(វ៉ាស៊ីនតោន)៖ ការដំឡើងពន្ធគយ៥០ភាគរយរបស់ប្រធានាធិបតីអាមេរិក លោក ដូណាល់ ត្រាំ លើទំនិញនាំចូលពីឥណ្ឌា បានចូលជាធរមានហើយនៅថ្ងៃទី២៧ ខែសីហា ដែលនេះនឹងបង្កើនភាពតានតឹងបន្ថែម រវាងប្រទេសទាំង២។ លោក ត្រាំ បានប្រកាសយកពន្ធគយ ២៥ភាគរយបន្ថែមពីលើពន្ធគយ២៥ភាគរយដែលមានស្រាប់លើទំនិញនាំចូលពីឥណ្ឌា ដោយសារតែទីក្រុងញូវដែលីនៅតែបន្តទិញប្រេងពីរុស្ស៉ី។ ប៉ុន្តែ ក្នុងពេលដែលឥណ្ឌាជាប់ទណ្ឌកម្មពន្ធគយរបស់សហរដ្ឋអាមេរិក ចិនដែលទិញប្រេងពីរុស្ស៉ីដែរនោះបែរជារួចខ្លួនទៅវិញ។ តើហេតុអ្វីបានជាសហរដ្ឋអាមេរិកដាក់សម្ពាធលើឥណ្ឌាឱ្យបញ្ឈប់ការទិញប្រេងពីរុស្ស៉ី ខណៈបើកភ្នែកម្ខាងបិទភ្នែកម្ខាងចំពោះចិនទៅវិញ?

នៅពេលត្រូវបានសាកសួរក្នុងបទសម្ភាសន៍ជាមួយទូរទស្សន៍ Fox News កាលពីថ្ងៃទី១៥ ខែសីហាថាតើលោកកំពុងពិចារណាដាក់ទណ្ឌកម្មបន្ទាប់បន្សំលើទីក្រុងប៉េកាំងដែរឬក៏យ៉ាងណា នៅបន្ទាប់ពីរូបលោក និងលោកប្រធានាធិបតីរុស្ស៉ី វ្ល៉ាឌីមៀ ពូទីន បរាជ័យលើការឯកភាពគ្នាស្ដីពីបទឈប់បាញ់រវាងរុស្ស៉ី និងអ៊ុយក្រែននៅឯកិច្ចប្រជុំកំពូលក្នុងរដ្ឋ Alaska លោក ត្រាំ បានឆ្លើយថា «ដោយសារតែអ្វីដែលបានកើតឡើង នៅថ្ងៃនេះ ខ្ញុំគិតថាខ្ញុំមិនចាំបាច់ត្រូវគិតពីវានោះទេ»។ «បច្ចុប្បន្ន ខ្ញុំប្រហែលជាចាំចាច់ត្រូវគិតពីវា ក្នុងពេល២ ទៅ៣សប្ដាហ៍ទៀត ប៉ុន្តែយើងមិនចាំបាច់គិតពីវាទេក្នុងពេលនេះ»។ នេះជាការបន្ថែមរបស់លោក ត្រាំ។

ក្រុមអ្នកជំនាញបានសង្ស័យថាលោក ត្រាំ កំពុងកេងចំណេញពេលវេលា ដើម្បីទុកឱ្យកិច្ចចរចាលើកិច្ចព្រមព្រៀងពាណិជ្ជកម្មដ៏សំខាន់ជាមួយចិនដែលក្នុងនោះរួមមានបញ្ចូលទាំងរ៉ែកម្រប្រព្រឹត្តទៅដោយរលូន។ រ៉ែកម្រ មានសារៈសំខាន់ជាទីបំផុតសម្រាប់វិស័យឧស្សាហកម្ម ជាពិសេសបច្ចេកវិទ្យារាប់ចាប់ពីរថយន្ត រហូតដល់ថាមពលស្អាត និងបច្ចេកវិទ្យាយោធា រីឯចិនត្រូវបានគេរាយការណ៍ថាកំពុងក្ដោបក្ដាប់ការរុករក និងចម្រាញ់ រ៉ែកម្រ។ ដោយសារតែឧស្សាហកម្មអាមេរិកជាច្រើនពឹងផ្អែកយ៉ាងខ្លាំងលើរ៉ែកកម្ររបស់ចិន ម្លោះហើយរ៉ែកម្រគឺជាបញ្ហាស្នូលមួយនៅក្នុងកិច្ចចរចាពាណិជ្ជកម្មអាមេរិក-ចិន។ ក្រៅពីនេះ លោក ត្រាំ នៅមានហេតុផល ផ្សេងទៀតដែលលោកត្រូវដាក់សម្ពាធលើឥណ្ឌា ជាជាងចិន ពោលគឺលោក ត្រាំ មានបំណងបញ្ចៀសអតិផរណា ខណៈបណ្ដាក្រុមហ៊ុនលក់រាយរបស់សហរដ្ឋអាមេរិកកំពុងបង្កើនស្ដុកទំនិញនាំចូលពីចិន នៅមុន រដូវកាលបុណ្យណូអែលនាខែធ្នូខាងមុខ។ ដូច្នេះហើយទើបលោក ត្រាំ បន្ធូរបន្ថយភាពតានតឹងក្នុងសង្រ្គាមពាណិជ្ជកម្មជាមួយចិន ដោយកាលពីដើមខែសីហា សហរដ្ឋអាមេរិកបានបន្ធូរបន្ថយមួយចំនួនលើការរឹតត្បិត ការនាំចេញបន្ទះឈីប ដែលជាតម្រូវការចាំបាច់របស់ចិន។

