(ភ្នំពេញ)៖ កាសែតថៃ The Nation បានសរសេរចោទប្រកាន់ប្រជាពលរដ្ឋខ្មែរខុសពីការពិត! ពួកគេអះអាងថា អ្នកភូមិជោគជ័យ ដកលួសបន្លានៅក្នុងទឹកដីថៃ ប៉ុន្តែការពិតជាក់ស្តែងបានបង្ហាញថា វាជាការរួមគ្នារបស់អ្នកស្រុកខ្មែរ ទប់ស្កាត់ទាហានថៃដែលរំលោភដីកម្ពុជា។ តំបន់នេះស្ថិតនៅលើទឹកដីកម្ពុជាស្របតាមអនុសញ្ញា១៩០៤ និងសន្ធិសញ្ញា១៩០៧។ កម្ពុជាបដិសេធពាក្យចោទថៃ និងចាត់ទុកវាជា យុទ្ធសាស្ត្របំភាន់មតិអន្តរជាតិ។

សូមទស្សនាអត្ថបទស៊ីជម្រៅរបស់ Fresh Exclusive៖

នៅចន្លោះស្ថានភាពព្រំដែនកម្ពុជា-ថៃ ដែលទើបតែស្ដារឡើងវិញក្រោម កិច្ចព្រមព្រៀងឈប់បាញ់ថ្ងៃទី២៨ ខែកក្កដា ឆ្នាំ២០២៥នោះ បញ្ហារាយលួសបន្លាបំពានយកភូមិករអ្នកស្រុកនៅលើទឹកដីខ្មែរ បាននិងកំពុងកើនឡើង និងប្រការចុងក្រោយមួយកើតឡើងនារសៀលថ្ងៃទី២៥ ខែសីហា ឆ្នាំ២០២៥ បានដុតបញ្ឆេះកំសួលកំហឹងអ្នកស្រុក ដោយបានរួមគ្នាជាកម្លាំងការពារទឹកដីរបស់ខ្លួនវិញ។ នៅវេលា១៤៖២០នាទីរសៀលថ្ងៃទី២៥ ខែសីហា ឆ្នាំ២០២៥នោះ កងកម្លាំងទាហានថៃបានលើកគ្នាចូលមករាយលួសបន្លា នៅភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ តំបន់នេះ គឺជាតំបន់ដែលស្ថិតនៅលើដែនអធិបតេយ្យភាពកម្ពុជា បើទោះបីមានភូមិសាស្ដ្រស្ថិតនៅទល់មុខភូមិណងចាន់ ខេត្តស្រះកែវ ប្រទេសថៃក៏ដោយ។

សកម្មភាពរបស់ទាហានថៃ មិនមែនជាប្រតិបត្តិការធម្មតាទេ ប៉ុន្តែជាសញ្ញាច្បាស់នៃការរំលោភលើអធិបតេយ្យភាពទឹកដីកម្ពុជា និងការមិនគោរពកិច្ចព្រមព្រៀងឈប់បាញ់ ដែលមេដឹកនាំទាំងពីរបានចុះហត្ថលេខា ថ្ងៃទី២៨ ខែកក្កដា ឆ្នាំ២០២៥ នៅទីក្រុងពូត្រាចាយ៉ា ប្រទេសម៉ាឡេស៊ី។ អំពើបំពានទឹកដីខ្មែរ នៅភូមិជោគជ័យ គឺជាផ្នែកមួយនៃយុទ្ធសាស្ត្រលួចកាត់យកបន្តិចម្តងៗ «Salami Slicing» បើទោះបីមានកិច្ចប្រជុំទ្វេភាគីថ្នាក់តំបន់ បានសន្យាឲ្យគោរពមិនរំលោភគ្នាក៏ដោយ។

