(កំពង់ធំ)៖ នៅក្នុងឱកាសដែលលោក និងសហការី បានអញ្ជើញជួបសំណេះសំណាលសួរសុខទុក្ខ និងចែកអំណោយជូនគ្រួសារងាយរកហានិភ័យចំនួន ៥០គ្រួសារ នៅក្នុងឃុំចំណាលើ ស្រុកស្ទោង ខេត្តកំពង់ធំ កាលពីរសៀលថ្ងៃទី២៦ ខែសីហា ឆ្នាំ២០២៥នេះ លោក សាយ គឹមឡម អភិបាលស្រុកស្ទោង ខេត្តកំពង់ធំ បានលើកទឹកចិត្តឱ្យអាជ្ញាធរឃុំ ត្រូវអភិវឌ្ឍន៍មូលដ្ឋានរបស់ខ្លួន ឱ្យទន្ទឹមនឹងសុខុមាលភាពរបស់ប្រជាពលរដ្ឋ។

លោកអភិបាលស្រុកបានបន្ថែមថា ការអភិវឌ្ឍមូលដ្ឋាន ជាមួយនឹងការកសាងនូវហេដ្ឋារចនាសម្ព័ន្ធប្រព័ន្ធធារាសាស្ត្រ ផ្លូវគមនាគមន៍ និងសំណង់អគារផ្សេងៗ ជាតម្រូវការចាំបាច់របស់ប្រជាពលរដ្ឋជារឿងមួយដែលសំខាន់ហើយមិនភ្លេចត្រូវនូវសុខទុក្ខសុខុមាលភាព និងការរស់នៅប្រកបដោយសុខក្សេមក្សាន្តរបស់ប្រជាពលរដ្ឋ ស្របតាមយុទ្ធសាស្ត្ររាជរដ្ឋាភិបាលអាណត្តិទី៧ ក្រោមការដឹកនាំដ៏ឆ្លាតវៃរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។

ក្នុងនេះលោកបានកោតសរសើរខ្ពស់ដល់អាជ្ញាធរឃុំចំណាលើ ដែលបាននឹងតែងតែគិតគូរយកចិត្តទុកដាក់ខ្ពស់លើសុខទុក្ខ ការរស់នៅរបស់ប្រជាពលរដ្ឋកន្លងមក ក៏ដូចជាការរៀបចំនូវការចែកនូវគ្រឿងឧបភោគបរិភោគ និងសម្ភារប្រើប្រាស់ ជូនពុកម៉ែបងប្អូនដែលងាយរងហានិភ័យ ជាពិសេសត្រូវបន្តកិច្ចការនេះប្រកបដោយនិរន្តរភាព ហើយនៅជាមួយនឹងប្រជាពលរដ្ឋគ្រប់កាលៈទេសៈ។

លើសពីនេះលោកបានអំពាវនាវដល់ពុកម៉ែបងប្អូនប្រជាពលរដ្ឋក្នុងមូលដ្ឋានត្រូវនាំគ្នាមានស្មារតីជាតិនិយមឱ្យបានខ្ពស់បំផុត ត្រូវប្រឆាំងដាច់ខាតនូវការបង្កសង្គ្រាមឈ្លានពានរបស់ថៃ មកលើព្រះរាជាណាចក្រកម្ពុជា ហើយគាំទ្រពេញទំហឹងនូវយុទ្ធសាស្ត្រ និងការដោះស្រាយប្រកបដោយសន្តិវិធីនិង ឈរលើគោលការណ៍ច្បាប់អន្តរជាតិជាធរមាន ប្រកបដោយភាពឈ្លាសវៃបំផុតរបស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា។

សូមបញ្ជាក់ថា នៅក្នុងឱកាសនេះ ពុកម៉ែបងប្អូនទាំង៥០នាក់ ក្នុង១នាក់ទទួលបានអង្ករ១បេ មុង១ ប្រេងឆា១ដប មី១កេស ត្រីខ១យួរ តង់១ ដែលជាថវិកាមូលនិធិឃុំឆ្នាំ២០២៥៕