(ភ្នំពេញ)៖ លោកណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានឱ្យដឹងថា នៅក្នុងឆមាសទី១ ឆ្នាំ២០២៥ មានក្រុមហ៊ុន និងរោងចក្រចំនួន៥២ ត្រូវបានក្រសួងបរិស្ថាន ផាកពិន័យ បញ្ជាឱ្យកែប្រែ និងខ្លះទៀតត្រូវបានផ្អាកដំណើរការទាំងស្រុងតែម្ដង ក្រោយរកឃើញក្រុមហ៊ុនទាំងនោះបញ្ចេញសំណល់ធ្វើឱ្យប៉ះពាល់ដល់បរិស្ថាន។

ថ្លែងប្រាប់ក្រុមអ្នកសារព័ត៌មាននៅព្រឹកថ្ងៃទី២៧ ខែសីហា ឆ្នាំ២០២៥នេះ លោកបណ្ឌិត អ៊ាង សុផល្លែត បានឱ្យដឹងថា៖ «ក្រុមហ៊ុនចំនួន៥២ ត្រូវបានក្រសួងផាកពិន័យ ហើយក្រុមហ៊ុនខ្លះដែលបំពុលខ្លាំងយើងបានឱ្យគាត់សងសំណង់ សំអាតទឹកអោយស្អាតវិញធ្ងន់តែម្តងអត់លើកលែងទេ ឱ្យធ្ងន់ជាទីបំផុតដើម្បីឱ្យក្រុមហ៊ុនដទៃទៀតកុំធ្វើតាម តែធ្វើតាមផាក ឱ្យសំណឱ្យធ្ងន់»។

បើតាមរដ្ឋមន្ត្រី្កក្រសួងបរិស្ថាន បានបញ្ជាក់ថា ការសងសំណងដើម្បីយកលុយទេ គឺដើម្បីកុំឱ្យធ្វើទៅទៀត តែក្រុមហ៊ុនធ្វើទៅទៀតប្រភពទឹកស្អាតរបស់យើងមិនស្អាតទេ សុខភាពប្រជាជនរងគ្រោះ។ ឧទាហរណ៍ បើទឹកបំពុលតែ១លីត្រចូលទឹកស្អាត ប្រជាជនប៉ុន្មាននាក់ទៅឈឺ ព្យាបាលជំងឺអស់ប៉ុន្មាន អាហ្នឹងវាធ្ងន់ធ្ងរណាស់ ហើយបើបាត់បង់ជីវិត ជីវិតថ្លៃជាងអ្វីៗទាំងអស់ គ្មានអ្វីទិញបានទេ ហើយការផាកពិន័យអត់គ្រប់គ្រាន់ទេ។

សូមជម្រាបថា​ មកទល់ពេលនេះ មន្រ្តីជំនាញនៃក្រសួងបរិស្ថាន បានរកឃើញរោងចក្រ ​​សហ​គ្រាស​ ៥២កន្លែង បានបញ្ចេញសំណល់រាវមានជាតិពុល ប៉ះពាល់​ប្រភព​ទឹកសា​ធា​រ​ណៈ​។ រោងចក្រល្មើសទាំងនោះ ត្រូវបានក្រសួងបរិស្ថាន ចាត់​វិធានការ​តាម «ក្រម​បរិស្ថាន និងធនធានធម្មជាតិ»​ ដូចជាពិន័យអន្តរការណ៍, ផ្អាក​ផលិតកម្ម និងតម្រូវឱ្យរោង​ចក្ររៀប​ចំអាងប្រព្រឹត្តកម្មសំណល់រាវតាមស្តង់ដារ មុននឹងឱ្យដំណើរការវិញជាដើម៕