(កំពង់ចាម)៖ លោក ហួត ហាក់ រដ្ឋមន្ត្រីក្រសួងទេសចរណ៍ និងជាប្រធានក្រុមការងាររាជរដ្ឋាភិបាលចុះមូលដ្ឋានស្រុកស្ទឹងត្រង់ រួមជាមួយ លោក អ៊ុន ចាន់ដា អភិបាលនៃគណៈអភិបាលខេត្តកំពង់ចាម បានអញ្ជើញសំណេះសំណាលសាកសួរសុខទុក្ខ និងប្រគល់អំណោយដ៏ថ្លៃថ្លារបស់សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រី នៃកម្ពុជា និងលោកជំទាវបណ្ឌិត ពេជ ចន្ទមុនី្ន ហ៊ុនម៉ាណែត ជូនដល់ប្រជាពលរដ្ឋភៀសសឹក ប្រជាពលករ និងក្រុមគ្រួសារយោធិននៅក្នុងស្រុកចំការលើ ចំនួន ៣០០គ្រួសារ ដែលរួមមានជាថវិកា គ្រឿងឧបភោគបរិភោគ និងសម្ភារៈប្រើប្រាស់ជាច្រើនមុខទៀត នាថ្ងៃទី២៤ ខែសីហា ឆ្នាំ២០២៥ នៅស្រុកចម្ការលើ ខេត្តកំពង់ចាម។

ជាមួយនឹងការសាកសួរសុខទុក្ខ និងសំណេះសំណាលនេះ លោករដ្ឋមន្ត្រី បានប្រគល់ជូននូវម៉ូតូហុងដាឌ្រីម ឆ្នាំ២០២៥ ចំនួន ១គ្រឿង រួមជាមួយនឹងថវិកាមួយចំនួនជូនដល់ក្រុមគ្រួសាររបស់វីរកងទ័ពជួរមុខ ដែលបានពលី ក្នុងសមរភូមិការពារបូរណភាពដែនដី ដើម្បីដោះស្រាយជីវភាពរស់នៅប្រចាំថ្ងៃ។

ពិធីនេះ មានការអញ្ជើញចូលរួមពីលោកប្រធានក្រុមប្រឹក្សាស្រុកចាំការលើ, លោកអភិបាលនៃគណៈអភិបាលស្រុកចំការលើ,លោក លោកស្រី អនុប្រធានក្រុមការងាររាជរដ្ឋាភិបាលចុះមូលដ្ឋានស្រុកស្ទឹងត្រង់ និងស្រុកចំការលើ ខេត្តកំពង់ចាម និងប្រធានក្រុមការងាររាជរដ្ឋាភិបាលចុះមូលដ្ឋានឃុំទាំងអស់ ព្រមទាំងបងប្អូន លោកពូ អ្នកមីង លោកយាយ លោកតា យ៉ាងច្រើនកុះករ។

ថ្លែងក្នុងពិធីនេះ រដ្ឋមន្ត្រី ហួត ហាក់ បានថ្លែងអំណរគុណ និងគោរពដឹងគុណដល់វីរកងទ័ពជួរមុខកម្ពុជា ក្នុងការការពារបូរណភាពទឹកដីតាមខ្សែរបន្ទាត់ព្រំដែន ប្រកបដោយភាពអង់អាចក្លាហាន និងឈរជើងយ៉ាងរឹងមាំ ប្រឆាំងនឹងសត្រូវឈ្លានពាន។

រដ្ឋមន្ត្រី ហួត ហាក់ បានបញ្ជាក់ជូនលរដ្ឋថា រាល់ការលំបាករបស់បងប្អូន រាជរដ្ឋាភិបាលកម្ពុជាក្រោមការដឹកនាំដោយសម្តេចធិបតី ហ៊ុន ម៉ាណែត មិនប្រងើយកន្តើយទុកឲ្យពលរដ្ឋណាម្នាក់ ដាច់ស្បៀងអាហារឡើយ៕