(ភ្នំពេញ)៖ ក្រសួងសេដ្ឋកិច្ច និងហិរញ្ញវត្ថុ នៅព្រឹកថ្ងៃទី២៦ ខែសីហា ឆ្នាំ២០២៥នេះ បានរៀបចំសិក្ខាសាលាពិគ្រោះយោបល់លើ សេចក្តីព្រាងយុទ្ធសាស្ត្រនៃការកែទម្រង់ប្រព័ន្ធលទ្ធកម្មសាធារណៈបច្ចុប្បន្នកម្ម ឆ្នាំ២០២៥-២០២៨ និងផ្សព្វផ្សាយប្រកាស ស្តីពីលទ្ធកម្មតាមរយៈការផ្តល់ប្រព្រឹត្តិកម្មអនុគ្រោះ។

អង្គសិក្ខាសាលានេះ ដឹកនាំដោយលោក ហ៊ីវ សុវណ្ណ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ តំណាងអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ និងលោក ង៉ាន់ ភិរម្យ អគ្គនាយកនៃអគ្គនាយកដ្ឋានលទ្ធកម្មសាធារណៈ និងមានការចូលរួមពីតំណាងក្រសួង ស្ថាប័ន សហគ្រាសសាធារណៈ គ្រឹះស្ថានសាធារណៈរដ្ឋបាល ដៃគូអភិវឌ្ឍ អង្គការសង្គមស៊ីវិល អង្គភាពក្រោមឱវាទក្រសួងសេដ្ឋកិច្ចនិងហិរញ្ញវត្ថុ រដ្ឋបាលរាជធានី ខេត្ត និងមន្ទីរជំនាញរាជធានី ខេត្ត ដែលមានការចូលរួមផ្ទាល់នៅសណ្ឋាគារសុខាភ្នំពេញ និងតាមរយៈប្រព័ន្ធអនឡាញ ដោយប្រើប្រាស់កម្មវិធី ZOOM សរុបប្រមាណ ១ ០៥៧ នាក់។

គោលបំណងនៃការៀបចំសិក្ខាសាលានាពេលនេះ គឺដើម្បីពិគ្រោះយោបល់ និងប្រមូលធាតុចូលបន្ថែមពីអង្គសិក្ខាសាលា ទៅលើសេចក្តីព្រាងយុទ្ធសាស្ត្រនៃការកែទម្រង់ប្រព័ន្ធលទ្ធកម្មសាធារណៈបច្ចុប្បន្នកម្មឆ្នាំ២០២៥-២០២៨ ដែលរៀបចំដោយក្រសួងសេដ្ឋកិច្ចនិងហិរញ្ញវត្ថុ ដើម្បីធានាឱ្យការរៀបចំសេចក្តីព្រាងយុទ្ធសាស្ត្រនេះ កាន់តែមានសុក្រឹតភាព និងមានភាពគ្រប់ជ្រុងជ្រោយ។

លោក ហ៊ីវ សុវណ្ណ រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានសម្ដែងនូវការស្វាគមន៍យ៉ាងកក់ក្ដៅ ចំពោះតំណាងក្រសួង ស្ថាប័ន សហគ្រាសសាធារណៈ គ្រឹះស្ថានសាធារណៈរដ្ឋបាល ដៃគូអភិវឌ្ឍ អង្គការសង្គមស៊ីវិល អង្គភាពក្រោមឱវាទក្រសួងសេដ្ឋកិច្ចនិងហិរញ្ញវត្ថុ រដ្ឋបាលរាជធានី ខេត្ត និងមន្ទីរជំនាញរាជធានី ខេត្ត ដែលបានឆ្លៀតពេលដ៏មានតម្លៃអញ្ជើញចូលរួមនៅក្នុងសិក្ខាសាលាពិគ្រោះយោបល់ដ៏មានសារៈសំខាន់នេះ។

