(ភ្នំពេញ)៖ ដើម្បីចូលរួមចំណែកក្នុងសកម្មភាពមនុស្សធម៌ ជាមួយកាកបាទក្រហមកម្ពុជា អ្នកឧកញ៉ា សុខ សំណាង អគ្គនាយកក្រុមហ៊ុនភេសជ្ជៈប៉ូវកម្លាំងបាកាស និងភរិយាលោកស្រី ស៊ីម សុនិមល បានបរិច្ចាគភេសជ្ជៈប៉ូវកម្លាំងបាកាសចំនួន ២,០០០កេស និងម៉ូតូម៉ាក Honda Wave ចំនួន៥គ្រឿង ថ្វាយសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា និងជូនសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដើម្បីចាត់ចែងប្រើប្រាស់តាមតម្រូវការចាំបាច់។

ដែលពិធីប្រគល់និងទទួលអំណោយមនុស្សធម៌ខាងលើនេះ ធ្វើឡើងនៅស្នាក់ការកណ្តាលកាកបាទក្រហមកម្ពុជា នៅព្រឹកថ្ងៃទី២៦ ខែសីហា ឆ្នាំ២០២៥ ក្រោមវត្តមាន អ្នកឧកញ៉ា សុខ សំណាង អគ្គនាយក ក្រុមហ៊ុនភេសជ្ជៈប៉ូវកម្លាំងបាកាស និងលោកស្រី ស៊ីម សុនិមល និងលោកស្រី ពុំ​ ចន្ទីនី អគ្គលេខាធិការកាកបាទក្រហមកម្ពុជា។

ក្នុងព្រះបរមនាមសម្តេចព្រះមហាក្សត្រី ព្រះវររាជមាតាជាតិខ្មែរ ព្រះប្រធានកិត្តិយស និងសម្តេចកិត្តិព្រឹទ្ធបណ្ឌិត ប្រធានកាកបាទក្រហមកម្ពុជា, លោកស្រី ពុំ ចន្ទីនី បានថ្លែងអំណរគុណយ៉ាងជ្រាលជ្រៅចំពោះ អ្នកឧកញ៉ា សុខ សំណាង និងលោកស្រី ព្រមទាំងសហការី ដែលមានទឹកចិត្តសប្បុរសធម៌ ចូលរួមចំណែកជ្រោមជ្រែងសកម្មភាពមនុស្សធម៌ ជាមួយកាកបាទក្រហមកម្ពុជា តាំងពីឆ្នាំ២០១២រៀងមក ជាពិសេសការថ្វាយនិងជូននូវអំណោយមនុស្សធម៌ដ៏ថ្លៃថ្លា ជាភេសជ្ជៈនិងម៉ូតូ៥គ្រឿង ចំពោះសម្តេចព្រះវររាជមាតាជាតិខ្មែរ ជាទីសក្ការៈដ៏ខ្ពង់ខ្ពស់បំផុត និងសម្តេចកិត្តិព្រឹទ្ធបណ្ឌិតប្រធាន នាពេលនេះ គឺបានបង្ហាញពីសទ្ធាជ្រះថ្លា និងការគោរពដង្ហែតាមព្រះរាជសកម្មភាពមនុស្សធម៌ដ៏ឧត្តុង្គឧត្តម របស់សម្តេចព្រះមហាក្សត្រី ព្រះវររាជមាតិជាតិខ្មែរ ក្នុងព្រះបរមនាមព្រះអង្គ គង់ប្រថាប់ជាព្រះប្រធានកិត្តិយសកាកបាទក្រហមកម្ពុជា ក៏ដូចជាការរួមជាមួយសម្តេចកិត្តិព្រឹទ្ធបណ្ឌិត ដើម្បីរួមចំណែកទ្រទ្រង់សកម្មភាពមនុស្សធម៌។

លោកជំទាវ បានគូសបញ្ជាក់ថា «ការបរិច្ចាគរបស់អ្នកឧកញ៉ា និងលោកជំទាវ ដោយការស្ម័គ្រចិត្តនាពេលនេះ គឺពិតជាមានគុណតម្លៃធំធេងណាស់ ក្នុងការលើកកម្ពស់ស្មារតី វប្បធម៌នៃការចែករំលែក និងជាការផ្សារភ្ជាប់រវាងសប្បុរសជនជាមួយ អ្នកទទួលផលរបស់កាកបាទក្រហមកម្ពុជា»។

ជាកិច្ចឆ្លើយតប អ្នកឧកញ៉ា សុខ សំណាង បានថ្លែងអំណរគុណយ៉ាងជ្រាលជ្រៅចំពោះកាកបាទក្រហមកម្ពុជា ក្រោមការដឹកនាំប្រកបដោយគតិបណ្ឌិតរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជាប្រធាន ដែលបានអនុញ្ញាតឱ្យក្រុមហ៊ុនរបស់អ្នកឧកញ៉ា បានចូលរួមចំណែកសកម្មភាពមនុស្សធម៌ ជាមួយកាកបាទក្រហមកម្ពុជាទាំងពេលកន្លងមក និងបច្ចុប្បន្ន ហើយ អ្នកឧកញ៉ា បានសម្តែងក្តីរីករាយ ដោយបញ្ជាក់ថា នឹងបន្តចូលរួមជាមួយកាកបាទក្រហមកម្ពុជាទៀត តាមតម្រូវការរបស់កាកបាទក្រហមកម្ពុជាស្របតាមបច្ចុប្បន្នភាពបរិបទជាក់ស្តែងនៃការរងគ្រោះរបស់ប្រជាពលរដ្ឋកម្ពុជា។

សូមបញ្ជាក់ថា អំណោយមនុស្សធម៌ដែលក្រុមហ៊ុនភេសជ្ជៈប៉ូវកម្លាំងបាកាស ថ្វាយនិងជូននាពេលនេះ រួមមានភេសជ្ជៈប៉ូវកម្លាំងបាកាស ចំនួន ២ ០០០កេស និងម៉ូតូម៉ាក Honda Wave ចំនួន៥គ្រឿង ស្មើនឹងទឹកប្រាក់ ៣៥ ៥០០ដុល្លារអាម៉េរិក៕