(កំពង់ចាម)៖ អភិបាលខេត្តកំពង់ចាមលោក អ៊ុន ចាន់ដា បានស្នើឱ្យរដ្ឋបាលក្រុងស្រុក ត្រូវពន្លឿនការងារកសាងកម្មវិធីវិនិយោគរបស់ខ្លួន ដើម្បីឱ្យទាន់ពេលវេលាស្របតាមច្បាប់ជាធរមាន និងដើម្បីឱ្យកម្មវិធីវិនិយោគបីឆ្នាំរំកិល របស់រដ្ឋបាលក្រុង-ស្រុក មានសង្គតិភាពជាមួយនឹងកម្មវិធីវិនិយោគបីឆ្នាំរំកិលរបស់រដ្ឋបាលខេត្ត។

លោកអភិបាលខេត្តបានលើកឡើងដូច្នេះ នៅថ្ងៃទី២៧ ខែសីហា ឆ្នាំ២០២៥ នៅមន្ទីរផែនការខេត្ត ក្នុងវេទិកាពិគ្រោះយោបល់ និងផ្សព្វផ្សាយសិក្ខាសាលាសមាហរណកម្មកម្មវិធីវិនិយោគបីឆាំ្នរំកិល ២០២៦-២០២៨ របស់រដ្ឋបាលខេត្ត ក្រុង ស្រុក និងឃុំ សង្កាត់ និងផ្សព្វផ្សាយសៀវភៅផែនការអភិវឌ្ឍន៍រយៈពេលប្រាំឆ្នាំ ២០២៥-២០២៩ របស់រដ្ឋបាលខេត្តកំពង់ចាម។

លោកអភិបាលខេត្ត បានថ្លែងថា ដើម្បីចូលរួមសម្រេចបាននូវយុទ្ធសាស្ត្រ និងកម្មវិធីគោលនយោបាយនានារបស់រាជរដ្ឋាភិបាល រដ្ឋបាលខេត្តកំពង់ចាម បាននឹងកំពុងរៀបចំកម្មវិធីវិនិយោគបីឆ្នាំរំកិល ២០២៦-២០២៨ ដែលជាផែនទីតម្រង់ទិស ក្នុងការអនុវត្តមុខងារ ភារកិច្ចរបស់មន្ទីរ-អង្គភាព និងស្ថាប័នពាក់ព័ន្ធដែលស្ថិតក្នុងដែនសមត្ថកិច្ចរបស់រដ្ឋបាលខេត្ត។

មិនតែប៉ុណ្ណោះរដ្ឋបាលខេត្ត បានខិតខំជំរុញការអភិវឌ្ឍន៍លើកទឹកចិត្តដល់ការវិនិយោគរបស់វិស័យឯកជន និងពង្រីកតំបន់សេដ្ឋកិច្ចពិសេសតាមដងទន្លមេគង្គ ការធ្វើធុរកិច្ច ពាណិជ្ជកម្មតាមប្រព័ន្ធអេឡិចត្រូនិក ប្រព័ន្ធនវានុវត្តន៍ឌីជីថល និងរក្សាស្ថិរភាពម៉ាក្រូសេដ្ឋកិច្ច ដើម្បីចូលរួមសម្រេចបានចក្ខុវិស័យជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ ខេត្តកំពង់ចាម ត្រូវការចំណូលផលិតផលក្នុងស្រុកសរុប ក្នុងរង្វង់ ៥,០០០ លានដុល្លារ ដែលប្រជាជនម្នាក់ៗទទួលបានចំណូលក្នុងរង្វង់ ៤,០០០ដុល្លារក្នុងមួយឆ្នាំ។

អភិបាលខេត្តបានបញ្ជាក់ថា កម្មវិធីវិនិយោគបីឆ្នាំរំកិល២០២៦-២០២៨ របស់រដ្ឋបាលខេត្ត ក្រុង-ស្រុក និងឃុំ-សង្កាត់ គឺជាការអនុវត្តស្របទៅតាមច្បាប់ស្តីពីការគ្រប់គ្រងរបស់រដ្ឋបាលថ្នាក់ក្រោមជាតិ ដែលតម្រូវឱ្យមន្ទីរ អង្គភាព ស្ថាប័នពាក់ព័ន្ធជុំវិញខេត្ត ដៃគូរអភិវឌ្ឍន៍ អង្គការមិនមែនរដ្ឋាភិបាល និងវិស័យឯកជននានា ជួយគាំទ្រគម្រោង សកម្មភាពអាទិភាពរបស់រដ្ឋបាលក្រុង-ស្រុក និងឃុំ-សង្កាត់ ដែលមិនទាន់មានថវិកាគាំទ្រសម្រាប់អនុវត្តក្នុងឆ្នាំ ២០២៦៕