(ភ្នំពេញ)៖ នៅព្រឹកថ្ងៃទី២៦ ខែសីហា ឆ្នាំ២០២៥ ក្រសួងកសិកម្ម រុក្ខាប្រមាញ់ និងនេសាទ និងធនាគារ ជីប ម៉ុង ខមមើសសល ប៊ែន ម.ក បានរៀបចំពិធីចុះហត្ថលេខាលើអនុស្សរណៈនៃការយោគយល់គ្នា ដើម្បីគាំទ្រផ្នែកហិរញ្ញវត្ថុដល់សហគមន៍កសិកម្មទំនើប។

ពិធីនេះរៀបចំឡើងក្រោមអធិបតីភាព លោក ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ, អ្នកឧកញ៉ា លាង ម៉េង សហស្ថាបនិក និងប្រធានក្រុមអគ្គនាយក ជីប ម៉ុង ខមមើសសល ប៊ែន ម.ក, លោក ឃឹម ហ្វីណង់ អនុរដ្ឋលេខាធិការ ទទួលបន្ទុកការងារសហគមន៍កសិកម្មទំនើប និងជាអ្នកនាំពាក្យក្រសួង, ថ្នាក់ដឹកនាំក្រសួង រួមជាមួយនិងតំណាងរបស់សហគមន៍ជាច្រើនរូបផងដែរ។

បង្កើតឡើងដោយកូនខ្មែរ ធនាគារ ជីប ម៉ុង បានចូលរួមជាមួយក្រសួងកសិកម្ម រុក្ខាប្រមាញ់ និងនេសាទ ក្នុងការគាំទ្រផ្នែកហិរញ្ញវត្ថុដល់សហគមន៍កសិកម្មទំនើប ដើម្បីបង្កើនលទ្ធភាពក្នុងការពង្រឹងវិស័យកសិកម្មនៅកម្ពុជាឱ្យកាន់តែស្តង់ដារ។

អ្នកឧកញ៉ា លាង ម៉េង បានថ្លែងថា ការចូលរួមរបស់ធនាគារ ជីប ម៉ុង នឹងធ្វើឱ្យកសិករដែលជាសមាជិកក្នុងសហគមន៍កសិកម្មទំនើប កាន់តែមានភាពកក់ក្តៅដោយមានធនាគារ ដែលមានគ្រឹះរឹងមាំនៅពីក្រោយចាំជួយគាំទ្រហិរញ្ញវត្ថុ ដើម្បីឱ្យពួកគាត់កាន់តែមានឱកាសពង្រីកផលិតកម្មក្នុងស្រុក។

ជាមួយគ្នានេះ អ្នកឧកញ៉ា បានបន្តថា ការគាំទ្រហិរញ្ញវត្ថុនេះ គឺជាការបង្កើតឱកាសដ៏សំខាន់ ជូនកសិករខ្មែរមានទំនុកចិត្តក្នុងការធ្វើ និងពង្រឹងសមត្ថភាពផលិតកម្ម។ វាជាដំណោះស្រាយដ៏ជាក់ស្ដែងក្នុងការជំរុញឱ្យវិស័យកសិកម្ម ក្នុងស្រុកកាន់តែរឹងមាំ។

ក្នុងការលើកស្ទួយវិស័យកសិកម្មក្នុងស្រុក ធនាគារ ជីប ម៉ុង បានផ្តល់នូវកម្ចី ១០លានដុល្លារ ទៅសហគមន៍កសិកម្មទំនើប ដែលស្ថិតនៅក្រោមការផ្តួចផ្តើមគំនិតពីក្រសួងកសិកម្ម ដែលមានការប្រាក់ពិសេសត្រឹមតែ ៨% ក្នុងមួយឆ្នាំ និងមិនតម្រូវឱ្យមានទ្រព្យបញ្ចាំ។

នាឱកាសនោះដែរ លោករដ្ឋមន្ត្រី ឌិត ទីណា បានថ្លែងអំណរគុណនិងស្វាគមន៍ ធនាគារ ជីប ម៉ុង ខមមើសសល ប៊ែន ម.ក ដែលបានក្លាយជាដៃគូសហការថ្មី ជាមួយនឹងក្រសួងកសិកម្ម ដើម្បីផ្ដល់នូវកម្ចីដែលមានអត្រាការប្រាក់ទាបជូនដល់សហគមន៍កសិកម្មទំនើប។

បើតាមប្រសាសន៍របស់លោក ឌិត ទីណា, នាពេលខាងមុខ ក្រសួងនឹងរៀបចំបង្កើតច្បាប់ស្ដីពីផលិតកម្មតាមកិច្ចសន្យា ដែលជាច្បាប់ពិសេសមួយ ក្នុងការអនុវត្តលើយន្តការសហគមន៍កសិកម្មទំនើប ដើម្បីបង្កើនទំនុកចិត្តបន្ថែមជូនដល់ប្រជាកសិករ។

សូមជម្រាបថា ធនាគារ ជីប ម៉ុង ជាធនាគារដែលបង្កើតដោយកូនខ្មែរ ១០០% តែងតែគិតគូរអំពីតម្រូវការរបស់ប្រជាជនខ្មែរ។ ធនាគារមិនត្រឹមតែផ្តល់ហិរញ្ញប្បទានប៉ុណ្ណោះទេ ប៉ុន្តែយើងផ្តល់នូវការប្រឹក្សាយ៉ាងច្បាស់លាស់ ដើម្បីធ្វើយ៉ាងណាឲ្យអតិថិជនខ្មែរអាចប្រើប្រាស់កម្ចីចំគោលដៅ និងមានប្រសិទ្ធភាពដើម្បីលើកស្ទួយវិស័យកសិកម្មរបស់ប្រទេសកម្ពុជា។

ប្រធានក្រុមអគ្គនាយក ជីប ម៉ុង បានគូសបញ្ជាក់ថាធនាគារ ជីប ម៉ុង ជឿជាក់យ៉ាងមុតមាំថា ភាពជោគជ័យរបស់ប្រជាជនខ្មែរ គឺជាភាពជោគជ័យរបស់ធនាគារ ជីប ម៉ុង។ ធនាគារ ជីប ម៉ុង គឺជាធនាគារដែលមានគ្រឹះរឹងមាំ និងផ្តល់ទំនុកចិត្តខ្ពស់ ដោយបន្តដើរតាមគន្លងជោគជ័យរបស់ក្រុមហ៊ុន ជីប ម៉ុង ដែលបានបង្កើតឡើងតាំងពីឆ្នាំ១៩៨២ ជាមួយប្រវត្តិច្បាស់ជាក់លាក់ និងយូរអង្វែង៕