(ភ្នំពេញ)៖ ដើម្បីតបស្នងដល់ពលរដ្ឋ ដែលជាម្ចាស់ឆ្នោត លោក ឃួង ស្រេង សមាជិកគណៈកម្មាធិការកណ្តាលគណបក្សប្រជាជនកម្ពុជា និងជាប្រធានគណៈកម្មាធិការគណបក្សប្រជាជនកម្ពុជារាជធានីភ្នំពេញ បានធ្វើការណែនាំឱ្យសមាជិក-សមាជិកាគណបក្ស ខិតខំបម្រើប្រជាពលរដ្ឋឱ្យបានទ្វេដង ដើម្បីឱ្យប្រជាពលរដ្ឋ បន្តបោះឆ្នោតឱ្យគណបក្សប្រជាជនកម្ពុជា យកជ័យជំនះនៅក្នុងការបោះឆ្នោតនាឆ្នាំ២០២៧-២០២៨ បន្តទៀត។

ការណែនាំបែបនេះរបស់លោក ឃួង ស្រេង បានធ្វើឡើងក្នុងពិធីសំណេះសំណាលជាមួយសមាជិក សមាជិកា គណៈកម្មាធិការគណបក្ស សង្កាត់បឹងរាំង ខណ្ឌដូនពេញ ក្រោយចប់ម៉ោងរដ្ឋបាល នាម៉ោង៥និង៣០នាទី ល្ងាចថ្ងៃទី២៦ ខែសីហា ឆ្នាំ២០២៥ នៅទីស្នាក់ការគណបក្សប្រជាជនកម្ពុជាខណ្ឌដូនពេញ។

លោក ឃួង ស្រេង បានលើកឡើងថា នៅគ្រប់ការបោះឆ្នោត ពោលគឺទាំងការបោះឆ្នោតក្រុមប្រឹក្សា ឃុំ សង្កាត់ ការបោះឆ្នោតតំណាងរាស្រ្ត ការបោះឆ្នោតក្រុមប្រឹក្សាខណ្ឌ ក្រុមប្រឹក្សារាជធានីភ្នំពេញ គណបក្សប្រជាជនកម្ពុជា តែងទទួលបាននូវជោគជ័យយ៉ាងភ្លូកទឹកភ្លូកដី ជាប្រវត្តិសាស្ត្រ ហើយនៅពេលនេះ គណបក្សប្រជាជនកម្ពុជា ទទួលបានជ័យជំនះ ដោយសង្កាត់ទាំង១០៥ នៅរាជធានីភ្នំពេញ សុទ្ធតែជាចៅសង្កាត់ មកពីគណបក្សប្រជាជនកម្ពុជា។

ដូច្នេះដើម្បីតបស្នងដល់ប្រជាពលរដ្ឋ ដែលជាម្ចាស់ឆ្នោត លោកណែនាំឱ្យសមាជិក-សមាជិកា គណៈកម្មាធិការគណបក្ស សង្កាត់បឹងរាំងក៏ដូចជាសមាជិក សមាជិកាផ្សេងទៀត ត្រូវខិតខំបម្រើប្រជាពលរដ្ឋឱ្យបានទ្វេដង ដើម្បីឱ្យប្រជាពលរដ្ឋ កាន់តែមានជំនឿជឿជាក់មកលើការដឹកនាំ របស់សម្តេចធិបតី ហ៊ុន ម៉ាណែត នាយកដ្ឋមន្ត្រី ដើម្បីបន្តបោះឆ្នោតឱ្យគណបក្សប្រជាជនកម្ពុជា យកជ័យជំនះនៅក្នុងការបោះឆ្នោត នាឆ្នាំ២០២៧-២០២៨បន្តទៀត ដែលនឹងនាំឱ្យកម្ពុជាឆ្ពោះទៅរកការរីកចម្រើន យ៉ាងពិតប្រាកដ នៅឆ្នាំ២០៥០ក្លាយជាប្រទេសអ្នកមាន ដូចអរិយប្រទេស ស្របទៅតាមបំណងប្រាថ្នាចង់បានរបស់ប្រជាពលរដ្ឋលើសាកលលោក។

ក្នុងឱកាសនោះដែរ លោក ឃួង ស្រេង ក៏បានថ្លែងនូវការកោតសរសើ និងវាយតម្លៃខ្ពស់ ចំពោះលទ្ធផលស្នាដៃរបស់គណៈកម្មាធិការគណបក្ស សង្កាត់បឹងរាំង ដែលបានចូលរួមចំណែក ធ្វើឱ្យគណបក្សទទួលបាននូវជ័យជម្នះ ក្នុងការបោះឆ្នោតជាបន្តបន្ទាប់ នាពេលកន្លងមក រហូតធ្វើឱ្យគណបក្សប្រជាជនកម្ពុជា ទទួលបាននូវជោគជ័យយ៉ាងភ្លុកទឹកភ្លុកដី ជាប្រវត្តិសាស្ត្រ។

លោក ឃួង ស្រេង បានគូសបញ្ជាក់ថា ការជួបជុំគ្នានេះ គឺដើម្បីពិភាក្សា ពិគ្រោះយោបល់ រកចំណុចខ្លាំង ចំណុចខ្សោយ ធ្វើយ៉ាងណា ឱ្យគណបក្សប្រជាជនកម្ពុជា សម្រេចបានមហិច្ចតារបស់គណបក្ស គឺដឹកនាំប្រទេសជារៀងរហូត។

លោក ឃួង ស្រេង សូមឱ្យមន្ត្រីបន្តការផ្តល់សេវាជូនប្រជាពលរដ្ឋឱ្យកាន់តែល្អថែមទៀត ជាមួយនិងការបន្តអូសទាញក្រុមបក្សប្រឆាំង ឱ្យចូលមករួមរស់នៅជាមួយបក្សរបស់យើង ដោយចាត់ទុកពួកគាត់ឱ្យដូចជា សមាជិក សមាជិកាគណបក្សប្រជាជនកម្ពុជាដូចគ្នា។ ត្រូវសាមគ្គីផ្ទៃក្នុងឱ្យបានកាន់តែល្អនិងរឹងមាំ ដោយគិតផលប្រយោជន៍បក្សជារឿងសំខាន់។

លោក ឃួង ស្រេង បានលើកឡើងថា ក្នុងពេលថ្មីៗនេះ នៅពេលកងទ័ពថៃឈ្លានពាន សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត បានបញ្ចេញនូវសក្តានុពល បង្ហាញឱ្យឃើញពីការយកចិត្តទុកដាក់ និងឧត្តមភាព ក្នុងកិច្ចការការពារបូរណភាពទឹកដី ។ កម្ពុជាយើងកន្លង បានឈ្នះទាំងលើសមរភូមិប្រយុទ្ធ និងសមរភូមិការទូត។ កងទ័ពថៃបានបំពានកម្ពុជា ក្រោយបទឈប់បាញ់ ដោយធ្វើការរាយបន្លាលួស ដាក់កង់ឡាន ជាការបង្ហាញឥទ្ធិពលនៃការឈ្លានពានយ៉ាងពិតប្រាកដ តែកម្ពុជានៅតែបន្ត ភាពអត់ធ្មត់ ទុកឱ្យក្រុមអ្នកសង្កេតការណ៌ និងអន្តរជាតិ បានឃើញការពិត ដែលថៃធ្វើមកលើកម្ពុជា៕