នៅថ្ងៃទី២៥ ខែសីហា ឆ្នាំ២០២៥ វេលា១៤៖២០នាទីរសៀល កងកម្លាំងទាហានថៃ ប្រដាប់ដោយអាវុធពេញលេញ បានឆ្លងកាត់ខ្សែព្រំដែនអន្តរជាតិ ចូលមកដល់ភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ។ ក្រុមទាហានថៃ បាននាំយកលួសបន្លារាយនិងហ៊ុំព័ទ្ធ ដើម្បីវាតយកដីប្រជាពលរដ្ឋក្នុងតំបន់ក្បែរព្រំដែន ដែលស្ថិតនៅក្នុងទឹកដីនៃអធិបតេយ្យភាពកម្ពុជា។ តំបន់នេះត្រូវបានកំណត់ច្បាស់លាស់តាមអនុសញ្ញា ២៧ មេសា ១៩០៤ និងសន្ធិសញ្ញា ២៣ មិថុនា ១៩០៧ រវាងបារាំង-សៀម។ កិច្ចព្រមព្រៀងផ្លូវច្បាប់ទាំងពីរនេះ ត្រូវបានអង្គការសហប្រជាជាតិទទួលស្គាល់ជាផ្លូវការ ហើយបានក្លាយជាមូលដ្ឋានសំខាន់សម្រាប់ការកំណត់អធិបតេយ្យភាពទឹកដីរបស់កម្ពុជា។
ដូច្នេះសកម្មភាពរបស់កងកម្លាំងថៃនារសៀលថ្ងៃទី២៥ ខែសីហានោះ ត្រូវបានចាត់ទុកថាជាអំពើរំលោភផ្ទាល់លើច្បាប់អន្តរជាតិ និងការបំពានលើកិច្ចព្រមព្រៀងប្រវត្តិសាស្ត្រដែលមានសុពលភាពរឹងមាំច្បាស់លាស់រហូតមកទល់សព្វថ្ងៃនេះ។

* តើថៃដោះសារយ៉ាងណា ចំពោះអំពើបំពាននៅក្នុងភូមិជោគជ័យនោះ?

កាសែតថៃ The Nation បានអះអាងខុសពីការពិតថា នៅរសៀលថ្ងៃទី២៥ ខែសីហា ឆ្នាំ២០២៥ ប្រជាពលរដ្ឋកម្ពុជា បានចូលទៅក្នុងទឹកដីថៃ និងបានដោះខ្សែលួសបន្លា ដែលរាយតាមព្រំដែន ដោយបណ្ដាលឲ្យសាលាបឋមសិក្សាមួយនៅខេត្តស្រះកែវ របស់ថៃ ត្រូវបិទបណ្តោះអាសន្ន ដោយអះអាងពី «ការបារម្ភលើកត្តាសន្តិសុខ»។

ការអះអាងនេះគឺ មិនស្របនឹងស្ថានភាពពិតដែលបានកើតឡើងនោះទេ ពីព្រោះទីតាំងកើតហេតុ បានស្ថិតនៅលើទឹកដីអធិបតេយ្យភាពកម្ពុជា ក្នុងភូមិជោគជ័យ ឃុំអូរបីជាន់ ខេត្តបន្ទាយមានជ័យ។ ការចោទប្រកាន់បែបនេះ ជាផ្នែកមួយនៃយុទ្ធសាស្ត្រ «ចាប់ផ្តើមចោទប្រកាន់ត្រឡប់ដាក់មកលើកម្ពុជាវិញ» ដើម្បីបង្កើត «ស្ថានភាពស្មើគ្នា» ក្នុងការបំភ័ន្តមតិអន្តរជាតិឱ្យសង្ស័យអំពីអធិបតេយ្យភាពក្នុងតំបន់នោះ។

ជាក់ស្តែង តំបន់ព្រំដែននេះ ត្រូវបានកំណត់ច្បាស់លាស់តាមអនុសញ្ញា ២៧ មេសា ១៩០៤, សន្ធិសញ្ញា ២៣ មិថុនា ១៩០៧ និងផែនទីខ្នាត ១/២០០,០០០ ដែលបារាំង-សៀម បានទទួលស្គាល់ជាផ្លូវការ។ បន្ថែមពីលើនេះទៀត ប្រទេសថៃខ្លួនឯង ក៏ធ្លាប់បានចាញ់ក្តីច្បាប់អន្តរជាតិ ពីរដងដ៏ច្បាស់លាស់ថែមទៀត តាមរយៈឯកសារច្បាប់ឆ្នាំ១៩០៤ និង១៩០៧នោះ។ ការចាញ់លើកទីមួយ គឺនៅក្នុងឆ្នាំ ១៩៦២ ដោយតុលាការយុត្តិធម៌អន្តរជាតិ (ICJ) បានសម្រេចថា ប្រាសាទព្រះវិហារ គឺជាកម្មសិទ្ធិពេញលេញរបស់កម្ពុជា។ ចំណែកការចាញ់ក្តីលើកទី២ គឺនៅឆ្នាំ ២០១៣ ដែលតុលាការ ICJ បានបកស្រាយសាលក្រមឆ្នាំ១៩៦២ ដោយបញ្ជាក់ថា តំបន់ជាប់ប្រាសាទព្រះវិហារ និងផែនទីខ្នាត១/២០០,០០០ គឺជាឯកសារមានសុពលភាពផ្លូវច្បាប់ ហើយទទួលស្គាល់អធិបតេយ្យភាពកម្ពុជាយ៉ាងច្បាស់លាស់ថែមទៀត។

