(ត្បូងឃ្មុំ)៖ លោក ម៉ម ប៊ុននាង ប្រធានគណៈកម្មការអង្កេត បោសសម្អាត និងប្រឆាំងអំពើពុករលួយ និងជាតំណាងលោក អ៊ុច បូររិទ្ធ ប្រធានស្តីទីព្រឹទ្ធសភា នារសៀលថ្ងៃទី២៥ ខែសីហា ឆ្នាំ២០២៥ បានអញ្ជើញចុះជួបសំណេះសំណាលសួរសុខទុក្ខដល់ថ្នាក់ដឹកនាំរដ្ឋបាលខេត្តត្បូងឃ្មុំ និងថ្នាក់ដឹកនាំមន្ទីរពេទ្យមិត្តភាពកម្ពុជា-ចិនត្បូងឃ្មុំ ព្រមទាំងនាំយកអំណោយមនុស្សធម៌របស់ព្រឹទ្ធសភា រួមមាន ឱសថចំនួន៩មុខ ស្មើនឹង១៦០កេសធំ ៥១៥ប្រអប់តូច និងឃីតចំនួន៣០កញ្ចប់ ប្រគល់ជូនដល់មន្ទីរពេទ្យមិត្តភាពកម្ពុជា-ចិន ស្ថិតនៅសាលាខេត្តត្បូងឃ្មុំ។

ពិធីសំណេះសំណាល និងប្រគល់អំណោយមនុស្សធម៌នេះ ប្រព្រឹត្តទៅដោយមានការអញ្ជើញចូលរួមពីសំណាក់សមាជិកក្រុមសមាជិកព្រឹទ្ធសភាប្រចាំភូមិភាគទី២ ថ្នាក់ដឹកនាំខេត្តត្បូងឃ្មុំ ដឹកនាំដោយ លោក ប៉ែន កុសល្យ អភិបាលខេត្ត ក្រុមគ្រូពេទ្យមន្ទីរពេទ្យមិត្តភាពកម្ពុជា-ចិនត្បូងឃ្មុំ និងតំណាងមូលនិធីចែករំលែកសង្គ្រោះជីវិតសកលនៃសាធារណរដ្ឋកូរ៉េ។

ក្នុងឱកាសនោះ លោក ប៉ែន កុសល្យ អភិបាលខេត្តត្បូងឃ្មុំ បានថ្លែងនូវការស្វាគមន៍យ៉ាងកក់ក្តៅចំពោះវត្តមាន លោក ម៉ម ប៊ុននាង និងគណៈប្រតិភូព្រឹទ្ធសភានៃកម្ពុជា ដែលបានឆ្លៀតពេលវេលាដ៏មមាញឹក និងមានតម្លៃ អញ្ជើញមកសួរសុខទុក្ខ និងនាំយកអំណោយដ៏ថ្លៃថ្លា ផ្តល់ជូនដល់រដ្ឋបាលខេត្ត និងមន្ទីរពេទ្យត្បូងឃ្មុំនាឱកាសនោះ។

អំណោយ មនុស្សធម៌នេះ ជាសក្ខីភាពនៃការគិតគូរយកចិត្តទុកដាក់យ៉ាងកក់ក្តៅពីសំណាក់ថ្នាក់ដឹកនាំព្រឹទ្ធសភា ក្រុមសមាជិកព្រឹទ្ធសភាប្រចាំភូមិភាគទី២ ក្នុងការរួមចំណែកដ៏មានតម្លៃមិនអាចកាត់ថ្លៃបាន ដើម្បីជួយលើកកម្ពស់ជីវភាព សុខុមាលភាពរបស់ប្រជាពលរដ្ឋដែលខ្វះខាត និងងាយរងគ្រោះនៅមូលដ្ឋាន ឱ្យបានប្រសើរឡើង។

