(ព្រះវិហារ)៖ លោកឧត្តមសេនីយ៍ទោ សែម រតនៈ អគ្គនាយករងមជ្ឈមណ្ឌលជាតិរក្សាសន្តិភាព និងនាយទាហាន នាយទាហានរង និងពលទាហាន នាយកដ្ឋានរក្សាសន្តិភាព នៅថ្ងៃទី២៦ ខែសីហា ឆ្នាំ២០២៥នេះ បានឧបត្ថម្ភម៉ូតូ ៤គ្រឿង អង្ករ ៥តោន និងតង់ចំនួន២៥ ជូនវីរកងទ័ពជួរមុខនៅទិសខេត្តព្រះវិហារ ទិសខេត្តឧត្តរមានជ័យ និងទិសខេត្តបន្ទាយមានជ័យ។

ក្នុងនាមជាកងទ័ពដូចគ្នា, ឧត្តមសេនីយ៍ទោ សែម រតនៈ បានបញ្ជាក់ថា គំរូវីរភាពដ៏មហិមា ដែលមានតម្លៃមិនអាចកាត់ថ្លៃបាននេះ គឺជាកត្តាចាំបាច់បំផុតក្នុងការធានានូវសុខសន្តិភាព ស្ថិរភាព ការអភិវឌ្ឍសេដ្ឋកិច្ចសង្គម និងភាពសុខក្សេមក្សាន្តរបស់ប្រជាជន ហើយនេះជាគំរូដ៏ឧត្ដុង្គឧត្ដមសម្រាប់ប្រជាជនខ្មែរគ្រប់រូប ព្រមទាំងកូនចៅជំនាន់ក្រោយៗត្រូវរៀនសូត្រ និងយកតម្រាប់តាម។

ជាលក្ខណៈមហាគ្រួសារខ្មែរក្នុងស្មារតីខ្មែរតែមួយ នៅជាប់ជានិច្ចជាមួយយុទ្ធជនជួរមុខ, ឧត្តមសេនីយ៍ទោ សែម រតនៈ បានគូសបញ្ជាក់ថា កម្ពុជាប្រកាន់ខ្ជាប់នូវគោលជំហរក្សាសន្តិភាព មិត្តភាព និងកិច្ចសហប្រតិបត្តិការល្អជាមួយថៃ ដូចអ្វីដែលប្រមុខដឹកនាំដែលជាស្ថានិកសន្តិភាពនៅកម្ពុជា សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានបញ្ជាក់ជាញឹកញាប់រួចមកហើយ ពិសេសនៅពេលសម្តេចទំាងពីរ បានអញ្ជើញមកសួរសុខទុក្ខ វីរកងទ័ពកាលពីពេលថ្មីៗនេះ។ ប៉ុន្តែជាអកុសល ដែលកម្ពុជាមានអ្នកជិតខាងដូចជាថៃ មានចិត្តមិនស្មោះ បានចិញ្ចឹមចិត្តឈ្លានពាន រំលោភបំពានទឹកដីរបស់យើងជានិច្ច។

លោកបានបញ្ជាក់ថាអំណោយទាំងអស់នេះ គឺជាទឹកដ៏ថ្លៃថ្លាបានពីថ្នាក់ដឹកនាំមជ្ឈមណ្ឌលជាតិរក្សាសន្តិភាពចូលរួមប្រគល់ជូនដល់វីរកងទ័ព តាមបន្ទាត់ ព្រំដែនជួរមុខខេត្តព្រះវិហារ ឧត្តរមានជ័យ និងបន្ទាយមានជ័យ ក្រោយពីទាហានថៃ បានបង្កសង្គ្រាមឈ្លានពានយ៉ាងគឃ្លើនមក លើអធិបតេយ្យភាពកម្ពុជា។

បន្ថែមលើនេះកងទ័ពនៅជួរមុខ ក៏បានថ្លែងអំណរគុណចំពោះទឹកចិត្តថ្នាក់ដឹកនាំមជ្ឈមណ្ឌលជាតិរក្សាសន្តិភាព ដែលបានឧបត្ថម្ភ ម៉ូតូ អង្ករ និងតង់សម្រាប់វីរ កងទ័ពឈរជើងតាមបន្ទាត់ព្រំដែនជួរមុខ។ ទឹកចិត្តរបបស់ថ្នាក់ដឹកនាំ នាយទាហាន និងពលទាហានរបស់មជ្ឈមណ្ឌលជាតិរក្សាសន្តិភាព គឺជាកម្លាំងចិត្តដ៏ធំធេង នៅពីក្រោយកងកម្លាំងទាំងអស់គ្នា និងបានប្ដេជ្ញាការពារដែនអធិបតេយ្យភាព បូរណភាពទឹកដីពីការឈ្លានពានពីសំណាក់កងទ័ពថៃ ឱ្យបានដាច់ខាត៕