(កំពង់ធំ)៖ លោក ហាក់ ម៉ុងហួត អភិបាលស្រុកតាំងគោក នាល្ងាចថ្ងៃទី២៧ ខែសីហា ឆ្នាំ២០២៥នេះ បានជួបសំណេះសំណាលជាមួយសិស្សានុសិស្សក្រីក្រ និងកូនទាហ៊ាននៅសមរភូមិមុខចំនួន ២៩នាក់ មកពី ៣វិទ្យាល័យនៃស្រុកតាំងគោក ដែលនឹងត្រៀមប្រឡងសញ្ញាបត្រទុតិយភូមិ នៅថ្ងៃទី២៨-២៩ ខែសីហា ឆ្នាំ២០២៥ នៅខេត្តកំពង់ធំ ។

លោក ហាក់ ម៉ុងហួត បានផ្តាំផ្ញើសាកសួរសុខដល់ក្មួយៗ​ សិស្សានុសិស្ស ពីសំណាក់ថ្នាក់ដឹកនាំគ្រប់លំដាប់ថ្នាក់ និងតែងតែជំរុញឲ្យស្វែងយល់ពីការលំបាករបស់ក្មួយៗនៅពេលមកប្រឡង ទាំងការស្នាក់នៅ ហូបចុក និងការធ្វើដំណើរទៅមណ្ឌលប្រឡង។

លោកអភិបាលស្រុក ក៏បានបញ្ជាក់ដែរថា ជំនាន់នេះពិតជាមានសំណាងណាស់ដែលមានឱកាសអង្គុយរៀន ក្រោមម្លប់សន្តិភាព មានគ្រូបង្រៀនល្អៗ មានបន្ទប់រៀន មានសាលារៀនល្អៗ មានសៀវភៅសិក្សារៀនសូត្រសមរម្យគ្រប់គ្រាន់ មានប្រព័ន្ធអីនធឺរណែត សម្រាប់សិក្សាស្រាវជ្រាវ និងមានអ្នកជួយគាំទ្រសព្វបែបយ៉ាង ដូចនេះក្មួយៗត្រូវក្តាប់ឱកាសឱ្យជាប់ ដើម្បីប្រែក្លាយខ្លួនឯងជាមនុស្សល្អរស់នៅក្នុងសង្គមជាតិ។

លោកបានបង្ហាញការជឿជាក់ថា សិស្សានុសិស្សថ្នាក់ទី១២ ទាំងអស់ក្នុងស្រុកតាំងគោក នឹងប្រឡងបានជាប់ ទាំងអស់គ្នា ពីព្រោះមានលោកគ្រូ អ្នកគ្រូ បានខិតខំបង្ហាត់បង្ហាញសិស្សានុសិស្សនូវចំណេះដឹងទាំងអស់ ដើម្បីឱ្យក្មួយៗទទួលបានលទ្ធផលល្អ ជាកិត្តិយសរបស់ស្រុកដល់លោកគ្រូ អ្នកគ្រូ ដល់សាលារៀន និងដល់គ្រួសារ។

ដើម្បីជាការលើកទឹកចិត្តដល់ក្មួយៗទាំង២៩នាក់ លោក ហាក់ ម៉ុងហួត បាឧបត្ថម្ភថវិកាផ្ទាល់ខ្លួន ដើម្បីមានឱកាសត្រៀមប្រឡងសញ្ញាបត្រមធ្យមសិក្សាទុតិយភូមិ ដែលប្រព្រឹត្តទៅនៅថ្ងៃទី២៨-២៩ ខែសីហា ឆ្នាំ២០២៥ ស្អែកនេះផងដែរ៕