លោករដ្ឋលេខាធិការ បានបន្ថែមទៀតថា យុទ្ធសាស្រ្តនៃការកែទម្រង់ប្រព័ន្ធលទ្ធកម្មសាធារណៈឆ្នាំ២០១៩-២០២៥ ត្រូវបានរាជរដ្ឋាភិបាលប្រកាសដាក់ឱ្យអនុវត្តកាលពីខែឧសភា ឆ្នាំ២០១៩ ដែលមានគោលបំណងធ្វើទំនើបកម្មប្រព័ន្ធលទ្ធកម្មសាធារណៈកម្ពុជា ឱ្យក្លាយជាប្រព័ន្ធមួយកាន់តែមានភាពជឿទុកចិត្ត ប្រសិទ្ធភាព ការប្រកួតប្រជែង និងការសន្សំសំចៃ ព្រមទាំងស្របតាមឧត្តមានុវត្តន៍អន្តរជាតិ។ បច្ចុប្បន្ន យុទ្ធសាស្រ្តនេះត្រូវបានអនុវត្តអស់រយៈពេលប្រមាណ ៥ឆ្នាំ និងកំពុងឈានដល់ឆ្នាំចុងក្រោយ ដោយសម្រេចបាននូវសមិទ្ធផលសំខាន់ៗជាច្រើន និងជាទីមោទនៈ។ ក្នុងទិសដៅដើម្បី បន្តការកែទម្រង់ឱ្យកាន់តែស៊ីជម្រៅ ស្របតាមផែនការសកម្មភាពរួម ដំណាក់កាលទី៤ បច្ចុប្បន្នកម្ម នៃកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ ឆ្នាំ២០២៥-២០២៧ និងយុទ្ធសាស្រ្តនៃការកែទម្រង់ប្រព័ន្ធថវិកាបច្ចុប្បន្នកម្មឆ្នាំ២០២៥-២០២៨ ដែលទើបត្រូវបានរាជរដ្ឋាភិបាលដាក់ឱ្យអនុវត្តកាលពីថ្ងៃទី៦ ខែមិថុនា ឆ្នាំ២០២៥ គឺចាំបាច់ត្រូវធ្វើបច្ចុប្បន្នកម្មយុទ្ធសាស្ត្រ នៃការកែទម្រង់ប្រព័ន្ធលទ្ធកម្មសាធារណៈឆ្នាំ២០១៩-២០២៥។

លោករដ្ឋលេខាធិការ ក៏បានបញ្ជាក់បន្ថែមទៀតថា ប្រកាសលេខ ៩៨៦ សហវ.ប្រក ចុះថ្ងៃទី៣០ ខែធ្នូ ឆ្នាំ២០២៤ ស្តីពីលទ្ធកម្មតាមរយៈការផ្តល់ប្រព្រឹត្តិកម្មអនុគ្រោះ ដែលប្រកាសដាក់ឱ្យអនុវត្តនៅពេលនេះ គឺជាលិខិតបទដ្ឋានគតិយុត្តមួយ ក្នុងចំណោមលិខិតបទដ្ឋានគតិយុត្តដទៃផ្សេងទៀត សម្រាប់អនុវត្តច្បាប់ស្តីពីលទ្ធកម្មសាធារណៈឆ្នាំ២០២៣ ដែលក្រសួងសេដ្ឋកិច្ចនិងហិរញ្ញវត្ថុបាននិងកំពុងរៀបចំ។ ប្រកាសនេះ ត្រូវបានរៀបចំតាមការណែនាំជាអនុសាសន៍ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងគោលបំណងដើម្បីគាំទ្រដល់ការអភិវឌ្ឍ និងពង្រីកវិស័យឧស្សាហកម្មក្នុងព្រះរាជាណាចក្រកម្ពុជា និងជាពិសេសដើម្បីចូលរួមពង្រឹង និងពង្រីកទីផ្សារក្នុងស្រុកនិងសកល សម្រាប់សហគ្រាសធុនមីក្រូ តូច និងមធ្យម និងសហគ្រិនភាព តាមរយៈយន្តការលទ្ធកម្មសាធារណៈ ដែលនឹងរួមចំណែកដល់ការអភិវឌ្ឍវិស័យឯកជន កំណើនសេដ្ឋកិច្ច និងការបង្កើតការងារក្នុងស្រុក ស្របតាមរបៀបវារៈគោលនយោបាយនៃយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា។

លោក ង៉ាន់ ភិរម្យ អគ្គនាយកនៃអគ្គនាយកដ្ឋានលទ្ធកម្មសាធារណៈ បានគូសរំលេចពីគោលបំណង និងទិសដៅ សំខាន់ៗនៃឯកសារយុទ្ធសាស្ត្របច្ចុប្បន្នកម្មខាងលើ ព្រមទាំងរៀបរាប់បន្ថែមពី រចនាសម្ព័ន្ធនៃសេចក្តីព្រាងយុទ្ធសាស្ត្រនេះដែលចែកចេញជា ៤ ជំពូក និងឧបសម្ព័ន្ធចំនួន ១។ បន្ថែមពីនេះលោកអគ្គនាយក ក៏បានបន្ថែមផងដែរអំពី ប្រកាសស្តីពីលទ្ធកម្មតាមរយៈការផ្តល់ប្រព្រឹត្តិកម្មអនុគ្រោះ ដោយសារការផ្តល់ប្រព្រឹត្តអនុគ្រោះក្នុងការអនុវត្តកិច្ចលទ្ធកម្មនេះ គឺជាកិច្ចការថ្មីសម្រាប់កម្ពុជា។

