(តាកែវ)៖ លោក វ៉ី សំណាង អភិបាលខេត្តតាកែវ នៅថ្ងៃទី២៦ ខែសីហា ឆ្នាំ២០២៥ បានដាក់បទបញ្ជាដល់គណៈបញ្ជាការឯកភាពរដ្ឋបាលក្រុងស្រុក ដែលមានមណ្ឌលប្រឡងត្រូវចុះតាមដាន និងពិនិត្យមើលពីតម្លៃផ្ទះសំណាក់ និងតម្លៃម្ហូបអាហារ ដោយជៀសវាងការដំឡើងថ្លៃ ដែលនាំឱ្យប៉ះពាល់ដល់សិស្សានុសិស្ស មកស្នាក់នៅក្នុងអំឡុងពេលប្រឡងបាក់ឌុបនាពេលខាងមុខនេះ។

ការថ្លែងបែបនេះរបស់លោក បានធ្វើឡើងនាឱកាសដែល លោកអញ្ជើញជាអធិបតីក្នុងកិច្ចកិច្ចប្រជុំណែនាំនិតិវិធីដល់ប្រធានមណ្ឌល ប្រធានអប្បមាទនិងអនុរក្សទូទាំងខេត្តតាកែវ។

ចំពោះមុខអង្គពិធី​ លោក វ៉ី សំណាង បានថ្លែងបន្តថា គណបញ្ជាការឯកភាពក្រុង ស្រុក ត្រូវពិនិត្យមើលបញ្ហាថ្លៃផ្ទះសំណាក់ និងការលក់ម្ហូបអាហារឱ្យបានច្បាស់លាស់ ដោយមិនត្រូវបណ្ដែតបណ្ដោយឱ្យក្រុមឱកាសនិយម តម្លើងថ្លៃស្រេចតែចឹត្តនិង កេងចំណេញពីប្អូនៗសិស្សានុសិស្សដែលមកប្រឡងនោះទេហើយបើមានបញ្ហានេះកើតឡើងអភិបាលក្រុងស្រុកត្រូវចាត់វិធានការទប់ស្កាត់ឱ្យខានតែបាន។

អភិបាលខេត្តតាកែវ ក៏បានណែនាំដល់សមត្ថកិច្ចទាំងអស់ ត្រូវជួយរៀបចំសណ្ដាប់ធ្នាប់ និងជួយសម្រួលចរាចរណ៍តាមបណ្ឌលប្រឡងឱ្យបានល្អប្រសើរ ហើយជាពិសេសចំពោះការផ្ញើកង់ម៉ូតូរបស់បេក្ខជន ចូលរួមប្រឡងមិនតម្រូវឱ្យបង់ប្រាក់នោះទេ។

ជាមួយគ្នានេះលោក វ៉ី សំណាង បានអំពាវនាវមន្ត្រីរាជការនិងក្រុមការងារគណៈពង្រឹងមូលដ្ឋាន បើមានផ្ទះសូមជួយផ្ដល់ការស្នាក់នៅដល់ប្អូនៗសិស្សានុសិស្ស ដែលមកប្រឡងដោយឡែកតាមវត្តអារាមមួយចំនួន ក៍សូមជួយផ្ដល់ឱ្យប្អូនៗបានស្នាក់នៅផងដែរ។

បើតាមការបញ្ជាក់របស់លោក ឡោ វីរិទ្ធិ ប្រធានមន្ទីរអប់រំ យុវជន និងកីឡាខេត្ត, នៅខេត្តតាកែវ មានមណ្ឌលប្រឡងសញ្ញាបត្រមធ្យមសិក្សាទុតិយភូមិ សម័យប្រឡង ២៨ សីហា ២០២៥ មានមណ្ឌលចំនួន១៧ ស្មើនឹង ៣៩៦បន្ទប់ កើន ១១បន្ទប់ មានបេក្ខជនសរុប ៩,៨១៦នាក់ ស្រី ៥,២៨៧នាក់ កើនសរុប ៤៧៤នាក់ ស្រី ៣២២នាក់។

ចំពោះថ្នាក់វិទ្យាសាស្រ្ត មាន ៤មណ្ឌល ស្មើនឹង ៩៧បន្ទប់ មានបេក្ខជនសរុប ២,៣៨៥នាក់ ស្រី ១,៤៧៦នាក់ និង ថ្នាក់វិទ្យាសាស្រ្តសង្គម មាន ១៣មណ្ឌល ស្មើនឹង ២៩៩បន្ទប់ មានបេក្ខជនសរុប ៧,៤៣១នាក់ ស្រី ៣,៨១១នាក់៕