ឯកសារផ្លូវច្បាប់ទាំងនេះ ត្រូវបានអង្គការសហប្រជាជាតិ និងស្ថាប័នអន្តរជាតិទទួលស្គាល់ថា មានសុពលភាពពេញលេញ និងផ្តល់សិទ្ធិអធិបតេយ្យភាពលើទឹកដីកម្ពុជា តាមបណ្តោយខ្សែព្រំដែនដែលបានកំណត់ច្បាស់លាស់តាមអនុសញ្ញា ២៧ មេសា ១៩០៤, សន្ធិសញ្ញា ២៣ មិថុនា ១៩០៧ និងផែនទីផ្លូវច្បាប់ខ្នាត ១/២០០,០០០។ ដោយហេតុនេះ ការចោទប្រកាន់របស់កាសែតថៃថា ប្រជាពលរដ្ឋកម្ពុជា បានរំលោភទឹកដីថៃ គឺជាការចោទប្រកាន់គ្មានមូលដ្ឋានផ្លូវច្បាប់ទាំងស្រុង។ ពីព្រោះតំបន់ដែលកើតហេតុស្ថិតលើទឹកដីកម្ពុជា តាមឯកសារផ្លូវច្បាប់អន្តរជាតិដែលទទួលស្គាល់ជាផ្លូវការ។

បន្ថែមលើនេះ បើផ្អែកតាមស្ថានភាពពិតប្រាកដ បើទាហានថៃបានពង្រាយលួសបន្លាដោយខុសច្បាប់ នៅលើដីកសិដ្ឋានរបស់ប្រជាពលរដ្ឋខ្មែរ, ប្រជាពលរដ្ឋកម្ពុជាមានសិទ្ធិពេញលេញក្នុងការដកចេញវិញ ព្រោះវាជាទឹកដីដែលបានបន្សល់ទុកតាំងពីបុព្វបុរសរបស់ពួកគេ។ សិទ្ធិនេះស្របតាមច្បាប់ និងបានការពារដោយ អនុសញ្ញា១៩០៤, សន្ធិសញ្ញា១៩០៧ និងផែនទីច្បាប់ ដែលទទួលស្គាល់ដោយអន្តរជាតិ។ ដូច្នេះ កាសែតថៃ មិនអាចសរសេរចាត់ទុកព្រឹត្តិការណ៍ថ្ងៃទី២៥ សីហា ២០២៥ នៅក្នុងភូមិជោគជ័យ ខេត្តបន្ទាយមានជ័យ ថាជាការរំលោភទឹកដីថៃបានឡើយ។ ការចោទប្រកាន់បែបនេះ គឺជាផ្នែកមួយនៃយុទ្ធសាស្ត្របំភ័ន្តមតិអន្តរជាតិ ដើម្បីបំប្លែងស្ថានភាពពិតក្នុងតំបន់។