កាលពីថ្ងៃទី១១ ខែសីហា លោក ត្រាំ បានអនុញ្ញាតឱ្យក្រុមហ៊ុនអាមេរិក Nvidia អាចលក់បន្ទះឈីបទំនើបទៅឱ្យចិន ជាមួយការតម្រូវក្រុមហ៊ុនមួយនេះត្រូវបង់ ១៥ភាគរយនៃការលក់របស់ខ្លួនក្នុងទីផ្សារចិន ទៅឱ្យរដ្ឋាភិបាលសហព័ន្ធ។ លោក ត្រាំកន្លងមកបានរារាំងខ្ទប់កិច្ចព្រមព្រៀងរបៀបនេះ។ ដោយឡែក ក្នុងបទសម្ភាសន៍ជាមួយទូរទស្សន៍ CNBC កាលពីថ្ងៃទី១៩ ខែសីហា រដ្ឋមន្ត្រីហិរញ្ញវត្ថុអាមេរិក លោក Scott Bessent បានចេញមុខការពារការសម្រេចចិត្តរបស់ទីក្រុងវ៉ាស៊ីនតោនមិនដាក់ទណ្ឌកម្មបន្ទាប់បន្សំលើចិន ដោយនិយាយថាទីក្រុងប៉េកាំងបានទិញ ១៣ភាគរយនៃប្រេងរុស្ស៉ី មុននឹងសង្រ្គាមនៅអ៊ុយក្រែនផ្ទុះឡើង ហើយបច្ចុប្បន្នការទិញប្រេងពីរុស្ស៉ីបានកើនឡើងដល់១៦ភាគរយប៉ុណ្ណោះ ដែលនេះមានន័យថាចិនបានធ្វើពិពិធកម្មប្រភពផ្គត់ផ្គង់ប្រេងរបស់ខ្លួន។ មិនតែប៉ុណ្ណោះ លោក Bessent ថែមទាំងបានអះអាងទៀតផងថាចិន មិនបានចូលរួមក្នុងសកម្មភាពកេងចំណេញដោយទិញប្រេងពីរុស្ស៉ីក្នុងតម្លៃថោក ដើម្បីលក់ចេញវិញក្នុងតម្លៃថ្លៃដូចជាឥណ្ឌានោះទេ។ តាមលោក Bessent នៅមុនសង្រ្គាមអ៊ុយក្រែនផ្ទុះឡើង ការនាំចូលប្រេងរបស់ ឥណ្ឌាពីរុស្ស៉ីមានតិចជាង ១ភាគរយ។ «ប៉ុន្តែឥលូវ ខ្ញុំជឿថាវាបានកើនឡើងដល់៤២ភាគរយ។ បានន័យថាឥណ្ឌាទិញប្រេងពីរុស្ស៉ីក្នុងតម្លៃថោក ហើយលក់ចេញទៅវិញដូចជាផលិតផលរបស់ខ្លួនឯងក្នុងតម្លៃថ្លៃ។ ពួកគេ កើបបានបា្រក់ចំណេញលើស ១៦ពាន់លានដុល្លារ ក្នុងនោះជាពិសេសគឺក្រុមគ្រួសារមហាសេដ្ឋីមួយចំនួនក្នុងប្រទេសឥណ្ឌា»។ នេះជាការគូសបញ្ជាក់បន្ថែមរបស់លោក Bessent។

ទីប្រឹក្សាពាណិជ្ជកម្មសេតវិមាន លោក Peter Navarro កាលពីថ្ងៃទី១៨​ ខែសីហា បានក្លាយជាមន្ត្រីជាន់ខ្ពស់ទី២ នៅក្នុងចំណោមក្រុមមន្ត្រីជាន់ខ្ពស់នៃរដ្ឋបាលលោក ត្រាំ ដែលបានចោទប្រកាន់ឥណ្ឌាថាកំពុងផ្ដល់ ហិរញ្ញវត្ថុឱ្យរុស្ស៉ីបន្តធ្វើសង្រ្គាមឈ្លានពានអ៊ុយក្រែន បន្ទាប់ពីនាយរងខុទ្ទការល័យសេតវិមាន លោក Stephen Miller បាននិយាយថាការបន្តទិញប្រេងពីរុស្ស៉ីរបស់ឥណ្ឌាគឺជារឿងមិនអាចទទួលយកបានឡើយ៕