(ភ្នំពេញ)៖ បណ្ឌិត សូ ណារ៉ូ រដ្ឋមន្ត្រីប្រតិភូអមនាយករដ្ឋមន្ត្រី នៅថ្ងៃទី២៦ ខែសីហា ឆ្នាំ២០២៥ បានចេញអត្ថបទវិភាគមួយក្រោមចំណងជើងថា «សង្គ្រាម៥ថ្ងៃ ឬសង្គ្រាមលួសបន្លា»។

បណ្ឌិត សូ ណារ៉ូ បានចេញអត្ថបទវិភាគរបស់លោកតាមរយៈហ្វេសប៊ុកផ្លូវការថា៖

យើងអាចហៅសង្គ្រាម៥ថ្ងៃ ប្រឆាំងការឈ្លានពានថៃ មកលើប្រទេសកម្ពុជានាចុងខែកក្កដា ២០២៥ ថាជាសង្គ្រាមលួសបន្លាក៏មិនខុសដែរ ដ្បិតសង្គ្រាមនេះកើតឡើងដោយសារការព័ទ្ធបន្លាលួសនៅប្រាសាទតាមាន់ធំ។

ដូចយើងបានដឹងហើយ ប្រឈមនឹងការប៉ុនប៉ងឈ្លានពានជាហូរហែររបស់ទាហានថៃចាប់ពីខែឧសភាមក និងដើម្បីថែរក្សាសន្តិភាព និងប្រាប់ឱ្យភាគីថៃ កុំឱ្យធ្វើអំពើជ្រុលហួសការអត់ធ្មត់របស់យើង សម្តេចធិបតីតែងតែប្រកាសថា ការព័ទ្ធយកប្រសាទតាមាន់ គឺជាបន្ទាត់ក្រហមដែលកម្ពុជានឹងប្រតិកម្មតបតមិនខាន។ រហូតដល់ថ្ងៃទី២៤ កក្កដា ២០២៥ ឧត្តមសេនីយ៍ បាត ឃ្លាំង បានបញ្ជាឱ្យកងទ័ពថៃរាយលួសបន្លាជាច្រើនជាន់នៅខាងភាគីខ្មែរកាន់កាប់ ដោយយកលេះថាដើម្បីទប់ស្កាត់ប្រជាជនកម្ពុជាមិនឱ្យឡើងប្រាសាទតាមាន់អនាធិបតេយ្យនៅទីនោះ។ ធាតុពិតការព័ទ្ធបន្លាលួសនេះ គឺជាការប៉ុនប៉ងកាន់កាប់ប្រាសាទយកជាកម្មសិទ្ធិផ្តាច់មុខ រំលោភអធិបតេយ្យភាព បូរណភាពទឹកដីកម្ពុជា រំលោភបន្ទាត់ក្រហមដែលសម្តេចធិបតីបានប្រកាស។ កងទ័ពកម្ពុជាបានទទួលបញ្ជារឱ្យរើរុះបន្លាលួសនោះចេញ។ ទាហានថៃប្រតិកម្មបាញ់រះ។ កងទ័ពយើងបាញ់តបវិញការពារខ្លួន។ សង្គ្រាម៥ថ្ងៃសុីសាច់ហុចឈាមក៏ផ្ទុះឡើង។ ទាហានថៃស្លាប់ របួសគជើងគ្នា។ ទាហានខ្មែរពលី របួសក៏មិនតិចដែរដោយសារថៃប្រើអាវុធសាហាវៗបំផុតមកលើយើងដូចជាគ្រាប់បែកចង្កោម គ្រាប់យក្ស MK84 យន្តហោះចម្បាំង ផ្សែងពុល។ ល។

ពេលនោះ ទោះបីនាយករដ្ឋមន្រ្តីម៉ាឡេសុី Anwar ប្រធានអាស៊ាន បានទូរសព្ទ (call) ឱ្យភាគីទាំងពីរយល់ព្រមឈប់បាញ់គ្នាក្តី តែភាគីថៃបន្ទាប់ពីយល់ព្រមហើយ បានបដិសេធវិញ ដ្បិតពួកទាហានថៃមិនអាចទទួលបទឈប់បាញ់គ្នាបានទេដោយសារកងទ័ពកម្ពុជាកាន់កាប់បានទីតាំងទាំងស្រុង។ សង្គ្រាមក៏បន្តរហូតដល់លោកប្រធានាធិបតីអាមេរិក ដូណាល់ ត្រាំ លូកដៃដាក់សម្ពាធថា បើនៅបន្តបាញ់គ្នា សហរដ្ឋអាមេរិកនឹងមិនចរចារពន្ធបដិកាជាមួយទេ។ ពេលនោះ ពន្ធបដិកាអាមេរិកដាក់មកលើថៃគឺ ៣៦% ដែលនឹងធ្វើឱ្យសេដ្ឋកិច្ចថៃអាចដួលសន្លប់ដោយសារចាញ់ប្រៀបប្រកួតប្រជែងប្រទេសក្នុងតំបន់មានអត្រាតែ១៩-២០% ។ ប្រឈមនឹងជម្រើសដ៏លំបាកទាំង២នេះ ថៃសុខចិត្តទទួលយកបទឈប់បាញ់តាមការទាមទាររបស់លោក ត្រាំ ដើម្បីសង្គ្រោះសេដ្ឋកិច្ចជាតិទាំងមូល។ តែពួកទាហានថៃមិនសុខចិត្តទេ ដោយសារបាត់បង់ទីតាំងមកឱ្យកងទ័ពខ្មែរកាន់កាប់។ បើសិនទីតាំងទាំងអស់ត្រូវបានទាហានថៃកាន់កាប់ ដូចការភូតកុហករបស់ខាងថៃ និងពួកខ្មែរជ្រុលនិយមកាន់ជើងថៃមែននោះ សមតែភាគីថៃមានអំណរខ្លាំងក្លាចំពោះបទឈប់បាញ់នេះ ដ្បិតដណ្តើមបានផលអស់ហើយ រួចបានបទឈប់បាញ់គ្នាជួយទប់មិនឱ្យភាគីខ្មែរផ្ទុះអាវុធដណ្តើមយកមកវិញ។