ដែលការរៀបចំប្រកាសនេះឡើងគឺក្នុងគោលបំណងចូលរួមពង្រឹងនិងពង្រីកទីផ្សារក្នុងស្រុកនិងសកល សម្រាប់សហគ្រាសធុនមីក្រូ តូច និងមធ្យម និងសហគ្រិនភាព តាមរយៈយន្តការលទ្ធកម្មសាធារណៈ ដែលនឹងរួមចំណែកដល់ការអភិវឌ្ឍវិស័យឯកជន កំណើនសេដ្ឋកិច្ច និងការបង្កើតការងារក្នុងស្រុក។

ថ្លែងក្នុងពិធីនេះផងដែរ, លោក ង៉ាន់ ភិរម្យ និងវាគ្មិន បានគូសបញ្ជាក់និងបានធ្វើបទបង្ហាញលម្អិតជូនអង្គសិក្ខាសាលាអំពីខ្លឹមសារនិងគោលការណ៍សំខាន់ៗ ព្រមទាំងចំណុចសំខាន់ៗនៃសេចក្តីព្រាងយុទ្ធសាស្ត្របច្ចុប្បន្នកម្មខាងលើ និងប្រកាសលេខ ៩៨៦ សហវ.ប្រក សម្រាប់កិច្ចពិភាក្សា។

អង្គសិក្ខាសាលាបានចូលរួមជាមតិយោបល់ ផ្តល់ការពិគ្រោះយោបល់យ៉ាងផុសផុល លើកជាសំណួរ និងលើកជាអនុសាសន៍ល្អៗ ដើម្បីឱ្យឯកសារយុទ្ធសាស្រ្តនៃការកែទម្រង់ប្រព័ន្ធលទ្ធកម្មសាធារណៈបច្ចុប្បន្ន-កម្មឆ្នាំ២០២៥-២០២៨ កាន់តែមានភាពគ្រប់ជ្រុងជ្រោយ និងអាចដាក់ឱ្យអនុវត្តបានប្រកបដោយប្រសិទ្ធ-ភាពខ្ពស់។ ក្រសួងសេដ្ឋកិច្ច និងហិរញ្ញវត្ថុនឹងបូកសរុបលទ្ធផល ដែលទទួលបានពីអង្គសិក្ខាសាលានាព្រឹកនេះ ដើម្បីពិនិត្យពិចារណាកែលម្អសេចក្តីព្រាងឯកសារយុទ្ធសាស្ត្រខាងលើ ក៏ដូចជាការត្រៀមសម្រាប់រៀបចំលិខិតបទដ្ឋានគតិយុត្តពាក់ព័ន្ធលទ្ធកម្មសាធារណៈដទៃទៀត ដើម្បីគាំទ្រនិងជំរុញដល់ការអនុវត្តច្បាប់ស្តីពីលទ្ធកម្មសាធារណៈ សំដៅធានាបាននូវភាពជឿទុកចិត្ត តម្លាភាព ប្រសិទ្ធភាព ការប្រកួតប្រជែង និងការសន្សំសំចៃ ព្រមទាំងស្របតាមឧត្តមានុវត្តន៍អន្តរជាតិ។

លោក ហ៊ីវ សុវណ្ណ រដ្ឋលេខាធិការក្រសួងសេដ្ឋកិច្ចនិងហិរញ្ញវត្ថុ បានសម្តែងនូវការវាយតម្លៃខ្ពស់ ជូនចំពោះលោក ង៉ាន់ ភិរម្យ អគ្គនាយកនៃអគ្គនាយកដ្ឋានលទ្ធកម្មសាធារណៈ ព្រមទាំងថ្នាក់ដឹកនាំ និងសហការី ដែលខិតខំរៀបចំឯកសារយុទ្ធសាស្ត្របច្ចុប្បន្នកម្ម និងប្រកាសខាងលើ ព្រមទាំងរៀបចំបានសិក្ខាសាលាពិគ្រោះយោបល់ដោយជោគជ័យ៕