(កណ្ដាល)៖ នគរបាលស្រុកអង្គស្នួល បានប្រមូលយុវជនក្មេងស្ទាវប្រុសស្រីចំនួន៩នាក់ យកទៅអប់រំ ធ្វើកិច្ចសន្យា និងឲ្យធ្វើការសហគមន៍ (អនាម័យទីសាធារណៈ) និងហៅអាណាព្យាបាលមកទទួលទៅអប់រំបន្ត ក្រោយពួកគេបានជុំគ្នាបង្ហោះម៉ូតូនៅបណ្ដោយផ្លូវបេតុងក្នុងភូមិមនោរម្យ ឃុំបែកចាន ថ្ងៃទី២៣ ខែសីហា ឆ្នាំ២០២៥។

កម្លាំងប៉ុស្ដិ៍នគរបាលពើក សហការជាមួយកម្លាំងផ្នែកជំនាញនគរបាលយុត្តិធម៌ និងកម្លាំងអន្តរាគមន៍ នៃអធិការដ្ឋាននគរបាលស្រុកអង្គស្នួល ចេញល្បាតក្នុងភូមិសាស្រ្ដហើយក៏ទទួលបានព័ត៌មានពីប្រជាពលរដ្ឋល្អថា មានក្មេងទំនើងកំពុងជួបជុំគ្នា និងធ្វើសកម្មភាពបង្ហោះម៉ូតូ។

ប្រភពបន្តថា ក្រោយពីទទួលបានព័ត៌មានខាងលើហើយ កម្លាំងសមត្ថកិច្ចបានទៅដល់ទីតាំងកន្លែងកើតហេតុខាងលើក៏ប្រទះឃើញជនសង្ស័យ០៩នាក់ស្រី០២នាក់ ជិះម៉ូតូម៉ាកសង់០៣គ្រឿងនិងម៉ាកនិច១គ្រឿង និងម៉ាកស្កុបពី ១គ្រឿង ដោយឃើញដូចនោះកម្លាំងផ្នែកជំនាញ និងកម្លាំងអន្តរាគមន៍ កម្លាំងប៉ុស្ដិ៍ពើក បានហៅជនសង្ស័យ និងវត្ថុតាងម៉ូតូ០៥គ្រឿង នាំទៅអធិការដ្ឋាននគរបាលស្រុកអង្គស្នួលដើម្បីសួរនាំបន្ត។

ចំពោះមុខសមត្ថកិច្ចបក្ខពួកជនសង្ស័យ បានឆ្លើយសារភាពថាពួកខ្លួនពិតជាបានធ្វើសកម្មភាពជួបជុំគ្នានិងជិះបង្ហោះម៉ូតូពិតប្រាកដមែន ហើយកន្លងមកពួកខ្លួនធ្លាប់ធ្វើសកម្មភាពបង្ហោះម៉ូតូ នៅតាមផ្លូវសាធារណះជាច្រើនលើកមកហើយ។

ចំពោះករណីខាងលើនេះកម្លាំងផ្នែកជំនាញ សូមគោការអប់រំរយៈពេល ៣៦ម៉ោងទៅ៤៨ម៉ោង នៅអធិការដ្ឋាននគរបាលស្រុក ដើម្បីធ្វើអនាម័យ និងហៅក្រុមគ្រួសារមកធ្វើកិច្ចសន្យាអប់រំ៕