គណៈកម្មការអនុសញ្ញាអូតាវ៉ា ទទួលយកការបំភ្លឺរបស់កម្ពុជា ដោយបានច្រានចោលការចោទប្រកាន់របស់ថៃលើការដាក់មីនថ្មី (Video inside)
26-08-2025 20:24
(ភ្នំពេញ)៖ អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ លោក ជុំ សុន្ទរី បានឱ្យដឹងថា តំណាងកម្ពុជានៅអង្គការសហប្រជាជាតិ បានសរសេរលិខិតបំភ្លឺចំពោះប្រធានអនុសញ្ញាអូតាវ៉ា ពាក់ព័ន្ធនឹងការចោទប្រកាន់របស់ថៃជុំវិញការចោទប្រកាន់ថាកម្ពុជា បានដាក់មីនថ្មី។ ខណៈដែលអង្គការដោះមីនអន្តរជាតិដូចជា APOPO និង HALO TRUST ក៏បានអះអាងពីគ្រាប់មីនទាំងនោះថាជាមីនចាស់ដែលសល់តាំងពីអតីតកាល ពុំមែនជាមីនថ្មីឡើយ។
អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានបានបញ្ជាក់ក្នុងសន្នីសីទសារព័ត៌មាននៅល្ងាចថ្ងៃទី២៦ ខែសីហា នេះថា ក្រោយពីថៃបានចោទប្រកាន់ជាបន្តបន្ទាប់លើកម្ពុជា ដែលថាបានដាក់មីនថ្មីនោះ កម្ពុជាបានប្រើមធ្យោបាយការទូតទៅកាន់ប្រធានអនុសញ្ញាហាមឃាត់មីនប្រឆាំងមនុស្សតែម្ដង ដើម្បីបញ្ជាក់ពីជំហររបស់ខ្លួន ទាំងការដាក់លិខិតទៅផ្ទាល់ និងប្រជុំបកស្រាយនៅថ្ងៃទី២១ ខែសីហា ដោយកម្ពុជាបានច្រានចោលការចោទប្រកាន់របស់ថៃ និងបានហៅការចោទប្រកាន់នោះថាគ្មានមូលដ្ឋាន ក្រោមហេតុផលនយោបាយ ហើយខ្វះនូវសំអាងដែលមិនអាចទុកចិត្តបាន និងជាការប៉ុនប៉ងបង្ខូចកម្ពុជា។
អ្នកនាំពាក្យក្រសួងការបរទេស បានបញ្ជាក់ថា៖ «ឯកអគ្គរាជទូត និងជាតំណាងអចិន្ត្រៃយ៍របស់កម្ពុជា ប្រចាំនៅការិយាល័យអង្គការសហប្រជាជាតិ ហើយនឹងអង្គការអន្តរជាតិនានា នៅទីក្រុងហ្សឺហ្សែវ បានសរសេរលិខិតមួយច្បាប់ ចុះថ្ងៃទី២១ ខែសីហា ឆ្នាំ២០២៥ ជូនឯកអគ្គរដ្ឋទូតជប៉ុន និងជាប្រធាននៃកិច្ចប្រជុំលើកទី២២ របស់រដ្ឋភាគីនៃអនុសញ្ញាហាមឃាត់មីនប្រឆាំងមនុស្ស (អនុញ្ញាអូតាវ៉ា)»។
ជាមួយគ្នានេះដែរ អ្នកនាំពាក្យក្រសួងការបរទេស បានបន្តថា លោកបណ្ឌិត លី ធុជ អនុប្រធានទី១ អាជ្ញាធរមីន ក៏បានជួបប្រជុំតាមប្រព័ន្ធអ៉ីនធឺណែត នៅថ្ងៃទី២២ ខែសីហា ឆ្នាំ២០២៥ ជាមួយនឹងប្រធានអានុញ្ញាអូរតាវ៉ា ហើយនៅក្នុងលិខិត និងកិច្ចប្រជុំ កម្ពុជា គឺសូមបដិសេធយ៉ាងដាច់អហង្ការ នូវការចោទប្រកាន់របស់ថៃ អំពីការដាក់មីនថ្មីប្រឆាំងមនុស្ស នៅតាមបណ្តោយព្រំដែនកម្ពុជា-ថៃ ហើយបានហៅការចោទប្រកាន់នោះថា គ្មានមូលដ្ឋាន មានហេតុផលនយោបាយ និងខ្វះនូវសំអាងដែលអាចឱ្យជឿទុកចិត្តបាន។ ចំណុចនេះ គឺជាការប៉ុនប៉ង់ ដើម្បីបង្ខូចករ្តិ៍របស់កម្ពុជា នៅលើឆាកអន្តរជាតិ។
អ្នកនាំពាក្យក្រសួងការបរទេស បានបន្ថែមថា កម្ពុជា សូមអះអាងជាថ្មីម្តងទៀត នូវការគោរពដល់ពេញលេញរបស់ខ្លួន ចំពោះអនុញ្ញាអូរតាវ៉ា និងសូមបញ្ជាក់ថាកម្ពុជា មិនបានផលិត និងប្រើប្រាស់ ឬក៏ដាក់មីនថ្មី តាំងពីកម្ពុជាបានក្លាយជារដ្ឋភាគីនៃសមាជិក អនុញ្ញាអូតាវ៉ា នៅឆ្នាំ២០០០។ លោកក៏បានលើកឡើងពីសំអាងដែលអង្គការដោះមីនអន្តរជាតិដូចជា APOPO និង HALO TRUST ក៏បានអះអាងពីគ្រាប់មីនទាំងនោះថាជាមីនចាស់ដែលសល់តាំងពីអតីតកាល ពុំមែនជាមីនថ្មីឡើយ។
គណៈកម្មការអនុសញ្ញាអូតាវ៉ា បានកត់សម្គាល់ការឆ្លើយតបរបស់កម្ពុជា ដោយបានច្រានចោលការចោទប្រកាន់របស់ថៃលើការដាក់មីនថ្មី និងលើកទឹកចិត្តដល់កម្ពុជា និងថៃបន្តកិច្ចសន្ទនា កាត់បន្ថយភាពតានតឹងប្រកាន់ខ្ទាប់នូវបទឈប់បាញ់ និងបន្តជំរុញសកម្មភាពមីនមនុស្សធម៌។
សូមជម្រាបផងដែរថាប្រធានអនុសញ្ញាអូតាវ៉ា ហើយនឹងសមាជិកបានធ្វើការកត់ត្រានូវការបំភ្លឺរបស់កម្ពុជាហើយក៏បានទទួលស្គាល់នូវការរួមចំណែកដ៏យូរអង្វែងរបស់កម្ពុជាក្នុងសកម្មភាពមីន។ បន្ទាប់ពីដើរល្បាតជាន់មីនដាច់ជើងជាបន្តបន្ទាប់ថៃ បានទម្លាក់កំហុសពីការដាច់ជើងរបស់ទាហានខ្លួនថាជាន់មីនដែលទាហានកម្ពុជាលួចចូលដាក់ក្នុងដីថៃ រហូតបង្កើតរូបភាពជាច្រើនដើម្បីចោទប្រកាន់កម្ពុជាផងដែរ។ ទោះជាយ៉ាងណាកម្ពុជាបានធ្វើការបដិសេធជាបន្តបន្ទាប់ចំពោះការចោទប្រកាន់ទាំងនេះ៕
