(ព្រុចសែល)៖ អង្គការអ្នកប្រជាធិបតេយ្យនិយមកណ្តាលអន្តរជាតិ (IDC-CDI) នៅថ្ងៃទី២៧ ខែកក្កដា ឆ្នាំ២០២៥នេះ បានអំពាវនាវឲ្យការអនុវត្តបទឈប់បាញ់រវាងកម្ពុជា-ថៃ ប្រព្រឹត្តទៅពេញលេញ និងមានប្រសិទ្ធភាព បញ្ចៀសការផ្ទុះអាវុធដែលនាំឲ្យខាតបង់ដល់ប្រទេសទាំងពីរ។

ក្នុងការរក្សាសាមគ្គីភាព កិច្ចសហប្រតិបត្តិការ និងឯកភាពក្នុងភាពចម្រុះ ជាមួយចក្ខុវិស័យក្នុងការបង្កើតសហគមន៍សកលនៃសន្តិភាព ស្ថិរភាព មិត្តភាព សាមគ្គីភាព និងសហវិបុលភាព ជាមួយនឹងការគោរពច្បាប់ និងបទដ្ឋានអន្តរជាតិ អង្គការអ្នកប្រជាធិបតេយ្យនិយមកណ្តាលអន្តរជាតិ (IDC-CDI) បានស្នើនូវចំណុចសំខាន់ៗចំនួន៣ រួមមាន៖

ទី១៖ រំលឹកឡើងវិញ ដល់ការបង្កើតសមាគម IDC-CDI ដែលបានចុះហត្ថលេខានៅថ្ងៃទី១ ខែតុលា ឆ្នាំ ២០២០ ដែលបញ្ជាក់ច្បាស់លាស់អំពីបេសកកម្មយ៉ាងសំខាន់ក្នុងការផ្សព្វផ្សាយអំពីសិទ្ធិសេរីភាព សិទ្ធិនិងសេចក្តីថ្លៃថ្នូរមនុស្សជាតិ គុណតម្លៃប្រជាធិបតេយ្យ ការអភិវឌ្ឍមនុស្សជាតិដោយចីរភាព ដើម្បីឆ្លើយតបទៅនឹងតម្រូវការសេដ្ឋកិច្ច វប្បធម៌ និងស្មារតីរបស់ប្រជាជន គុណតម្លៃស្នូលនៃ មនុស្សជាតិ នីតិរដ្ឋ និងយុត្តិធម៌ ស្របពេលដែលបដិសេធនូវភាពជ្រុលនិយម អំពើហិង្សា និងការ បោកបញ្ឆោតគ្រប់រូបភាព

ទី២៖ អនុលោម តាមគោលការណ៍ និងគោលបំណងនៃធម្មនុញ្ញអង្គការសហប្រជាជាតិ ធម្មនុញ្ញនៃ សមាគមប្រជាជាតិអាស៊ីអាគ្នេយ៍ (អាស៊ាន) សន្ធិសញ្ញាមិត្តភាពនិងសហប្រតិបត្តិការអាស៊ីអាគ្នេយ៍ (TAC) រាល់កិច្ចព្រមព្រៀង និងសន្ធិសញ្ញាដែលទទួលស្គាល់នៅកម្រិតអន្តរជាតិ និងច្បាប់មនុស្សធម៌ អន្តរជាតិ និង

ទី៣៖ សម្តែងការព្រួយបារម្ភយ៉ាងខ្លាំង ចំពោះជម្លោះព្រំដែនរវាងកម្ពុជានិងថៃថ្មីៗនេះដែលបង្កឱ្យមាន ការបាត់បង់ជីវិត បញ្ហាប្រឈមផ្នែកមនុស្សធម៌នៃការជម្លៀសប្រជាជនស៊ីវិលនៅក្នុងប្រទេសទាំងពីរ ភាពផុយស្រួយដោយសារការគំរាមកំហែងនៃការឈ្លានពានប្រដាប់អាវុធលើបទឈប់បាញ់ ដែល សម្រេចបាននៅថ្ងៃទី២៨ ខែកក្កដា ឆ្នាំ២០២៥ ដោយមានការសម្របសម្រួលពីនាយករដ្ឋមន្ត្រី ម៉ាឡេស៊ី Anwar Ibrahim និងមានការចូលរួមពីនាយករដ្ឋមន្ត្រីនៃព្រះរាជាណាចក្រកម្ពុជា និងនាយករដ្ឋមន្ត្រីស្តីទីនៃព្រះរាជាណាចក្រថៃ ដោយមានចិន និងអាមេរិកជាសាក្សី។

