(កំពង់ស្ពឺ)៖ កាលពីវេលាព្រឹក​ ថ្ងៃទី​២៥ ខែសីហា ឆ្នាំ​២០២៥ លោក កឹមរ័ត្ន វិសិដ្ឋ នាយករងខុទ្ទកាល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា និងជាប្រធានក្រុមប្រឹក្សាភិបាលវេទិកាសម្ព័ន្ធសង្គមស៊ីវិល (វ.ស.ស.) និងលោក តូច ប៉ូលីវ៉ា អភិបាលរងនៃគណៈអភិបាលខេត្តកំពង់ស្ពឺ បានអញ្ជើញជាអធិបតីក្នុងវេទិកាសន្ទនាជាមួយអង្គការសង្គមស៊ីវិលក្នុងខេត្តកំពង់ស្ពឺ ដែលរៀបចំឡើង វ.ស.ស. ក្រោមប្រធានបទ «កិច្ចសហប្រតិបត្តិការក្នុងភាពជាដៃគូ ដើម្បីពង្រឹងសមត្ថភាពអង្គការសង្គមស៊ីវិលក្នុងបរិបទថ្មី» ដោយមានការចូលរួមពីតំណាងអង្គការ សមាគម សហគមន៍ និងសហជីព ព្រមទាំងតំណាងមន្ទីរពាក់ព័ន្ធ និងមន្រ្តីនៃរដ្ឋបាលខេត្តកំពង់ស្ពឺជាច្រើនរូប។

ថ្លែងក្នុងអង្គវេទិកានានេះ លោក កឹមរ័ត្ន វិសិដ្ឋ បានកោតសរសើរចំពោះកិច្ចសហការនាពេលកន្លងមករបស់អង្គការសង្គមស៊ីវិលជាមួយអាជ្ញាធរមូលដ្ឋាន ក្នុងការលើកកម្ពស់ជីវភាព និងសុខុមាលភាពប្រជាពលរដ្ឋនៅក្នុងមូលដ្ឋានស្របតាមផែនការយុទ្ធសាស្រ្ត និងគោលនយោបាយអភិវឌ្ឍន៍ជាតិរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។ លោកក៏បានលើកទឹកចិត្តឱ្យអង្គការសង្គមស៊ីវិលបន្ដសហការជាមួយរដ្ឋបាលខេត្ត ដោយគោរពនូវលក្ខន្ដិកៈរបស់ខ្លួនដែលបានទទួលស្គាល់ដោយក្រសួង-ស្ថាប័នមានសមត្ថកិច្ច ដើម្បីធានាបាននូវការបំពេញបេសកកម្មការងាររបស់ខ្លួនប្រកបដោយវិជ្ជាជីវៈ ទំនួលខុសត្រូវ គណនេយ្យភាព តម្លាភាព និងសុចរិតភាព ដើម្បីបង្កើនជំនឿចិត្តពីសំណាក់ម្ចាស់ជំនួយនិងសប្បុរសជន ព្រមទាំងការគាំទ្រពីរដ្ឋបាលថ្នាក់ខេត្ត។ បន្ថែមពីនេះ លោកក៏បានជំរុញឱ្យអង្គការសង្គមស៊ីវិលត្រូវតែបន្តស្មារតីរួមសាមគ្គី និងជឿទុកចិត្ដចំពោះការដោះស្រាយបញ្ហាព្រំដែនរបស់រាជរដ្ឋាភិបាល តាមរយៈយន្ដការការទូត និងសន្ដិវិធី ដើម្បីលើកស្ទួយកិត្យានុភាពជាតិ និងឧត្តមប្រយោជន៍ជាតិ។

ជាមួយគ្នានេះដែរ លោកអភិបាលរងនៃគណៈអភិបាលខេត្ត បានវាយតម្លៃខ្ពស់ចំពោះសមិទ្ធផលដែលអង្គការសង្គមស៊ីវិលបានចូលរួមជាមួយរដ្ឋបាលខេត្ត ក្នុងវិស័យសំខាន់ៗ រួមមាន វិស័យសុខាភិបាល អប់រំ ធនធានធម្មជាតិ និងអនាម័យទឹកស្អាត។ លោកក៏បានលើកទឹកចិត្តឱ្យអង្គការសង្គមស៊ីវិលបន្តសហការជាមួយអាជ្ញាធរក្នុងការអភិវឌ្ឍមូលដ្ឋាន ជាពិសេស អង្គការសង្គមស៊ីវិលដែលទទួលស្គាល់ដោយក្រសួង ស្ថាប័ន មានសមត្ថកិច្ច ត្រូវបង្ហាញលក្ខន្ដិកៈរបស់ខ្លួនមករដ្ឋបាលខេត្ត ដើម្បីទទួលកិច្ចសហការ និងគាំទ្រពេញលេញពីរដ្ឋបាលខេត្ត។

ឆ្លៀតក្នុងឱកាសនេះដែរ តំណាងអង្គការសង្គមស៊ីវិល បានបង្ហាញនូវការគាំទ្រយ៉ាងពេញទំហឹងចំពោះការដឹកនាំរបស់រាជរដ្ឋាភិបាល ក្រោមមគ្គុទ្ទេសក៍ដឹកនាំរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្ដ្រី​នៃព្រះរាជាណាចក្រកម្ពុជា ក្នុងបុព្វហេតុការពារអធិបតេយ្យ និងបូរណភាពទឹកដី។ ជាមួយគ្នានេះដែរ តំណាងអង្គការសង្គមស៊ីវិលដែលបានចូលរួម ក៏បានប្រកាសថ្កោលទោសយ៉ាងដាច់អហង្ការចំពោះឧក្រិដ្ឋកម្មសង្គ្រាម និងទង្វើឈ្លានពាន យ៉ាងគឃ្លើនពីសំណាក់កងទ័ពថៃមកលើបូរណភាពទឹកដីកម្ពុជា ដែលនេះជាការរំលោភបំពានលើធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងច្បាប់អន្ដរជាតិពាក់ព័ន្ធនានា។

តំណាងអង្គការសង្គមស៊ីវិលក្នុងខេត្តកំពង់ស្ពឺ ក៏បានអំពាវនាវដោយទទូចដល់បណ្តាប្រទេសមហាអំណាចនិងសហគមន៍អន្តរជាតិ ក៏ដូចជា ស្ថាប័នអន្តរជាតិនានាជំរុញឱ្យរដ្ឋាភិបាលថៃនិងយោធាថៃត្រូវគោរពអនុវត្តបទឈប់បាញ់ ដើម្បីធានាឱ្យបាននូវសន្តិភាពយូរអង្វែងនៅតំបន់ព្រំដែនកម្ពុជា-ថៃ ដែលជាការរួមចំណែកថែរក្សាសុខសន្តិភាព ស្ថិរភាព វឌ្ឍនភាព និងវិបុលភាពក្នុងតំបន់ និងត្រូវដោះលែងដោយឥតលក្ខខណ្ឌនូវវីរកងទ័ពកម្ពុជាទាំង ១៨រូប ដែលត្រូវបានកងទាហានថៃចាប់ខ្លួនដោយខុសច្បាប់ និងជាការរំលោភបំពានលើបទឈប់បាញ់ កាលពីវេលាព្រឹកថ្ងៃទី២៩ ខែកក្កដា ឆ្នាំ២០២៥។