(ភ្នំពេញ)៖ ស្ថានទូតអង់គ្លេសប្រចាំប្រទេសកម្ពុជា នៅថ្ងៃទី២៦ ខែសីហា ឆ្នាំ២០២៥ បានរៀបចំពិធីជួបជុំមុនចេញ ដំណើរនៅនិវេសនដ្ឋានរបស់ឯកអគ្គរាជទូតអង់គ្លេស ដើម្បីផ្តល់កិត្តិយសដល់និស្សិតកម្ពុជា ចំនួន១៣នាក់ ដែលបានទទួលអាហារូបករណ៍ Chevening ដើម្បីបន្តការសិក្សា ក្រោយឧត្តមសិក្សារយៈពេលមួយឆ្នាំនៅចក្រភពអង់គ្លេស ព្រមទាំងនិស្សិតកម្ពុជាចំនួន១នាក់ ដែលទទួលបានអាហារូបករណ៍ ASEAN-UK SAGE Women in STEM ដែលនឹងរៀនថ្នាក់អនុបណ្ឌិតដែល ផ្តោតលើ STEM ក្នុងឆ្នាំសិក្សា ២០២៥/២០២៦។

ពិធីនេះមានភ្ញៀវកិត្តិយសជាង៦០នាក់ មកពីក្រសួងអប់រំកម្ពុជា អ្នកឧបត្ថម្ភ អតីតនិស្សិត Chevening និងនិស្សិតជ័យលាភី Chevening ដែលទើបទទួលបានអាហារូបករណ៍ថ្មីៗ ឪពុកម្តាយរបស់និស្សិតជ័យលាភី បានចូលរួមជាមួយស្ថានទូត ដើម្បីអបអរសាទរក្នុងឱកាសនេះ។

នៅឆ្នាំនេះនិស្សិតឆ្នើមកម្ពុជា ចំនួន១៤នាក់ នឹងត្រូវទៅបន្តការសិក្សានៅសាកលវិទ្យាល័យជាច្រើន នៅចក្រភពអង់គ្លេស ក្នុងវិស័យសិក្សាដែលទាក់ទងនឹងតម្រូវការអភិវឌ្ឍន៍កម្ពុជា។ ដូចជា បញ្ញាសិប្បនិមិត្ត (AI), ហិរញ្ញវត្ថុ, ការប្រែប្រួលអាកាសធាតុ, ការអប់រំ, ការវិភាគពាណិជ្ជកម្ម, ការអភិវឌ្ឍន៍សកលលោក, ច្បាប់ពាណិជ្ជកម្ម, ច្បាប់បច្ចេកវិទ្យា, សេដ្ឋកិច្ច, គោលនយោបាយ សាធារណៈ និងវិស្វកម្មសន្តិសុខអ៊ីនធឺណិត។

លោកស្រី Abigail Fryer អនុប្រធានបេសកកម្ម បានសម្ដែងនូវក្ដីរីករាយដែលកម្មវិធី Chevening នឹងស្វាគមន៍និស្សិតជ័យលាភីអាហារូបករណ៍ ចំនួន១៣នាក់ ដើម្បីចាប់ផ្តើមការសិក្សារបស់ពួកគេ នៅចក្រភពអង់គ្លេសសានៅខែក្រោយ។ និស្សិតកម្ពុជា នឹងស្ថិតក្នុងចំណោមនិស្សិតទាំងអស់ ដែលជាក្រុមអ្នកជំនាញវ័យក្មេងដែលកំពុងធ្វើដំណើរទៅកាន់ចក្រភពអង់គ្លេស ដើម្បីសម្រេចក្តីសុបិនរបស់ពួកគេ ដើម្បីសិក្សានៅសាកលវិទ្យាល័យលំដាប់ទីមួយ របស់ចក្រភពអង់គ្លេស និងទទួលបទពិសោធន៍ជីវិត វប្បធម៌ និងប្រទេសដ៏ស្រស់ស្អាតរបស់អង់គ្លេស។

លោកស្រីបានបន្តថា និស្សិតជ័យលាភីអាហារូបករណ៍ Chevening នឹងត្រលប់មកវិញ មិនត្រឹមតែជាមួយនឹងសញ្ញាប័ត្រអនុបណ្ឌិតប៉ុណ្ណោះទេ ប៉ុន្តែថែមទាំងជាមួយនឹងជំនាញថ្មីៗ ទំនាក់ទំនងកាន់តែរឹងមាំជាមួយចក្រភពអង់គ្លេស និងទំនុកចិត្តក្នុងការចូលរួមចំណែកក្នុងការអភិវឌ្ឍប្រទេសកម្ពុជា។

ជាមួយគ្នានេះ លោកស្រីសូមជូនពរឱ្យពួកគេទទួលបានអ្វីដែលល្អបំផុត នៅពេលពួកគេចាកចេញទៅមកបន្តការសិក្សារបស់ពួកគេ ហើយទន្ទឹងរង់ចាំស្ដាបអំពីបទពិសោធន៍ គំនិត និងមហិច្ឆតារបស់ពួកគេនៅពេលពួកគេត្រឡប់មកវិញ៕