(ភ្នំពេញ)៖ ដោយអនុវត្តតាមបទបញ្ជារបស់លោកឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ, កម្លាំងអធិការដ្ឋាននគរបាលខណ្ឌចំការមន និងការិយាល័យព្រហ្មទណ្ឌកម្រិតធ្ងន់ នៃស្នងការដ្ឋាននគរបាលរាជធានីភ្នំពេញ សហការជាមួយអធិការដ្ឋាននគរបាលក្រុងបាវិត បានស្រាវជ្រាវបង្ក្រាបករណីចាប់បង្ខាំងមនុស្សខុសច្បាប់ និងកំហែងយកលុយ១០ម៉ឺនដុល្លារ ដោយចាប់ខ្លួនបានជនសង្ស័យចំនួន៤នាក់។

របាយការណ៍របស់ស្នងការដ្ឋាននគរបាលរាជធានីភ្នំពេញ ដែលបណ្ដាញព័ត៌មាន Fresh News ទទួលបាននៅថ្ងៃទី២៧ ខែសីហា ឆ្នាំ២០២៥នេះ បានឲ្យដឹងថា ប្រតិបត្តិការបង្ក្រាបនៅថ្ងៃទី២៦ ខែសីហាម្សិលមិញ កម្លាំងជំនាញបានចាប់ខ្លួនជនសង្ស័យចំនួន៤នាក់ ក្នុងនោះជនជាតិចិន២នាក់ និងជនជាតិខ្មែរ២នាក់។

ជនសង្ស័យទាំង៤នាក់រួមមាន៖ ទី១៖ឈ្មោះ ZHU ZONG LIANG អាយុ៤១ឆ្នាំ, ទី២៖ឈ្មោះ YI MING XING អាយុ២៧ឆ្នាំ, ទី៣៖ឈ្មោះ សាន ស្រីនិ អាយុ២២ឆ្នាំ និងទី៤៖ ឈ្មោះ សួស សារ៉ាវី អាយុ២៨ឆ្នាំ។
វត្ថុតាងដកហូតបាន រួមមាន៖ អាវុធខ្លី១ដើម, ដំបងឆក់១ដើម, ខ្នោះ១គូ, រថយន្ត១គ្រឿង, ទូរស័ព្ទចំនួន៦គ្រឿង ព្រមទាំងសម្ភារមួយចំនួនទៀត។ បច្ចុប្បន្នជនសង្ស័យខាងលើ អធិការដ្ឋាននគរបាលចំការមន កំពុងកសាងសំណុំរឿងតាមនីតិវិធី៕