(កំពង់ចាម)៖ លោក អ៊ុច បូររិទ្ធ អនុប្រធានទី១ ព្រឹទ្ធសភា និងជាប្រធានក្រុម សមាជិកព្រឹទ្ធសភាប្រចាំភូមិភាគ២ (កំពង់ចាម-ត្បូងឃ្មុំ) នៅរសៀលថ្ងៃទី២៦ ខែសីហា ឆ្នាំ២០២៥ រួមជាមួយថ្នាក់ដឹកនាំខេត្តកំពង់ចាម បានអញ្ជើញសំណេះសំណាលជាមួយមន្រ្តីរាជការ និងប្រជាពលរដ្ឋ ចំនួន៤១៨នាក់ នៅក្នុងបរិវេណសាលាស្រុកព្រៃឈរ។

នាឱកាសនោះ លោកប្រធានក្រុមភូមិភាគទី២ បានពាំនាំនូវប្រសាសន៍ផ្តាំផ្ញើសួរសុខទុក្ខពីសំណាក់សម្តេចតេជោ ប្រធានព្រឹទ្ធសភា និងសម្តេចកិត្តិព្រឹទ្ធបណ្ឌិត និងបានរំលឹកអំពីមូលហេតុ និងសភាពការណ៍វិវត្តថ្មីៗ នៅតាមបណ្តោយព្រំប្រទល់ជាមួយប្រទេសថៃ ធ្វើការផ្សព្វផ្សាយដល់មន្ត្រីរាជការ និងប្រជាពលរដ្ឋ នៅក្នុងស្រុកព្រៃឈរឱ្យបានជ្រាបផងដែរ។

លោក អ៊ុច បូររិទ្ធ បានថ្លែងថា ក្នុងកាលៈទេសៈដែលប្រទេសជាតិកំពុងប្រឈម នឹងការឈ្លានពានពីបរទេស សូមបងប្អូនប្រជាពលរដ្ឋទាំងអស់ នៅក្នុងមូលដ្ឋាន ទុកចិត្តនឹងជឿជាក់ចំពោះថ្នាកដឹកនាំយើង ដែលមានសម្តេចតេជោ ហ៊ុន សែន ប្រធានព្រឹទ្ធសភា និងសម្តេចធិបតី ហ៊ុន ម៉ាណែត នាយករដ្ឋមន្រ្តី ក្នុងការដោះស្រាយបញ្ហាព្រំដែន និងការការពារបូរណភាពទឹកដី និងសូមកុំជឿតាមក្រុមជ្រុលនិយមមួយក្តាប់តូច ដែលតែងតែញុះញង់ប្រជាពលរដ្ឋ បំបាក់ស្មារតីកងទ័ព គប់គិតនិងបិទបាំងអំពើឈ្លានពានរបស់បរទេស បកស្រាយព្រឹត្តិការណ៍ខុសស្រឡះពីការពិត និងធ្វើសកម្មភាពប៉ះពាល់យ៉ាងធ្ងន់ធ្ងរដល់ផលប្រយោជន៍ជាតិ និងប្រជាពលរដ្ឋ។

លោក អ៊ុច បូររិទ្ធ ក៏បានលើកឡើង អំពីវីរភាពដ៏អង់អាចក្លាហានមោះមុតរបស់វីរ:យុទ្ធជនយើង ដែលបាននិងកំពុងលះបង់កម្លាំងកាយចិត្ត បូជាអាយុជីវិត តស៊ូ អត់ធ្មត់ ក្រាញននៀល ក្នុងការការពារជាតិមាតុភូមិ និងស្មារតីស្នេហាជាតិរបស់បងប្អូនជនរួមជាតិទាំងក្នុង និងក្រៅប្រទេស ដែលបានស្តែងឱ្យឃើញនូវកម្លាំងមហាសាមគ្គីឯកភាពជាតិជាធ្លុងមួយ ដើម្បីបុព្វហេតុជាតិមាតុភូមិនៃយើង៕