(បាត់ដំបង)៖ ក្រុមការងារអនុសាខាកាកបាទក្រហមកម្ពុជា ស្រុកសង្កែ ដឹកនាំដោយលោក នាង ចន្ទថារ៉ា អភិបាលស្រុក និងជាប្រធានគណៈកម្មាធិការអនុសាខាកាកបាទក្រហមកម្ពុជាស្រុក និងសហការី នៅព្រឹកថ្ងៃពុធ ទី២៧ ខែសីហា ឆ្នាំ២០២៥នេះ បានចុជួបសំណេះសំណាល សួរសុខទុក្ខ និងនាំយកអំណោយមនុស្សធម៌របស់សប្បុរសជនតាមរយៈអនុសាខាកាកបាទក្រហមកម្ពុជាស្រុក ផ្តល់ជូនគ្រួសារលោកស្រី រ៉េត មុំ ជាស្ត្រីមេម៉ាយ អាយុ៣៩ឆ្នាំ មានកូនក្នុងបន្ទុក ៧នាក់ មានជីវភាពក្រីក្រ និងរងគ្រោះដោយខ្យល់កន្រ្តាក់រស់នៅនៅតំបន់ពាមផ្សោត (បឹងទន្លេសាប) ភូមិបឹងទឹម ឃុំតាប៉ុន ស្រុកសង្កែ ខេត្តបាត់ដំបង ។

នាឱកាសនោះ លោក នាង ចន្ទថារ៉ា បានពាំនាំផ្ដាំផ្ញើសួរសុខទុក្ខពីសំណាក់លោក សុខ លូ ប្រធានគណៈកម្មាធិការសាខាជាពិសេសសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលសម្តេចតែងតែយកចិត្តទុកដាក់ខ្ពស់ ចំពោះសុខទុក្ខរបស់ប្រជាពលរដ្ឋរងគ្រោះ និងងាយរងគ្រោះគ្រប់រូប ដោយមិនប្រកាន់ វណ្ណៈ ពណ៌សម្បុរ ជំនឿសាសនា ឬនិន្នាការនយោបាយណាមួយឡើយ ពោលគឺទីណាមានការលំបាកទីនោះមានកាកបាទក្រហមកម្ពុជា ។

លោកប្រធានអនុសាខា សម្ដែងការសោកស្ដាយជាពន់ពេកចំពោះការខូចខាតផ្ទះសំបែង ទ្រព្យសម្បត្តិដែលនេះជាគ្រោះមហន្តរាយ ដោយធម្មជាតិ គ្មាននរណាម្នាក់ចង់ជួបប្រទះឡើយ ហើយថ្វីត្បិតតែអំណោយមនុស្សធម៌ដែលបាននាំយក មកចែកជូននាពេលនេះ មានចំនួនមិនសមល្មមនឹងការខាតបង់ តែក៏អាចជួយសម្រាលទុក្ខបាកបានមួយគ្រាផងដែរ។

លោកស្រី រ៉េត មុំ បានក្រើនរំលឹកដល់ប្រជាពលរដ្ឋទាំងអស់ត្រូវមាន ស្មារតីប្រុងប្រយ័ត្នខ្ពស់ចំ ពោះករណីគ្រោះអគ្គិភ័យ ពិសេសរដូវនេះគឺជារដូវប្រាំង ដូចនេះការប្រើប្រាស់ភ្លើងទៀន ភ្លើងធូប ក៏ដូចជាចរន្តអគ្គិសនីជាដើម ប្រសិនបើមានការធ្វេសប្រហែសតែបន្តិច វាអាចបង្កនូវគ្រោះអគ្គិភ័យផ្សេងៗ ដែលនាំឱ្យមានការឆាបឆេះខូចខាត បាត់បង់នូវទ្រព្យសម្បត្តិ ទីជម្រក និងសម្ភារដ៏មានតម្លៃ ពិសេសនោះគឺអាយុជីវិតមនុស្ស និងសត្វផងដែរ។

សូមបញ្ជាក់ថអំណោយរួមមាន៖ អង្ករ ១០០គីឡូ មី ១កេស, ទឹកត្រី ១យួរ,ទឹកស៊ីអ៉ីវ ១យួរ, ទឹកសុទ្ធ ២យួរ, សំពត់តង់១, មុង១ ភួយ១ កន្ទេស១ សារ៉ុង១ កន្សែង១ និងថវិកា២០ម៉ឺនរៀល៕