់ប្រទេសទាំងពីរ។

កិច្ចប្រជុំនេះបានបង្ហាញថា សន្តិភាពមិនអាចកើតឡើងដោយសារសេចក្ដីសន្យាផ្លូវការទេ ប៉ុន្តែត្រូវការអនុវត្តជាក់ស្តែង និងកិច្ចសហប្រតិបត្តិការពិតប្រាកដ។ កិច្ចប្រជុំ RBC ថ្ងៃទី២៥ ខែសីហា បានបង្កើតចំណុចប្រទាក់ថ្មីសម្រាប់កម្ពុជា-ថៃ ដើម្បីកសាងជំនឿទុកចិត្ត ស្ថិរភាព និងភាពជិតខាងល្អ ក្នុងទិសដៅសន្តិភាពយូរអង្វែងសម្រាប់ប្រជាជនទាំងពីរ៕