(ប៉េកាំង)៖ ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រនៃកម្ពុជា និងសម្ដេចព្រះមហាក្សត្រី នរោត្ដម មុនិនាថ សីហនុ ព្រះវររាជមាតាជាតិខ្មែរ កាលពីថ្ងៃទី២៦ ខែសីហា ឆ្នាំ២០២៥ បានយាងជួបសវនាការជាមួយ លោកប្រធានាធិបតីចិន ស៊ី ជិនពីង និងជំទាវទី១របស់ចិន លោកស្រី Peng Liyuan។

តាមបណ្តាញសង្គម លោកស្រី Mao Ning អ្នកនាំពាក្យក្រសួងការបរទេសចិន​ ដែលបានបង្ហោះរូបភាពជំនួបនេះ បានចាត់ទុកថា សវនាការនេះមានសារសំខាន់សម្រាប់ប្រទេសចិន និងកម្ពុជាក្នុងការឈរយ៉ាងរឹងមាំជាមួយគ្នាដើម្បីជម្នះការរំខាន និងរួមដៃគ្នាក្នុងការពន្លឿនការកសាងសហគមន៍ចិន-កម្ពុជាគ្រប់កាលៈទេសៈជាមួយនឹងអនាគតរួមគ្នាក្នុងយុគសម័យថ្មី ដើម្បីផ្តល់ផលប្រយោជន៍កាន់តែច្រើនដល់ប្រជាជនទាំងពីរ។

សូមបញ្ជាក់ថា ព្រះករុណា ព្រះបាទ សម្តេចព្រះបរមនាថ នរោត្តម សីហមុនី ព្រះមហាក្សត្រកម្ពុជា និងសម្តេចព្រះមហាក្សត្រី ព្រះវររាជមាតាជាតិខ្មែរ ទ្រង់ទាំងទ្វេ បានយាងទៅទីក្រុងប៉េកាំង ប្រទេសចិន ដើម្បីពិនិត្យព្រះរាជសុខភាព ចាប់ពី ថ្ងៃទី២៦ ខែសីហា។ អំឡុងពេលអវត្តមានរបស់ព្រះអង្គពីមាតុប្រទេស សម្តេច ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ នឹងទទួលជួយព្រះករុណា ក្នុងឋានៈជាប្រមុខរដ្ឋស្តីទី៕