(ពោធិ៍សាត់)៖ លោក ខូយ រីដា អភិបាលខេត្តពោធិ៍សាត់ និងក្រុមការងារ នៅថ្ងៃទី២៦ ខែសីហា ឆ្នាំ២០២៥ បានអញ្ជើញចុះសួរសុខទុក្ខកម្លាំងយោធាជួរមុខម្នាក់ នៃវីរៈសេនាតូចស៉ើបការណ៍ ឈរជើងនៅចំណុចអានសេះ ខេត្តព្រះវិហារ ដែលមានបញ្ហាសុខភាព ពុលផ្សែងគីមី មានអាការចុកដើមទ្រូង ទន់ដៃជើង កំពុងសម្រាកព្យាបាល នៅមន្ទីរពេទ្យបង្អែកពោធិ៍សាត់ ដោយទទួលបានការយកចិត្តទុកដាក់បំផុតពីសំណាក់ក្រុមគ្រូពេទ្យ។

លោក ខូយ រីដា បានសម្តែងនូវការគោរពអរគុណ និងមានមោទនភាពជាខ្លាំង ចំពោះវីរភាពដ៏អង់អាចរបស់ប្អូន ដែលហ៊ានលះបង់ពលី ស៊ូស្លាប់ ដើម្បីជាតិមាតុភូមិរបស់យើង សូមប្អូនឆាប់ជាសះស្បើយ ហើយភាពអង់អាច របស់កងទ័ពយើង នឹងឋិតនៅជាការចងចាំរបស់ប្រជាជនកម្ពុជាយើង ជារៀងរហូត។

លោកបានគូសបញ្ជាក់ថា បើទោះបីប្អូនដែលជាកម្លាំងយោធាជួរមុខម្នាក់នេះ កំពុងសម្រាកព្យាបាលយ៉ាងណាក្តី ក្នុងនាមអាជ្ញាធរដែនដី និងក្នុងនាមរដ្ឋបាលខេត្ត លោកនៅបន្តយកចិត្តទុកដាក់ ជួយដល់គ្រួសារកងទ័ព តាមរយៈការចុះសួរសុខទុក្ខ ផ្តល់អំណោយជាគ្រឿងឧបភោគបរិភោគ និងថវិកា ពោលគឺមិនទុកឱ្យគ្រួសារកងទ័ពមានការលំបាកឡើយ។

ជាមួយគ្នានោះ លោក ខូយ រីដា ក៏បានថ្លែងអំណរគុណថ្នាក់ដឹកនាំ និងក្រុមគ្រូពេទ្យ ដែលខិតខំប្រឹងប្រែងបម្រើសេវាសុខភាពជូនប្រជាពលរដ្ឋ ពិសេសដូចជាយោធាជួរមុខម្នាក់នេះ ដែលមានបញ្ហាសុខភាព ពុលផ្សែងគីមី មានអាការចុកដើមទ្រូង ទន់ដៃជើង ត្រូវបានការយកចិត្តទុកដាក់បំផុត ពីសំណាក់ក្រុមគ្រូពេទ្យ នៃមន្ទីរពេទ្យបង្អែកពោធិ៍សាត់។

សូមជម្រាបថា ការអញ្ជើញចុះសួរសុខទុក្ខ ដល់វីរកងទ័ពនាពេលនេះ បានធ្វើឱ្យវីរកងទ័ព និងគ្រួសារ មានចិត្តរំភើបចំពោះការយកចិត្ដទុក្ខដាក់យ៉ាងកក់ក្ដៅ ពីថ្នាក់ដឹកនាំ និងក្រុមគ្រូពេទ្យ ដែលធ្វើឱ្យវីរកងទ័ពមានកម្លាំងចិត្ដ ភាពក្លាហ៊ានមោះមុតកាន់តែខ្លាំង និងជាការចងចាំមួយដ៏ល្អ សម្រាប់យុទ្ធជនស្នេហាជាតិ ដែលលះបង់ឈាមស្រស់ លើសមរភូមិប្រកបដោយមោទនភាព៕