(រតនគិរី)៖ ជនជាតិដើមភាគតិចចារ៉ាយ បានបន្តប្រើប្រាស់ឧបករណ៍បុរាណក្នុងការស្វែងរក និងរែងមាសតាមជ្រលងដងអូរក្នុងចំការដែលមានទឹកដើម្បីផ្គត់ផ្គង់គ្រួសារ។ ថ្វីត្បិតតែរ៉ែមាស និងត្បូងដែលរកបានមានតម្លៃ ប៉ុន្តែទម្រាំរែងបានរ៉ែមាស១ហ៊ុន ទៅ២ហ៊ុនពិបាកណាស់ដោយសារតែអ្នកភូមិប្រើឧបករណ៍បុរាណជាលក្ខណៈគ្រួសារ។

លោក រម៉ាម យឿន ជនជាតិភាគតិចចារ៉ាយរស់នៅភូមិប៉ក់ធំ ឃុំប៉ក់ញ៉ៃស្រុកអូរយ៉ាដាវ ខេត្តរតនគិរី បានប្រាប់ឲ្យដឹងនៅរសៀលថ្ងៃទី២៦ ខែសីហា ឆ្នាំ២០២៥ថា លោកបានចេះចាំពីរបៀបរែងមាសតាំងពីដូនតាមក ហើយក៏ប្រកបរបរនេះរហូតមកដល់បច្ចុប្បន្នជាពិសេសនៅរដូវវស្សា។

លោកបន្តថា ការងារនេះបែបផ្សងព្រេងមិនទៀងទាត់ ជួនកាលបាន ជួនកាលមិនបាន ជាក់ស្តែងនៅពេលនេះអញ្ចឹង លោក និងក្រុមគ្រួសារមករែង ៤-៥ដងរកពុំឃើញកម្ទេចមាសនោះទេ។ យ៉ាងណាមិញលោកបញ្ជាក់ថា បើថ្ងៃណាហេងរកបានកម្ទេចមាសនោះ លក់ចេញបានតម្លៃសមរម្យ ដូច្នេះបានជាព្យាយាមរករ៉ែកម្រពីព្រោះរដូវវស្សាបងប្អូនពួកគាត់ទំនេរផង។

ចំណែកឯលោក រម៉ាស ប៊ិច ជនជាតិដើមភាគតិចចារ៉ាយ បានប្រាប់ថា ការងារនេះហត់ណាស់ លោកនិងក្រុមគ្រួសារបានមករែងរ៉ែមាសចំនួន៧ថ្ងៃហើយ បានចំនួន៣ហ៊ុនទេ។ លោកថា ឥលូវនេះពិបាកណាស់លួចធ្វើក្នុងដីចំការម្ចាស់គេទេ។ បើគេដេញរត់ ឬក៏សុំម្ចាស់ដីធ្វើ ហើយការងារនេះក្រុមគ្រួសារលោក និងអ្នកភូមិធ្លាប់ធ្វើមុខរបរនេះតាំងពីនៅក្មេងមកម្ល៉េះ ដើម្បីបានប្រាក់បន្តិចបន្តួចផ្គត់ផ្គង់គ្រួសារ។

បើតាមអ្នកស្រីរម៉ាម វ៉ាត់ ការរែងរករ៉ែមាសនេះ ថ្ងៃខ្លះមានអ្នកភូមិចូលរួមប្រមាណ៥០នាក់ ហើយអ្នកខ្លះរែងបានមាសត្រឡប់ទៅផ្ទះវិញ ប៉ុន្តែអ្នកខ្លះរែងអត់បានបន្តរែងដល់យប់ក៏មាន។ សូមបញ្ជាក់ថា ខេត្តរតនគិរី ល្បីល្បាញដោយសារធនធានធម្មជាតិដ៏សម្បូរបែប រួមទាំងត្បូង និងរ៉ែដ៏មានតម្លៃ។

តាមដងទន្លេសេសាន តាមជ្រលងដងអូរ នៅពេលរដូវវស្សានាំមកដីល្បាប់រាយឡំរ៉ែដ៏មានតម្លៃ ហើយនៅពេលទឹកស្រក់ទៅវិញក៏បានបន្សល់ទុកនៅរ៉ែទាំងនោះ៕