(កណ្ដាល)៖ សម្ដេចព្រះមង្គលទេពាចារ្យ វង្ស អានេតា សម្តេចព្រះសង្ឃនាយករង នៃគណៈធម្មយុត្តិកនិកាយនៃព្រះរាជាណាចក្រកម្ពុជា ព្រះមេគណគណៈធម្មយុត្តិកនិកាយខេត្តកណ្តាល និងជាព្រះសាកលវិទ្យាធិការ សាកលវិទ្យាល័យ សម្តេចព្រះមហាសង្ឃរាជ បួរ គ្រី នាពេលថ្មីៗនេះ បានរៀបចំកម្មវិធីបុណ្យទក្ខិណានុប្បទាន ឧទ្ទិសមហាកុសលជូនដល់វិញ្ញាណក្ខន្ធវីរកងទ័ពដែលបានពលីការពារបូរណភាពទឹកដី និងពិធីបុណ្យផ្កាប្រាក់ មហាសាមគ្គី ជួយឧបត្ថម្ភដល់វីរកងទ័ពកំពុងឈរជើងនៅសរភូមិមុខ និងពិធីរាប់បាត្រព្រះសង្ឃចំនួន ១៦០អង្គ នៅវត្តព្រះឥន្ទសាមគ្គីធម៌ ក្នុងភូមិត្រពាំងក្រពើ ឃុំក្រាំងម្កាក់ ស្រុកអង្គស្នួល ខេត្តកណ្តាល។

សម្ដេចព្រះមង្គលទេពាចារ្យ វង្ស អានេតា បានមានសង្ឃដីកា កោតសរសើរដល់វីរភាពដ៏អង់អាចក្លាហានរបស់កងទ័ពខ្មែរដែលបានពលី និងតស៊ូស្វិតស្វាញទប់ទល់សត្រូវឈ្លានពានមិនឲ្យបាត់បង់ទឹកដីឡើយ ហើយក៏អំពាវនាវ ពុទ្ធបរិស័ទ មេត្តាជួយរៃអង្គាសបច្ច័យ ដើម្បីទិញគ្រឿងឧបភោគ បរិភោគ ជួយដល់វីរកងទ័ព ដែលកំពុងឈរជើងការពារបូរណភាពទឹកដីកម្ពុជានៅព្រំដែនផងដែរ។

សូមជម្រាបថា នាពេលកន្លងទៅ សម្ដេចព្រះមង្គលទេពាចារ្យ វង្ស អានេតា ក៏ធ្លាប់បាននាំយកស្បៀងអាហារចែកជូនដល់វីរកងទ័ព និងជួយដល់ពលរដ្ឋភៀសសឹកផងដែរ៕