មានប្រសាសន៍សំណេះសំណាលក្នុងឱកាសនោះ លោក ម៉ម ប៊ុននាង ប្រធានគណៈប្រតិភូព្រឹទ្ធសភា បានពាំនាំនូវការសួរសុខទុក្ខប្រកបដោយក្តីនឹករលឹកពីសំណាក់ សម្តេចអគ្គមហាសេនាបតីតេជោហ៊ុន សែន ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត, ឯកឧត្តម អ៊ុច បូររិទ្ធ អនុប្រធានទី១ ព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី២ (ខេត្តត្បូងឃ្មុំ), លោកបណ្ឌិត ធន វឌ្ឍនាអនុប្រធានទី២ ព្រឹទ្ធសភា ជូនដល់ថ្នាក់ដឹកនាំខេត្ត និងបងប្អូនប្រជាពលរដ្ឋក្នុងមូលដ្ឋានខេត្តត្បូងឃ្មុំទាំងអស់។

លោក ម៉ម ប៊ុននាង បានបន្តជម្រាបជូនអង្គពិធីអំពីការវិវត្តនៃសភាពការណ៍ថ្មីៗ នៅតាមបណ្តោយព្រំដែនកម្ពុជា-ថៃ ជាពិសេសភាពអង់អាចក្លាហានរបស់វីរកងទ័ព និងការតស៊ូអត់ធ្មត់របស់ប្រជាពលរដ្ឋយើង ការយកចិត្តទុក្ខដាក់ខ្ពស់ និងជា្រលជ្រៅបំផុតរបស់ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា រួមជាមួយសម្តេចមហាបរវធិបតី ហ៊ុន ម៉ាណែត ប្រមុខរាជរដ្ឋាភិបាល។ សម្តេចទាំងទ្វេរ បានលះបង់ទាំងកម្លាំងកាយចិត្ត ប្រាជ្ញាស្មារតី មិនថា យប់-ថ្ងៃ ដើម្បីការពារបូរណភាពទឹកដី អធិបតេយ្យ ឧត្តមប្រយោជន៍ជាតិ និងប្រជាជនកម្ពុជា។

ជាមួយគ្នានេះ អំណោយមនុស្សដែលយកមកប្រគល់ជូនដល់រដ្ឋខេត្តត្បូងឃ្មុំ និងមន្ទីរពេទ្យខេត្តនាពេលនោះ គឺជាសក្ខីភាពដែលឆ្លុះបញ្ចាំងពីសមិទ្ធិផល និងប្រសិទ្ធភាពនៃកិច្ចសហប្រតិបត្តិការរវាងព្រឹទ្ធសភាកម្ពុជា ដែលមានគណៈកម្មការអង្កេត បោសសម្អាត និងប្រឆាំងអំពើពុករលួយជាសេនាធិការ និងមូលនិធិចែករំលែកសង្គ្រោះជីវិតសកលនៃសាធារណរដ្ឋកូរ៉េ សំដៅចូលរួមលើកកម្ពស់ជីវភាព សុខុមាលភាពរបស់ប្រជាពលរដ្ឋឱ្យកាន់តែប្រសើរឡើងថែមទៀត។

គួរបញ្ជាក់ផងដែរថា គណៈកម្មការអង្កេត បោសសម្អាត និងប្រឆាំងអំពើពុករលួយព្រឹទ្ធសភា បានចុះអនុស្សរណៈនៃការយោគយល់គ្នា ជាមួយមូលនិធិសង្គ្រោះជីវិតសកលនៃសាធារណរដ្ឋកូរ៉េ ក្នុងគោលបំណងចូលរួមធ្វើឱ្យគុណភាពជីវិតរស់នៅប្រចាំថ្ងៃរបស់ប្រជាពលរដ្ឋកម្ពុជា មានភាពល្អប្រសើរឡើង តាមរយៈការផ្តល់ជំនួយសប្បុរសធម៌ពីភាគីកូរ៉េ មកកម្ពុជា មានដូចជា ឱសថ សម្ភារៈវេជ្ជសាស្ត្រ សម្ភារៈសិក្សា សម្លៀកបំពាក់ និងសម្ភារៈប្រើប្រាស់ប្រចាំថ្ងៃជាដើម។ មកដល់ពេលនេះ មូលនិធិចែករំលែកសង្គ្រោះជីវិតសកល នៃសាធារណរដ្ឋកូរ៉េ បានបញ្ជូនអំណោយមនុស្សធម៌មកព្រឹទ្ធសភាកម្ពុជា ចំនួន ១ ២លើករួចមកហើយ៕