(ភ្នំពេញ)៖ នារសៀលថ្ងៃអង្គារ ៣កើត ខែភទ្របទ ឆ្នាំម្សាញ់ សប្តស័ក ពុទ្ធសករាជ ២៥៦៩ ត្រូវនឹងថ្ងៃទី២៦ ខែសីហា ឆ្នាំ២០២៥នេះ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម ដឹកនាំកិច្ចប្រជុំបូកសរុបលទ្ធផលនៃការអនុវត្តកិច្ចលទ្ធកម្មរបស់គណៈកម្មាធិការលទ្ធកម្ម និងអង្គភាពលទ្ធកម្ម រយៈពេល ៨ខែពីខែមករា ដល់ខែសីហា ឆ្នាំ២០២៥ នៅសាលប្រជុំនៃទីស្ដីការក្រសួងធនធានទឹក និងឧតុនិយម។

សូមជម្រាបថា កិច្ចប្រជុំនាពេលនេះ មានវត្តមានចូលរួមពី លោក លោកស្រីជាថ្នាក់ដឹកនាំ និងសមាជិក សមាជិកា នៃគណៈកម្មាធិការលទ្ធកម្ម និងអង្គភាពលទ្ធកម្ម ជាច្រើនរូប។

ក្នុងឱកាសនោះ លោករដ្ឋមន្ត្រី បានវាយតម្លៃខ្ពស់ចំពោះលទ្ធផលនៃការអនុវត្តកិច្ចលទ្ធកម្មរយៈពេល៨ខែនេះ ហើយបានណែនាំដល់ក្រុមការងារត្រូវបន្តពង្រឹងការអនុវត្តកិច្ចលទ្ធកម្មទៅតាមច្បាប់ស្ដីពីលទ្ធកម្មសាធារណៈ ដើម្បីឱ្យការដឹកនាំ និងការអនុវត្តលទ្ធកម្មសាធារណៈ ក្នុងការទិញទំនិញ ការសាងសង់ ឬការជួសជុល និងការជួលសេវាកម្ម សម្រាប់បំពេញតម្រូវការប្រើប្រាស់របស់ក្រសួង ប្រកបដោយតម្លាភាព គណនេយ្យភាព សុចរិតភាព ការសន្សំសំចៃ និងភាពទាន់ពេល៕