(បន្ទាយមានជ័យ)៖ លោកឧត្តមសេនីយ៍ទោ សែម រតនៈ អគ្គនាយករងមជ្ឈមណ្ឌលជាតិរក្សាសន្តិភាព និងនាយទាហាន នាយទាហានរង និងពលទាហាន នាយកដ្ឋានរក្សាសន្តិភាព នៅរសៀលថ្ងៃទី២៧ ខែសីហា ឆ្នាំ២០២៥ បាននាំយកអង្ករចំនួន ៥តោន និងមីជាតិចំនួន ១០០កេស ជាអំណោយដ៏ថ្លៃថ្លារបស់សម្តេច មហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនលោក កែ សួន សុភាព ជាប្រធានសហភាពសហព័ន្ធយុវជនកម្ពុជា (ស.ស.យ.ក) ខេត្តបន្ទាយមានជ័យ និងលោកស្រី ព្រហ្ម រដ្ឋា សម្រាប់ជំនួយមនុស្សធម៌ និងសង្គមក្នុងខេត្ត។

ជុំវិញការនាំអំណោយប្រគល់ជូនថ្នាក់ដឹកនាំខេត្តបន្ទាយមានជ័យនេះ លោកឧត្តមសេនីយ៍ទោ សែម រតនៈ បានលើកឡើងអំពីផលវិបាករបស់បងប្អូន ដែលបានចាកចេញពីស្រុកកំណើត ដោយសារការប៉ះទង្គិចគ្នារវាងកងទ័ពកម្ពុជា-ថៃ នៅតាមព្រំដែន និងបានសំណូមពរឱ្យពួកគាត់ដែលកំពុងស្នាក់នៅទីនោះ ថែរក្សាសុខភាពជាចម្បង ដោយរស់នៅស្អាត ហូបចុកស្អាត និងមានអនាម័យ ប្រើប្រាស់បង្គន់អនាម័យគ្រប់ពេលវេលា ជួយចូលរួមសម្អាតទាំងអស់គ្នា និងមានការប្រុងប្រយ័ត្នខ្ពស់ចំពោះកូនចៅតូចៗ ជៀសវាងគ្រោះថ្នាក់ជាយថាហេតុ និងសូមឱ្យបងប្អូនសម្រាកក្នុងមុងឱ្យបានត្រឹមត្រូវ ជៀសវាងជំងឺផ្សេងៗដូចជាគ្រុនឈាមជាដើម ខណៈរដូវវស្សាមានភ្លៀងធ្លាក់ច្រើន។

លោកឧត្តមសេនីយ៍ទោ សែម រតនៈ បានបន្ថែមថា ពាក់ព័ន្ធនឹងបញ្ហាប៉ះទង្គិចគ្នា នៅតាមព្រំដែនដែលទើបបញ្ចប់នាពេលថ្មីៗនេះឃើញថា រាជរដ្ឋាភិបាលក្រៅពីការគិតគូរ ដោះស្រាយបញ្ចប់ម្លោះនៅព្រំដែន ក្នុងនោះជាពិសេសកាកបាទក្រហមកម្ពុជា បានផ្តោតការយកចិត្តទុកដាក់យ៉ាងខ្លាំង អំពីសុខទុក្ខរបស់បងប្អូនប្រជាពលរដ្ឋ ដែលភៀសខ្លួនមករស់នៅបណ្តោះអាសន្ន តាមតំបន់សុវត្ថិភាពនានា។ ក្រៅពីនេះក៏មានកម្លាំងជាតិនិយមខ្មែរ ចេះជួយខ្មែរក្នុងគ្រាជួបការលំបាក មានសកម្មភាពកើតឡើងយ៉ាងផុលផុស ដែលប្រការទាំងនោះ បង្ហាញឃើញជាតិសាសន៍ខ្មែរតែមួយ កំលាំងតែមួយ ជួយដោះស្រាយគ្នានូវគ្រាលំបាកក្នុងសង្គម។

លោកឧត្តមសេនីយ៍ទោ សែម រតនៈ បានបញ្ជាក់ដោយសង្កត់ធ្ងន់ថា «យើងរួមគ្នាសាងអំពើល្អ! បន្តការគាំទ្រគោលនយោបានរបស់រាជរដ្ឋាភិបាល និងយុទ្ធសាស្ត្រដ៏ខ្ពង់ខ្ពស់ ច្បាស់លាស់របស់សម្តេចតេជោ ហ៊ុន សែន នៅគ្រប់ដំណាក់កាលប្រទេសជាតិជួបបញ្ហាសម្តេចតេជោ នៅរួមសុខ រួមទុក្ខ មិនទៅណាចោលប្រទេសជាតិ និងប្រជាជនជាដាច់ខាត។ យើងមានភ័ព្វសំណាងដែលមានសម្តេចតេជោ ប្រធានព្រឹទ្ធសភា និងសម្តេចបវរធិបតីជានាយករដ្ឋមន្ត្រីនៃព្រះរាជាណាចក្រកម្ពុជា តែងតែយកចិត្តទុកដាក់តម្កល់ផលប្រយោជន៍ជាតិ និងប្រជាជនជាធំ យើងខ្ញុំទាំងអស់គ្នាសូមសម្ដែងការគោរពដឹងគុណយ៉ាងជ្រាលជ្រៅបំផុត»។

សូមបញ្ជាក់ថា សកម្មភាពក្រុមការងាររបស់លោកឧត្តមសេនីយ៍ទោ សែម រតនៈ បាននិងកំពុងចូលរួមសម្រាលទុក្ខលំបាកជាមួយរាជរដ្ឋាភិបាល តាមរយៈការនាំយកអំណោយប្រគល់ជូនថ្នាក់ដឹកនាំខេត្ត និងកងទ័ពនៅសមរភូមិមុខ ដោយផ្ទាល់ផងដែរ។

ភ្ជាប់ជាមួយគ្នានេះដែរ លោកឧត្តមសេនីយ៍ទោ សែម រតនៈ ក៏បានអមដំណើរទេសរដ្ឋម ន្ត្រី លី ធុជ អនុប្រធានទី១ អាជ្ញាធរមីន ចុះចែកអំណោយដែលឧបត្ថម្ភដោយភ្នំពេញក្រោន ជូនដល់ជនភៀសសឹកនៅវត្តភ្នំថ្មកំបោ និងចុះពិនិត្យស្ថានភាពសៀមឈ្លានពានផ្លោងគ្រាប់ចូលវត្តតាមាន់សែនជ័យ ដែលបានរងការខ្ទេចខ្ទីអស់នៅក្នុងដែនបូរណភាពទឹកដីកម្ពុជា ក្នុងខេត្តឧត្តមានជ័យ៕