(ភ្នំពេញ)៖ រដ្ឋបាលរាជធានីភ្នំពេញ នៅព្រឹកថ្ងៃទី២៦ ខែសីហា ឆ្នាំ២០២៥នេះ បានបើក «វគ្គបណ្តុះបណ្តាល ស្តីពីការគ្រប់គ្រងរដ្ឋបាលសង្កាត់ សម្រាប់ក្រុមប្រឹក្សាសង្កាត់ ទាំង១០៥» ក្រោមអធិបតីភាព លោក កើត ឆែ អភិបាលរងរាជធានីភ្នំពេញ តំណាងលោក ឃួង ស្រេង អភិបាលរាជធានីភ្នំពេញ។

ថ្លែងក្នុងឱកាសនោះ លោក កើត ឆែ បានលើកឡើងថា កាេបើកវត្តបណ្តុះបណ្តាល ស្តីពីតួនាទី ភារកិច្ច និងសិទ្ធិអំណាចរបស់ក្រុមប្រឹក្សាសង្កាត់ រាជាធានីភ្នំពេញនេះ មានគោលបំណងពង្រឹង និងលើកកម្ពស់ ការអនុវត្តតួនាទី ភារកិច្ច និងសិទ្ធិអំណាចរបស់ក្រុមប្រឹក្សាសង្កាត់ឱ្យមានប្រសិទ្ធភាព ស្របតាមច្បាប់ ព្រះរាជក្រឹត្យ អនុក្រឹត្យ ប្រកាស និងលិខិបទដ្ឋានជាធរមាន។

លោកបានបញ្ជាក់ថា ចំណេះដឹងពិតជាមានសារៈសំខាន់ ដូចពាក្យស្លោក ពោលថា «រៀនហើយ រៀនទៀត រៀនពេញមួយជីវិត» ព្រោះថា សង្គមជាតិមានការវិវត្តន៍ តួយ៉ាងបច្ចេកវិទ្យា ដូច្នេះប្រសិនបើយើងមិនខិតខំរៀនសូត្រ ឬស្វែងយល់ទេនោះ គឺពិតជាប៉ះពាល់ដល់ប្រសិទ្ធភាពការងារ ជាក់ជាមិនខាន។ ការបណ្តុះបណ្តាលនេះ មានគោលបំណងដើម្បីពង្រឹងសមត្ថភាពសិក្ខាកាម ឲ្យបំពេញការងារបានល្អប្រសើរ ជៀសវាងការប្រព្រឹត្តខុសច្បាប់។

បន្ថែមពីនេះ លោកសូមឲ្យក្រុមប្រឹក្សាសង្កាត់ទាំង១០៥ ប្តេជ្ញាប្រកបដោយឆន្ទៈ និងស្មារតីខ្ពស់ ដើម្បីរួមគ្នាជាមួយរាជរដ្ឋាភិបាល និងកងកម្លាំងដ៏អង់អាចនៃយើង ការពារខឿនអធិបតេយ្យ បូរណភាពទឹកដី និងខ្សែបន្ទាត់ព្រំដែន និងធ្វើការថ្កោលទោសយ៉ាងខ្លាំងក្លា ចំពោះក្រុមជនអគតិក្រៅច្បាប់មួយក្តាប់តូច ដែលតែងតែចិញ្ចឹមចិត្តបំផ្លាញមាតុភូមិរបស់យើង ខណៈកងទ័ពថៃ បាននិងកំពុងឈ្លានពានយ៉ាងគឃ្លីន មកលើដែនអធិបតេយ្យភាពកម្ពុជា។

ស្ថិតក្នុងស្ថានការណ៍បច្ចុប្បន្ន ដែលអធិបតេយ្យកម្ពុជា ត្រូវបានកងទ័ពថៃឈ្លានពានយ៉ាងគឃ្លីន លោកសូមឲ្យទាំងអស់គ្នា ត្រូវប្តេជ្ញាប្រកបដោយឆន្ទៈ និងស្មារតីខ្ពស់ ដើម្បីរួមគ្នាជាមួយរាជរដ្ឋាភិបាល និងកងកម្លាំងដ៏អង់អាចនៃយើង ការពារខឿនអធិបតេយ្យ បូរណភាពទឹកដី និងខ្សែបន្ទាត់ព្រំដែន តាមរយៈវប្បធម៌នៃសាមគ្គីភាព និងការចែករំលែក «សមរភូមិក្រោយ ជួយសមរភូមិមុខ» និង «សមរភូមិមុខការពារ សមរភូមិក្រោយអភិវឌ្ឍ»។ ជាពិសេស យើងត្រូវថ្កោលទោសដល់ក្រុមជនអគតិក្រៅច្បាប់មួយក្តាប់តូច ដែលតែងតែចិញ្ចឹមចិត្តបំផ្លាញមាតុភូមិរបស់យើង និងសូមអំពាវនាវឲ្យអាជ្ញាធរមានសមត្ថកិច្ចអនុវត្តវិធានការច្បាប់ ឲ្យបានតឹងរ៉ឹងបំផុតលើក្រុមទាំងនោះ។

លោក កើត ឆែ បន្តថា ក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន និងក្នុងនីតិកាលទី៧ ក្រោមការដឹកនាំដ៏ឈ្លាសវៃ ប្រកបដោយទស្សនវិស័យទំនើបរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី តែងបានយកចិត្តទុកដាក់ខ្ពស់ លើការរៀបចំ និងអភិវឌ្ឍសមត្ថភាព ក្រុមប្រឹក្សានៅថ្នាក់មូលដ្ឋាន, ការបន្តវិភាជន៍ថវិកាជាគុណប្រយោជន៍ដល់មូលនិធិសង្កាត់ សម្រាប់អភិវឌ្ឍ មូលដ្ឋាន ព្រមទាំងការដាក់ឲ្យដំណើរការយន្តការច្រកចេញចូលតែមួយនៅថ្នាក់សង្កាត់ និងរៀបចំឲ្យមានជំនួយការហិរញ្ញវត្ថុសង្កាត់ផងដែរ៕