* ថៃបានបំពាន២ដងក្នុងព្រឹត្តិការណ៍ថ្ងៃទី២៥ ខែសីហា នៅភូមិជោគជ័យ

សកម្មភាពបំពានលើទឹកដីរបស់ខ្មែរនៅក្នុងភូមិជោគជ័យ បានកើតឡើង២ដងនារសៀលថ្ងៃទី២៥ ខែសីហា ដោយលើកទីមួយវេលា១៤៖២០នាទីរសៀល និងបន្ទាប់មកនៅម៉ោង១៥៖១៤នាទីរសៀល ដោយកងកម្លាំងថៃ បានធ្វើសកម្មភាពសាជាថ្មីដោយបម្រុងយកបន្លាលួសមករាយម្ដងទៀត ប៉ុន្តែត្រូវបានប្រជាពលរដ្ឋខ្មែរដែលជាម្ចាស់ដី បានរួមគ្នាធ្វើការទប់ស្កាត់យ៉ាងខ្លាំងក្លា រហូតដល់កងកម្លាំងថៃ យកបន្លាលួសរបស់ពួកគេវិលចូលត្រឡប់ទៅក្នុងទឹកដីថៃវិញ។ សកម្មភាពរបស់ទាហានថៃនេះ គឺជាល្បិចយុទ្ធសាស្ត្រលួចបន្តិចម្តង Salami Slicing ដើម្បីបន្លំកែស្ថានភាពដើមនៅក្នុងតំបន់ដើម្បីបំភ័ន្តសាធារណមតិអន្តរជាតិ។

អ្នកស្រុកជាម្ចាស់ដី ក្នុងភូមិជោគជ័យ ពេលនោះបានរួមគ្នាចូលទប់ស្កាត់យ៉ាងសន្តិវិធីប្រឆាំងនឹងទង្វើបំពានរបស់ទាហានថៃ។ ក្រុមអ្នកស្រុក បានបង្ហាញឯកសារកម្មសិទ្ធិដី និងផែនទីច្បាស់លាស់បញ្ជាក់ថា តំបន់នេះស្ថិតនៅក្នុងអធិបតេយ្យភាពកម្ពុជា។ កងកម្លាំងកម្ពុជាដែលការពារព្រំដែនខេត្តបន្ទាយមានជ័យ ត្រូវគេរាយការណ៍ថា បានចូលមកកន្លែងកើតហេតុភ្លាមៗ ក្នុងពេលនោះផងដែរក្នុងសកម្មភាពថែរក្សាសន្តិសុខ និងសន្តិភាព និងធ្វើការតាមដានរាល់អំពើបំពានរបស់ថៃទាំងឡាយនោះ យ៉ាងយកចិត្តទុកដាក់ និងតាមវិជ្ជាជីវៈ។

អ្នកស្រុកភូមិជោគជ័យ បានប្រាប់បណ្តាញសារព័ត៌មានក្នុងស្រុកថា «ទោះបីត្រូវប្រឈមមុខនឹងចុងកាណុង និងអាវុធទំនើបរបស់ទាហានថៃក៏ដោយ…» ក៏អ្នកស្រុកជោគជ័យ មិនបានតក់ស្លុត និងមិនបោះបង់ចោលសិទ្ធិការពារទឹកដីរបស់ពួកគេឡើយ។ អ្នកស្រុកជាម្ចាស់ដីបានបង្ហាញកម្លាំងសាមគ្គីភាពយ៉ាងរឹងមាំ ដោយចូលរួមការពារភូមិកររបស់ពួកគេក្នុងភាពម៉ឺងម៉ាត់ និងស្រែកតវ៉ាប្រឆាំងទាហានថៃ ដែលមានកាន់អាវុធគ្រប់ដៃ។ គេបានឮសំឡេងអ្នកស្រុក និយាយក្នុងពេលនោះថា «ដីនេះជាដីរបស់ខ្មែរពិតប្រាកដ បើទោះបីយើងស្លាប់ ក៏យើងស្លាប់ ដើម្បីការពារតម្លៃសម្បត្តិនៃដូនតារបស់យើងដែរ!»

* កម្ពុជាបង្ហាញភាពស្មោះត្រង់ ដោយនាំក្រុមសង្កេតការណ៍ IOT ចុះត្រួតពិនិត្យផ្ទាល់នៅក្នុងភូមិជោគជ័យ

