(ភ្នំពេញ)៖ លោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី២៦ ខែសីហា ឆ្នាំ២០២៥ បានបញ្ជាក់សារជាថ្មីថា យន្តការសហគមន៍កសិកម្មទំនើប ជួយសម្របសម្រួលបន្ថយថ្លៃដើមផលិត និងបញ្ហាទីផ្សារជូនប្រជាកសិករ ដែលធានាពីទីផ្សារទុកជាមុន និងស្ដារនូវលទ្ធភាពផលិតកម្មរបស់ប្រជាកសិករឡើងវិញ។

ការបញ្ជាក់របស់លោកបែបនេះ បានធ្វើឡើងក្នុងពិធីចុះហត្ថលេខាលើអនុស្សរណៈនៃការយោគយល់គ្នា ដើម្បីគាំទ្រផ្នែកហិរញ្ញវត្ថុដល់សហគមន៍កសិកម្មទំនើប រវាងក្រសួងកសិកម្ម រុក្ខាប្រមាញ់ និងនេសាទ ជាមួយនឹងធនាគារ ជីប ម៉ុង ខមមើសសល ប៊ែន ម.ក។

លោក បានលើកឡើងថា ការចូលរួមរបស់ធនាគារ ជីប​ ម៉ុង នៅថ្ងៃនេះ គឺជាការចូលរួមដ៏សំខាន់នៅក្នុងវិស័យកសិកម្ម ជាពិសេសការគាំទ្រដល់សហគមន៍កសិកម្មទំនើប ដើម្បីអនុញ្ញាតឱ្យបងប្អូនប្រជាកសិករដែលជាសមាជិក អាចមានដើមទុនជាកម្ចីដែលមានអត្រាការប្រាក់ទាប ដោយមិនចាំបាច់មានវត្ថុធានា។

ចំណុចនេះគឺជារឿងសំខាន់ កន្លងមកយើងឃើញថា ការប្រាក់គឺជាឧបសគ្គមួយដែលបានធ្វើឱ្យថ្លៃដើមផលិតរបស់កសិករយើងមានកម្រិតខ្ពស់។ តួយ៉ាង ដូចបងប្អូនកសិករមួយចំនួនទៅទិញជីថ្នាំហើយជំពាក់ ដែលការជំពាក់នេះតែងបង្កប់នូវការប្រាក់ខ្ពស់។ ដើម្បីអនុញ្ញាតឱ្យបងប្អូនប្រជាកសិករមានដើមទុកបង្វិលគ្រប់គ្រាន់ ក្នុងអត្រាការប្រាក់ទាប គឺពិតជាបានជួយកាត់បន្ថយថ្លៃដើមជូនកសិករ ជាពិសេសក្នុងស្ថានភាពបច្ចុប្បន្ន។ នេះបើតាមការបញ្ជាក់របស់លោក ឃឹម ហ្វីណង់ អ្នកនាំពាក្យក្រសួងកសិកម្ម។​

ជាមួយគ្នានេះ លោក ឃឹម ហ្វីណង់ ក៏បានរំលេចបន្ថែមពាក់ព័ន្ធនឹងបញ្ហាថ្លៃស្រូវនេះ ដំណោះស្រាយបន្ទាន់របស់ក្រសួង គឺក្រសួងបាននិងកំពុងធ្វើកិច្ចសហការជាមួយរោងម៉ាស៊ីនដៃគូ ចំនួន ២០ទីតាំង ដើម្បីប្រមូលទិញស្រូវក្នុងរង្វន់ ២០ ទៅ៣០ម៉ឺនតោន ក្នុងទិសដៅអូសតម្លៃស្រូវឱ្យមានភាពប្រសើរឡើងវិញ និងធ្វើយ៉ាងណាកុំឱ្យមានការកកស្ទះស្រូវនៅទីវាល។

បន្ថែមពីនោះ មន្ត្រីកសិកម្មឃុំ ក៏បានជួយសម្របសម្រួលបងប្អូនប្រជាកសិករ រកមធ្យោបាយដឹកជញ្ជូន សម្របសម្រួលទីផ្សារ និងដោះស្រាយបញ្ហាបន្ទាន់ភ្លាមៗ។

ទោះជាយ៉ាងណា អ្នកនាំពាក្យរូបនេះ ក៏បានបញ្ជាក់ផងដែរថាបញ្ហាថ្លៃស្រូវជាបញ្ហាសកល ដែលមិនអាចដោះស្រាយត្រឹមវិធានការមួយនោះទេ ដូច្នេះហើយនាពេលថ្មីៗនេះ ក្រសួងបានរៀបចំនូវសេចក្ដីប្រកាសព័ត៌មានថ្មី ពីវិធានការ ៥យ៉ាង របស់ក្រសួងផងដែរ ដើម្បីដោះស្រាយបញ្ហានេះ។

លោក បានសង្កត់ធ្ងន់ថា «អ្វីដែលជាដំណោះស្រាយដ៏ល្អនិងមានប្រសិទ្ធភាពនោះគឹ យន្តការសហគមន៍កសិកម្មទំនើប ព្រោះថាយន្តការនេះបានជួយសម្របសម្រួលបន្ថយថ្លៃដើមផលិត និងបញ្ហាទីផ្សារជូនប្រជាកសិករ ដ្បិតថាសហគមន៍កសិកម្មទំនើបមានការធានាពីទីផ្សារទុកជាមុន ដើម្បីស្ដារនូវលទ្ធភាពផលិតកម្មរបស់ពួកគាត់ឡើងវិញផងដែរ»៕