ហេតុដូចខាងលើនេះហើយ ដែលថៃទទួលបទឈប់បាញ់ដោយការបង្ខំចិត្ត ហើយប្រជាជនថៃស្អប់លោក ត្រាំ ណាស់។ បើមិនមែនដោយសារពន្ធបដិការជាមួយអាមេរិកដើម្បីសង្គ្រោះសេដ្ឋកិច្ចថៃទាំងមូលទេ ទាហានថៃនៅតែបន្តធ្វើសង្គ្រាមរហូតដល់ពេលនេះក៏មិនដឹង ហើយការស្លាប់ របួស វិនាសព្រាត់ប្រាស់មិនដឹងជាមានទំហំធំធេងប៉ុណ្ណាទេសម្រាប់ប្រជាជនប្រទេសទាំង២។ នេះក៏ជាមូលហេតុដែលទាហានថៃនៅតែរកគ្រប់វិធីរុកគួន ជំរុញឱ្យទាហានយើងអត់ទ្រាំមិនបាន ផ្ទុះអាវុធមុនដើម្បីគេមានលេសចោទប្រកាន់កម្ពុជារំលោភបទឈប់បាញ់គ្នា ផ្ទុះអាវុធធ្វើសង្គ្រាមសាជាថ្មីដើម្បីដណ្តើមទីតាំងដែលខ្លួនបាត់បង់។ គេប្រើគ្រប់ក្បួនញុះញង់ បង្ករឿង គួបផ្សំសង្គ្រាមចិត្តសាស្ត្រគ្រប់យ៉ាងដើម្បីបំបែកធ្លុងសាមគ្គីរវាងប្រជាជនជាមួួយកងទ័ព ជាមួយរាជរដ្ឋាភិបាលកម្ពុជា ធ្វើឱ្យមានការសង្ស័យគ្នា បំបាក់ទឹកចិត្ត អស់សង្ឃឹម អស់ជំនឿ បណ្តែតបណ្តោយលែងចង់តស៊ូ។ល។ ល្បិចកលថោកទាបទាំងនេះ ត្រូវបានពួកប្រឆាំងខ្មែរជ្រុលនិយម ពួកក្បត់ជាតិសុីលុយថៃចូលដៃជាមួយសត្រូវ ជួយបន្ទរ ញុះញង់ ចាក់រុកបន្ថែមដើម្បីប្រឆាំងផ្តួលរំលំរាជរដ្ឋាភិបាលកម្ពុជា បម្រើនយោបាយប្រាក់ឌួងរបស់ថៃ។

ចុងក្រោយនេះថៃបានប្រើល្បិចដដែលៗរាយបន្លាលួស ដាក់ថែមកង់ឡាន នៅកណ្តាលវាល កណ្តាលផ្លូវ កណ្តាលថ្ងៃរះដូចគេធ្លាប់រាយន្លាលួសប្រសាទតាមាន់ធ្វើឱ្យផ្ទុះសង្គ្រាមកាលមុនអញចឹងដែរ។

រូបភាពបន្លាលួសនេះ ជាព្រួញ១ មានពិស២គឺ៖

*១៖ បំផុសការឈឺចាប់ រួចដុតកម្តៅកំហឹងរបស់ប្រជាជនកម្ពុជាថា ហេតុអ្វីរាជរដ្ឋាភិបាលធ្វើប្រងើយមិនការពារទឹកដីដូនតា ទុកឱ្យចោរឈ្លានពានធ្វើអីស្រេចតែចិត្ត? ម្តេចទុកឱ្យប្រជាជនការពារដី កងទ័ពនៅឯណា?

*២៖ បំផ្លាញទឹកចិត្តកងទ័ពដែលទ្រាំមិនបានក៏ឈានទៅផ្ទុះអាវុធបែបអនាធិបតេយ្យ មិនស្តាប់មេ មិនស្តាប់កើយ ក៏ដូចជាបង្ខំចិត្តថ្នាក់ដឹកនាំជាតិដែលមិនឆ្អិននឹងល្បែងសត្រូវ បង្ខំចិត្តសម្រេចខុសនាំដល់ផ្ទុះអាវុធបែបអន្តរាយ។ ពេលនោះអន្តរជាតិទាំងអស់មើលឃើញថា កម្ពុជាជាភាគីរំលោភបទឈប់បាញ់គ្នា យើងនឹងរងទណ្ឌកម្មអន្តរជាតិ ប្រទេសត្រូវខូចខាតខ្ទេចខ្ទី ថៃជាអ្នកសើចចុងក្រោយថាខ្មែរចូលអន្ទាក់វា។