ក្រុមអ្នកសង្កេតការណ៍អន្តរកាល (IOT) ចំនួនប្រទេស៥ប្រទេស (ម៉ាឡេស៊ី ឥណ្ឌូនេស៊ី ឡាវ ហ្វីលីពីន និងវៀតណាម) ដឹកនាំដោយអនុព័ន្ធយោធាម៉ាឡេស៊ី ប្រចាំកម្ពុជា នៅព្រឹកថ្ងៃទី២៦ ខែសីហា ឆ្នាំ២០២៥ បានធ្វើដំណើរទៅដល់ភូមិជោគជ័យ ឃុំអូរបីជាន់ ស្រុកអូរជ្រៅ កន្លែងដែលទាហានថៃ បានចូលមកឡោមព័ទ្ធ និងរាយបន្លាលួសយកដី និងផ្ទះរបស់ប្រជាពលរដ្ឋកម្ពុជា។ សកម្មភាពនេះបង្ហាញយ៉ាងច្បាស់ថា ប្រសិនបើកម្ពុជា ជាភាគីឈ្លានពានពិតប្រាកដ កម្ពុជានឹងមិននាំភាគីទីបី ចូលទៅកន្លែងកើតហេតុឡើយ។ ប៉ុន្តេដោយសារកម្ពុជាមានភាពប្រាកដក្នុងសិទ្ធិស្របច្បាប់រស់នៅលើទឹកដីរបស់ខ្លួន កម្ពុជាបានបើកទូលាយចំពោះការត្រួតពិនិត្យជាសាធារណៈចំពោះយន្តការស៊ើបអង្កេតអន្តរជាតិនេះ។
គេរំពឹងថា ភស្តុតាងជាក់ស្តែងតាមរយៈការចុះពិនិត្យនេះ នឹងអាចជាមូលដ្ឋានបង្ហាញដល់ សាធារណមតិអន្តរជាតិឱ្យបានឃើញកាន់តែច្បាស់នូវអំពោះរំលោភលើដែនអធិបតេយ្យភាពកម្ពុជា ប៉ុន្តែថៃ បានព្យាយាមបង្កើតទស្សនៈបញ្ច្រាស តាមសារព័ត៌មានក្នុងស្រុក ដើម្បីបំប្លែងមតិអន្តរជាតិឱ្យមានការភ័ន្តច្រឡំ។

អំពើបំពានលើទឹកដីខ្មែរ ក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នារសៀលថ្ងៃទី២៥ ខែសីហា បានធ្វើឡើងនៅមុនកិច្ចប្រជុំគណៈកម្មាធិការព្រំដែនថ្នាក់យោធភូមិភាគកម្ពុជា-ថៃ (RBC) រវាងយោធភូមិភាគទី៤ កម្ពុជា និងយោធភូមិភាគីទី២ របស់ថៃ ដែលគ្រោងនឹងធ្វើឡើងនៅថ្ងៃទី២៧ ខែសីហា ឆ្នាំ២០២៥។ អំពើបំពានលើទឹកដីខ្មែរ ក្នុងភូមិជោគជ័យនេះ ត្រូវគេរំពឹងថានឹងក្លាយជាចំណុចលើកមកពិភាក្សាក្នុងកិច្ចប្រជុំ RBC នៅថ្ងៃទី២៧សីហា និងកិច្ចប្រជុំ GBCក្នុងពេលអនាគត ដើម្បីការស្នើឱ្យក្រុមសង្កេតការណ៍បរទេសចូលត្រួតពិនិត្យក្នុងតំបន់ដែលរងការបំពាននេះ។

ក្នុងសេចក្តីសន្និដ្ឋានសរុប៖

សកម្មភាពទាហានថៃនៅភូមិជោគជ័យ កាលពីថ្ងៃទី២៥ ខែសីហា ឆ្នាំ២០២៥ គឺជាករណីរំលោភអធិបតេយ្យភាពប្រទេសកម្ពុជា យ៉ាងច្បាស់មិនអាចប្រកែកបានឡើយ។ ករណីនេះបង្ហាញពីភាពមិនស្មោះត្រង់ក្នុងការគោរពកិច្ចព្រមព្រៀងឈប់បាញ់ ហើយក៏ជាសញ្ញាដល់កម្ពុជាឲ្យត្រូវមានភាពប្រុងប្រយ័ត្នខ្ពស់ក្នុងការពារប្រជាពលរដ្ឋ និងអធិបតេយ្យភាពទឹកដីជាតិកម្ពុជា។ ប្រទេសថៃ គប្បីត្រូវយល់អំពីច្បាប់អន្តរជាតិថា «ដីកម្ពុជា គឺជាសម្បត្តិដ៏ស្របច្បាប់របស់ពលរដ្ឋខ្មែរ និងមិនអនុញ្ញាតឱ្យមានការរំលោភបំពានលើកន្លែងណាមួយដែលស្ថិតលើទឹកដីខ្មែរឡើយ»៕