(កំពង់ឆ្នាំង)៖ លោក ស៊ុន សុវណ្ណារិទ្ធ អភិបាលខេត្តកំពង់ឆ្នាំង នៅព្រឹកថ្ងៃទី២៧ ខែសីហា ឆ្នាំ២០២៥ បានដឹកនាំក្រុមការងារជាថ្នាក់ដឹកនាំរដ្ឋបាលខេត្ត មន្ទីរពាក់ព័ន្ធក្នុងខេត្ត លោកគ្រូ-អ្នកគ្រូ ចុះពិនិត្យមណ្ឌលប្រឡង សញ្ញាបត្រមធ្យមសិក្សាទុតិយភូមិ(បាក់ឌុប) ដើម្បីត្រៀមលក្ខណៈឲ្យបានល្អមុនថ្ងៃប្រលង ដែលការងារចុះត្រួតពិនិត្យខាងលើនេះផ្ដោតទៅលើបរិវេណមណ្ឌលប្រឡង បន្ទប់ប្រឡង ឧបករណ៍បំពងសំឡេង គ្រឿងបរិក្ខារ និងការត្រៀមកន្លែងស្នាក់នៅសម្រាប់សិស្សក្រីក្រ ដើម្បីត្រួតពិនិត្យការរៀបចំការអនុវត្តតាមគោលការណ៍ច្បាប់ ធានាដំណើរការប្រឡងប្រព្រឹត្តទៅប្រកបដោយសុវត្ថិភាពតម្លាភាព និងយុត្តិធម៌ ក៏ដូចជាចូលរួមលើកទឹកចិត្តដល់សិស្សានុសិស្ស ឲ្យខិតខំប្រឡងទទួលបានលទ្ធផលល្អ។

ការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា សម្រាប់សម័យប្រឡងឆ្នាំសិក្សា ២០២៤-២០២៥ ដែលនឹងប្រព្រឹត្តទៅនៅថ្ងៃទី២៨-២៩ ខែសីហា ឆ្នាំ២០២៥ ស្អែកនេះ ក្នុងខេត្តកំពង់ឆ្នាំង មានបេក្ខជនដាក់ពាក្យប្រឡងចំនួន ៤.៨៤៣នាក់ ស្រី២.៨១៦នាក់ និងមានមណ្ឌលប្រឡងចំនួន៨មណ្ឌល ស្មើ ១៩៥បន្ទប់។

ក្នុងនោះថ្នាក់វិទ្យាសាស្រ្តសង្គមមាន៧មណ្ឌល គឺមណ្ឌលសាលាបឋមសិក្សាគំរូក្រុង, សាលាបឋមសិក្សាខ្សាម មា្សច័ន្ទលាភ, វិទ្យាល័យក្រុងកំពង់ឆ្នាំង, សាលាបឋមសិក្សាគីរីសុវណ្ណវង្ស, សាលាបឋមសិក្សា ប៊ុន រ៉ានី ហ៊ុន សែន ព្រៃខ្មែរ, វិទ្យាល័យ ប៊ុន រ៉ានី ហ៊ុន សែន រលាប្អៀរ (ខាងកើត) និងវិទ្យាល័យ ប៊ុនរ៉ានី ហ៊ុនសែន រលាប្អៀរ (ខាងលិច) មានបេក្ខជនចំនួន៣.៩០២នាក់ ស្រីចំនួន២.១៩១នាក់ និងថ្នាក់វិទ្យាសាស្ត្រមាន ១មណ្ឌល គឺមណ្ឌលវិទ្យាល័យព្រះបាទសុរាម្រឹត ក្រុងកំពង់ឆ្នាំង ដែលមានបក្ខជនចំនួ ន៩៤១នាក់ ស្រី៦២៥នាក់។ នេះបើតាមការបញ្ជាក់ពីលោក ស៉ឹម ប្រឹម ប្រធានមន្ទីរអប់រំយុវជន និងកីឡាខេត្តកំពង់ឆ្នាំង។

នៅមុនការចុះពិនិត្យនៅតាមមណ្ឌលប្រឡងទាំង៨ ក្នុងខេត្តកំពង់ឆ្នាំង ពីសំណាក់លោកអភិបាលខេត្ត នៅព្រឹកថ្ងៃទី២៧ ខែសីហា ឆ្នាំ២០២៥ នេះផងដែរ រដ្ឋបាលខេត្តកំពង់ឆ្នាំង ក៏បានចេញសេចក្តីជូនដំណឹងដល់កងកម្លាំងមានសមត្ថកិច្ចគ្រប់លំដាប់ថ្នាក់ មន្ទីរអង្គភាពពាក់ព័ន្ធជុំវិញខេត្ត ម្ចាស់សណ្ឋាគារ, ផ្ទះសំណាក់ និងម្ចាស់អាជីវកម្មថតចម្លងគ្រប់ប្រភេទ ដើម្បីចូលរួមរក្សាសណ្ដាប់ ធ្នាប់របៀបរៀបរយឲ្យបានល្អ ធានាបាននូវយុត្តិធម៌ជូនបេក្ខជន និងជួយសម្រាលបន្ទុកដល់បេក្ខជន មាតាបិតា អាណាព្យាបាល។

រដ្ឋបាលខេត្តកំពង់ឆ្នាំង សុំសំណូមពរដល់អស់លោក-លោកស្រីទាំងអស់ រួមសហការ និងចាត់វិធានការដូចខាងក្រោម៖

*១៖ កម្លាំងមានសមត្ថកិច្ចគ្រប់លំដាប់ថ្នាក់ត្រូវរក្សាឲ្យបាននូវសន្តិសុខ សុវត្ថិភាព សណ្ដាប់ធ្នាប់ របៀបរៀបរយឲ្យ បានល្អនៅតាមមណ្ឌលប្រឡងនានាទូទាំងខេត្ត។
*២៖ មន្ទីរធម្មការ និងសាសនាខេត្ត ត្រូវធ្វើការផ្សព្វផ្សាយគ្រប់វត្តអារាមក្នុងក្រុងកំពង់ឆ្នាំង និងស្រុករលាប្អៀរ ដើម្បីជួយសម្រួលដល់សិស្សនិងអាណាព្យាបាលរបស់សិស្សក្នុងការស្នាក់អាស្រ័យអំឡុងពេលប្រឡង។
*៣៖ ម្ចាស់សណ្ឋាគារ ផ្ទះសំណាក់កុំដំឡើងថ្លៃបន្ទប់ស្នាក់នៅ។
*៤៖ ម្ចាស់អាជីវកម្មថតចម្លងមិនត្រូវទទួលថតចម្លងនូវសំណៅឯកសារផ្សេងៗពាក់ព័ន្ធនឹងការប្រឡងឡើយ ចំពោះអាជីវកម្មថតចម្លងដែលមានទីតាំងនៅជិតមណ្ឌលប្រឡងសុំបិទការថតចម្លងជាបណ្ដោះអាសន្នក្នុង រយៈពេលប្រឡង៕