(តាកែវ)៖ បណ្ណសម្គាល់អចលនវត្ថុចំនួនជាង២ពាន់បណ្ណ បានត្រូវបានអភិបាលខេត្តតាកែវ លោក វ៉ី សំណាង យកទៅចែកជូនប្រជាពលរដ្ឋនៅភូមឫស្សីមួយគុម្ព ឃុំអូរសារាយ ស្រុកត្រាំកក់ នៅព្រឹកថ្ងៃទី២៧ ខែសីហា ឆ្នាំ២០២៥នេះ។

នៅឱកាសនោះ លោក វ៉ី សំណាង បានជំរុញ និងរំលឹកទៅដល់ក្រុមការងារបច្ចេកទេសចុះបញ្ជីដីធ្លី ត្រូវសហការជាមួយអាជ្ញាធរមូលដ្ឋាន ពិសេសមន្ទីរពាក់ព័ន្ធ ត្រូវសម្របសម្រួលធ្វើយ៉ាងណាពន្លឿនការងារ ចុះបញ្ជីដីធ្លីមានលក្ខណៈជាប្រព័ន្ធ និងផ្ដល់បណ្ណកម្មសិទ្ធិប្រើប្រាស់ដីធ្លី ជូនប្រជាពលរដ្ឋឲ្យបានលឿនឆាប់រហ័ស ងាយស្រួលប្រជាពលរដ្ឋយកទៅប្រើប្រាស់ តាមតម្រូវការចាំបាច់ផ្សេងៗ។

លោកអភិបាលខេត្តតាកែវ ក៏បានធ្វើការណែនាំដល់ប្រជាពលរដ្ឋ តែទទួលបានបានកម្មសិទ្ធិ សូមធ្វើការត្រឹះរិះពិចារណាឲ្យបានច្បាស់លាស់ មុននឹងយកប្លង់កម្មសិទ្ធិទៅបញ្ចាំនៅធនាគារ ឬគ្រឹះស្ថានហិរញ្ញវត្ថុ ដើម្បីយកប្រាក់មកបង្កើតមុខរបរ ដោយចៀសវាងមានផលវិបាកពេលសងត្រឡប់ទៅធនាគារវិញ។

បើយោងតាម លោក នួន សុធា ប្រធានមន្ទីររៀបចំដែនដី នគររូបនីយកម្ម សំណង់ និងសុរិយោដីខេត្ត បានឲ្យដឹងថា ខេត្តតាកែវ មាន១០ស្រុកក្រុង ១០០ឃុំសង្កាត់ និង១,១២១ភូមិ បានអនុវត្តបញ្ចប់ ចំនួន៣ស្រុក ៧៧ឃុំ ៩៩៦ភូមិ កំពុងអនុវត្តចំនួន១២១ភូមិ ក្នុងនោះឃុំចំនួន២៣ និងនៅសល់៤ភូមិ មិនអាចវាស់វែងបាន២ភូមិ ដោយជាប់ពាក់ព័ន្ធលេខាធិការដ្ឋានកិច្ចការព្រំដែន និងស្ថិតក្នុងគម្របព្រៃឈើឆ្នាំ២០០២ និងមានក្រុមចុះបញ្ជីសរុបចំនួន១០ក្រុម សរុបចំនួន២៣៥នាក់ ក្នុងនោះមន្ដ្រីក្របខណ្ឌមន្ទីរ និងភូមិបាលចំនួន៧០នាក់ មន្ដ្រីស្មគ្រចិត្ត ចំនួន១៦៥នាក់។

ក្នុងនោះ បានប្រមូលទិន្នន័យក្បាលដី ចំនួន១,០២៨,០២៧ក្បាលដី ស្មើនឹង៩៩.៦៤% នៃផែនការ, បិទផ្សាយចប់ បានចំនួន៩៥២,២២១ក្បាលដី, ចេញបណ្ណបានចំនួន៩១១,៩៣២ក្បាលដី និងចែកបណ្ណដល់ដៃប្រជាពលរដ្ឋ បានចំនួន៨៤៨,៦២៤បណ្ណ៕