ហេតុដូច្នេះ ដើម្បីពង្រឹងនិងពង្រីកអនុភាពនៃកម្លាំង និងបណ្តាញទូលំទូលាយ ក្នុងនាមជាអង្គការចម្រុះ ពហុវិន័យ សមាគមនិងសង្គមស៊ីវិលមកពីបណ្តាទ្វីបផ្សេងៗ សូមអំពាវនាវ និងលើកទឹកចិត្តដោយ៖

ទី១៖ អំពាវនាវឱ្យភាគីទាំងពីរបង្ហាញឆន្ទៈ និងការប្តេជ្ញាចិត្តពិតប្រាកដក្នុងការអនុវត្តបទឈប់បាញ់ ដែល មានចែងនៅក្នុងកិច្ចព្រមព្រៀងទាំង ១៣ ចំណុច ដែលជាលទ្ធផលនៃកិច្ចប្រជុំពិសេសនៃគណៈ កម្មាធិការជម្លោះព្រំដែន (GBC) កាលពីថ្ងៃទី៧ ខែសីហា ឆ្នាំ២០២៥ នៅទីក្រុងកូឡាឡាំពួ ប្រទេស ម៉ាឡេស៊ី

ទី២៖ អំពាវនាវឱ្យមហាអំណាចតំបន់និងសកល ភាគីពាក់ព័ន្ធ បេសកកម្មសង្កេតការណ៍ការអនុវត្តបទ ឈប់បាញ់ រួមទាំងការបង្កើតក្រុមអ្នកអង្កេតអាស៊ាន (AOT) ដើម្បីចូលរួម និងរួមចំណែកយ៉ាងសកម្ម ក្នុងដំណើរការអនុវត្តបទឈប់បាញ់ ជាកាតាលីករដ៏សំខាន់ក្នុងការធានាឱ្យបាននូវយុត្តិធម៌ និង សន្តិភាពប្រកបដោយចីរភាព

ទី៣៖ អំពាវនាវដោយទទូចឱ្យភាគីទាំងពីរប្រើប្រាស់មធ្យោបាយទ្វេភាគី និងពហុភាគី ក្នុងកិច្ចចរចារសន្តិភាព ដើម្បីទប់ស្កាត់ការកើនឡើងនៃភាពតានតឹងនិងការប្រឈមមុខគ្នា ហើយងាកមកស្វែងរកដំណោះ ស្រាយជម្លោះព្រំដែនដោយគោរពតាមច្បាប់ និងបទដ្ឋានអន្តរជាតិ រួមទាំងកិច្ចព្រមព្រៀងបារាំង-សៀម ឆ្នាំ១៩០៤ និងឆ្នាំ១៩០៧ ឯកសារលទ្ធផលនៃគណៈកម្មាធិការព្រំដែនបារាំង-សៀម និង អនុស្សរណៈយោគយល់ឆ្នាំ២០០០

ទី៤៖ លើកទឹកចិត្ត ឱ្យភាគីទាំងពីររក្សានូវស្មារតីនៃមជ្ឈភាពអាស៊ាន ឯកភាព និងភាពជាអ្នកជិតខាងល្អ ក្នុងដំណើរការស្វែងរកដំណោះស្រាយសន្តិភាព ឈ្នះ-ឈ្នះ និងយុត្តិធម៌សម្រាប់គ្រប់គ្នា៕