(ឧត្តរមានជ័យ)៖ ដោយមានការណែនាំពីសម្តេចកិត្តិសង្គហបណ្ឌិត ម៉ែន សំអន ឧត្តមប្រឹក្សាផ្ទាល់ព្រះមហាក្សត្រ, លោក មាន ចាន់យ៉ាដា អភិបាលខេត្ដឧត្ដរមានជ័យ នៅព្រឹកថ្ងៃទី២៦ ខែសីហា ឆ្នាំ២០២៥ បានដឹកនាំមន្ត្រីរាជការ មន្ទីរ អង្គភាព ជុំវិញខេត្ត និងអាជ្ញាធរពាក់ព័ន្ធ ចុះទៅកាន់ទីតាំងប្រវត្តិសាស្ត្រ ស្ពានទ័ព និងប្រាសាទព្រហ្មកិល ដើម្បីរៀបចំពិធីអុជធូប ថ្វាយគ្រឿងសក្ការៈបូជា និងបួងសួងសុំសេចក្តីសុខ សេចក្តីចម្រើនសម្រាប់ប្រជាពលរដ្ឋ ក៏ដូចជា ការពារសន្តិភាព និងស្ថិរភាព នៅតាមបណ្តោយព្រំដែន កម្ពុជា-ថៃ។

សូមបញ្ជាក់ថា ប្រាសាទព្រហ្មកិល និងស្ពានទ័ព ជាទីតាំងបុរាណមួយដ៏ស័ក្តិសិទ្ធិ ស្ថិតនៅក្នុងភូមិជើងទៀន ឃុំជើងទៀន ស្រុកចុងកាល់ ខេត្តឧត្តរមានជ័យ ជាទីកន្លែងដែលត្រូវបានរដ្ឋបាលខេត្តជ្រើសរើស សម្រាប់ពិធីដ៏មានសារៈសំខាន់នេះ។

នៅក្នុងពិធីនេះដែរលោក មាន ចាន់យ៉ាដា បានអុជធូបបួងសួងទៅកាន់វត្ថុស័ក្តិសិទ្ធិទាំងអស់ ដែលបានថែរក្សាទឹកដីខេត្តឧត្ដរមានជ័យ ក៏ដូចជា តាមប្រាង្គប្រាសាទបុរាណទាំងឡាយ សូមឱ្យទឹកដីកម្ពុជាទាំងមូលមានសុខសន្តិភាព ផុតចាកពីឧប្បត្តិហេតុអាក្រក់នានា និងសូមឱ្យប្រជាពលរដ្ឋទាំងអស់ រស់នៅដោយសុខដុមរមនា ក្នុងការប្រកបរបរចិញ្ចឹមជីវិត ជាពិសេសសុំឱ្យវត្ថុស័ក្តិសិទ្ធិក្នុងដែនដីកម្ពុជាជួយថែរក្សា និងការពារទឹកដីកម្ពុជា ឱ្យមានសន្តិភាព និងចៀសផុតពីការពីសំណាក់ឈ្លានពានថៃ ដែលមានបំណងរំលោភបំពានមកលើបូរណភាពទឹកដីកម្ពុជា។

អភិបាលខេត្តឧត្តរមានជ័យ បានថ្លែងលើកឡើងទៀតថា ការអភិវឌ្ឍន៍ហេដ្ឋារចនាសម្ព័ន្ធផ្សេងៗនៅទូទាំងប្រទេស ក៏ដូចជានៅក្នុងក្របខណ្ឌខេត្តទៅបានដោយរលូន លុះត្រាតែប្រទេសជាតិមានសុខសន្តិភាព មានស្ថិរភាពនយោបាយល្អ ដូចនេះពិធីបួងសួងនាពេលនេះ គឺក្នុងបំណងសុំសេចក្តីសុខជួនដល់ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធ និងប្រជាពលរដ្ឋខ្មែរទូទាំងប្រទេស និងប្រទេសជាតិរបស់យើងឱ្យជួបតែសេចក្តីសុខជារៀងរហូត៕