(កំពត)៖ លោក កឹមរ័ត្ន វិសិដ្ឋ នាយករងខុទ្ទកាល័យសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងជាប្រធានក្រុមប្រឹក្សាភិបាលវេទិកាសម្ព័ន្ធសង្គមស៊ីវិល (វ.ស.ស.) និងលោក អ៊ឹង ឆាយ អភិបាលរងខេត្តកំពត បានអញ្ជើញជាអធិបតីក្នុងវេទិកាសន្ទនាជាមួយអង្គការសង្គមស៊ីវិលក្នុងខេត្តកំពត និងខេត្តកែប ដែលរៀបចំឡើងដោយ វ.ស.ស. នាវេលាព្រឹក ថ្ងៃទី២៦ ខែសីហា ឆ្នាំ២០២៥ ក្រោមប្រធានបទ «កិច្ចសហប្រតិបត្តិការក្នុងភាពជាដៃគូ ដើម្បីពង្រឹងសមត្ថភាពអង្គការសង្គមស៊ីវិលក្នុងបរិបទថ្មី» និងមានការចូលរួមពីតំណាងអង្គការ សមាគម សហគមន៍ និងសហជីព ព្រមទាំងតំណាងមន្ទីរជំនាញពាក់ព័ន្ធ និងមន្រ្តីនៃរដ្ឋបាលខេត្តកំពត និងខេត្ដកែប ជាច្រើនរូប។

នៅក្នុងវេទិកានោះ លោក កឹមរ័ត្ន វិសិដ្ឋ បានកោតសរសើរចំពោះកិច្ចសហការនាពេលកន្លងមករបស់អង្គការសង្គមស៊ីវិលជាមួយអាជ្ញាធរមូលដ្ឋាន ស្របតាមផែនការយុទ្ធសាស្រ្ត និងគោលនយោបាយអភិវឌ្ឍន៍ជាតិរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត ក្នុងការរួមចំណែកលើកកម្ពស់វិស័យសុខាភិបាល អប់រំ ការអភិរក្សធនធានធម្មជាតិ និងសិទ្ធិសេរីភាព។ លោកបានលើកទឹកចិត្តឱ្យអង្គការសង្គមស៊ីវិលនៅក្នុងខេត្តទាំងពីរ បន្ដសហការជាមួយរដ្ឋបាលខេត្ត និងបំពេញតួនាទីស្របតាមលក្ខន្ដិកៈរបស់ខ្លួន ប្រកបដោយវិជ្ជាជីវៈ ទំនួលខុសត្រូវ គណនេយ្យភាព និងសុចរិតភាព ដើម្បីទទួលបានការគាំទ្រពីរដ្ឋបាលថ្នាក់ខេត្ត និងទំនុកចិត្ដពីម្ចាស់ជំនួយ។ ចំពោះស្ថានភាពបច្ចុប្បន្ន ក្នុងជម្លោះព្រំដែនកម្ពុជា-ថៃ លោកក៏បានជំរុញឱ្យអង្គការសង្គមស៊ីវិលត្រូវតែបន្តស្មារតីរួមសាមគ្គី និងជឿជាក់ ចំពោះការដោះស្រាយបញ្ហាព្រំដែនរបស់រាជរដ្ឋាភិបាល តាមរយៈយន្ដការការទូត និងសន្ដិវិធី ដើម្បីលើកស្ទួយកិត្យានុភាពជាតិ និងឧត្តមប្រយោជន៍ជាតិ។

ជាមួយគ្នានេះ លោកអភិបាលរងខេត្ត បានវាយតម្លៃខ្ពស់ចំពោះសមិទ្ធផលដែលអង្គការសង្គមស៊ីវិលបានចូលរួមជាមួយរដ្ឋបាលខេត្ត ក្នុងវិស័យសំខាន់ៗ រួមមាន វិស័យសុខាភិបាល អប់រំ ធនធានធម្មជាតិ និងអនាម័យទឹកស្អាត នាពេលកន្លងមក។ លោកក៏បានលើកទឹកចិត្តឱ្យអង្គការសង្គមស៊ីវិលបន្តរួមសហការជាមួយអាជ្ញាធរក្នុងការអភិវឌ្ឍមូលដ្ឋាន ដើម្បីលើកកម្ពស់ជីវភាពរបស់ប្រជាពលរដ្ឋឱ្យបានកាន់តែល្អប្រសើរ ស្របតាមផែនការយុទ្ធសាស្ដ្រអភិវឌ្ឍន៍ជាតិ និងយុទ្ធសាស្ដ្របញ្ចកោណរបស់រាជរដ្ឋាភិបាល។

ឆ្លៀតក្នុងឱកាសនេះ តំណាងអង្គការសង្គមស៊ីវិល បានបង្ហាញនូវការគាំទ្រយ៉ាងពេញទំហឹងចំពោះការដឹកនាំរបស់រាជរដ្ឋាភិបាល ក្រោមមគ្គុទ្ទេសក៍ដឹកនាំរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃកម្ពុជា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ក្នុងបុព្វហេតុការពារអធិបតេយ្យ និងបូរណភាពទឹកដី។ តំណាងសង្គមស៊ីវិលដែលបានចូលរួម ក៏បានប្រកាសថ្កោលទោសយ៉ាងដាច់អហង្ការចំពោះឧក្រិដ្ឋកម្មសង្គ្រាម និងអំពើឈ្លានពាន យ៉ាងគឃ្លើនពីសំណាក់កងទ័ពថៃមកលើបូរណភាពទឹកដីកម្ពុជា ដែលនេះ ជាការរំលោភបំពានលើធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងច្បាប់អន្ដរជាតិពាក់ព័ន្ធ។

តំណាងអង្គការសង្គមស៊ីវិលក្នុងខេត្តកំពត និងខេត្តកែប ក៏បានអំពាវនាវយ៉ាងទទូចដល់បណ្តាប្រទេសមហាអំណាច និងសហគមន៍អន្តរជាតិនានា ជួយអន្ដរាគមន៍ ដើម្បីជំរុញឱ្យរដ្ឋាភិបាលថៃនិងយោធាថៃគោរពអនុវត្តបទឈប់បាញ់ ដែលជាការធានាសន្តិភាពយូរអង្វែងនៅតំបន់ព្រំដែនកម្ពុជា-ថៃ និងជាការរួមចំណែកថែរក្សាសុខសន្តិភាព ស្ថិរភាព វឌ្ឍនភាព និងវិបុលភាពក្នុងតំបន់ ព្រមទាំងដោះលែងដោយឥតលក្ខខណ្ឌនូវវីរកងទ័ពកម្ពុជាទាំង ១៨រូប ដែលត្រូវបានកងទាហានថៃចាប់ខ្លួនដោយខុសច្បាប់ និងជាការរំលោភបំពានលើបទឈប់បាញ់ កាលពីវេលាព្រឹកថ្ងៃទី២៩ ខែកក្កដា ឆ្នាំ២០២៥៕