(ភ្នំពេញ)៖ លោកសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល នៅរសៀលថ្ងៃទី២៧ ខែសីហា ឆ្នាំ២០២៥នេះ បានដឹកនាំប្រតិភូក្រសួងសុខាភិបាល អញ្ជើញចុះពិនិត្យការរៀបចំកន្លែងចត្តាឡីស័ក នៅអាកាសយានដ្ឋានអន្តរជាតិ តេជោ ដែលមានការអញ្ជើញចូលរួមពី ថ្នាក់ដឹកនាំក្រសួង មន្ទីរពេទ្យជាតិ និងមន្រ្តីចត្តាឡីស័ក រួមទាំងតំណាងរដ្ឋលេខាធិការដ្ឋានអាកាសចរណ៍ស៊ីវិល និងលោកឧកញ៉ានាយកក្រុមហ៊ុនវិនិយោគអាកាសយានដ្ឋានកម្ពុជាCAIC។

ក្នុងឱកាសចុះពិនិត្យនេះ លោកសាស្រ្តាចារ្យរដ្ឋមន្រ្តី បានណែនាំដល់ថ្នាក់ដឹកនាំមន្ទីរពេទ្យ ជាពិសេសមន្រ្តីចត្តាឡីស័ក ត្រូវរៀបចំលំហូនៃការងារចត្តាឡីស័កឱ្យមានប្រសិទ្ធភាពខ្ពស់ និងករណីមានការសង្ស័យសញ្ញាណាមួយ នោះក្រុមគ្រូពេទ្យប្រចាំការ ត្រូវអនុវត្តវិធានការសុខាភិបាលភ្លាមៗ និងលំហូរករណីបញ្ជូនបន្តទៅមន្ទីរពេទ្យជាតិបានទាន់ពេលវេលា។

ឯកឧត្តមសាស្រ្តាចារ្យ បានបញ្ជាក់ថា «ការងារចត្តាឡីស័កនៅអាកាសយានដ្ឋានអន្តរជាតិ គឺដើម្បីពង្រឹង និងគិតគូអំពីបញ្ហាសុខភាព និងសុវត្ថិភាព ជូនដល់បងប្អូនអ្នកធ្វើដំណើរ និងបុគ្គលិកបម្រើការងារនៅក្នុងនោះ។ លោកសាស្រ្តាចារ្យ បានសង្កេតឃើញថា នៅក្នុងអាកាសយានដ្ឋានអន្តរជាតិ តេជោ បានរៀបចំជាបានយ៉ាងល្អ និងតាមលក្ខណៈស្តង់ដាអន្តរជាតិ ដែលអាចទទួលស្វាគមន៍ភ្ញៀវជាតិ និងអន្តរជាតិ ចូលមកប្រទេសកម្ពុជា ប្រកបដោយ សុវត្ថិភាព និងផាសុខភាព។ លើសពីនេះ អាកាសយានដ្ឋានអន្ដរជាតិតេជោនេះ គឺជាខ្លោងទ្វារដ៏ធំមួយសម្រាប់ទទួលស្វាគមន៍ភ្ញៀវអន្ដរជាតិមកកម្ពុជាយើង ដើម្បីដំណើរទេសចរណ៍ក្ដី ដំណើរធុរកិច្ចក្ដី និងដំណើរផ្សេងៗក្ដី ដែលនេះមោនទភាព និងជារូបភាពនៃទំនើបកម្មដ៏ពិតប្រាកដមួយសម្រាប់កម្ពុជា»។

នៅអាកាសយន្តដ្ឋានអន្តរជាតិតេជោ ក្រសួងសុខាភិបាលបានរៀបចំ បន្ទប់ចត្តាឡីស័ក នៅក្នុងទីតាំងព្រលាន ក្នុងករណីវិភាគមានសញ្ញាសង្ស័យណាមួយ ដោយឧបករណ៍ម៉ាស៊ីនស្កេនកំដៅ។ បន្ថែមពីនេះ ក៏មានការត្រៀមនូវរថយន្តគិលានសង្រ្គោះប្រចាំការ ក្នុងករណីមានតម្រូវសុខភាពណាមួយ ដល់ភ្ញៀវទេសចរណ៍ជាតិ និងអន្តរជាតិ។

សូមជម្រាបថា អាកាសយានដ្ឋានអន្តរជាតិតេជោ តម្លៃ ១៥០០លានដុល្លារអាមេរិក ច្រកទ្វារថ្មីភ្ជាប់កម្ពុជាទៅកាន់ពិភពលោក បានកំពុងឈរបង្អូតរាងយ៉ាងស្រស់ត្រកាល ធំស្កឹមស្កៃ នៅលើលើផ្ទៃដី ២ ៦០០ហិកតា ស្ថិតនៅឃុំព្រែកស្លែង ស្រុកកណ្តាលស្ទឹង ខេត្តកណ្តាល និងមួយផ្នែកស្ថិតនៅស្រុកបាទី ខេត្តតាកែវ គ្រោងបើកឱ្យប្រតិបត្តិការ នៅថ្ងៃទី៩ ខែកញ្ញា ឆ្នាំ២០២៥ និងសម្ពោធជាផ្លូវការនៅថ្ងៃទី២០ ខែតុលា ឆ្នាំ២០២៥ ដើម្បីទទួលអ្នកដំណើរផ្លូវអាកាសចេញ-ចូលប្រទេសកម្ពុជា។

អាកាសយានដ្ឋានអន្តរជាតិតេជោ មានចម្ងាយប្រមាណ២០ គីឡូម៉ែត្រពីភាគខាងត្បូងនៃរាជធានីភ្នំពេញ អាកាសយានដ្ឋានអន្តរជាតិតេជោ វិនិយោគដោយក្រុមហ៊ុន ខេមបូឌា អ៊ែរផត អ៊ិនវេសមិន (CAIC) ដែលជាក្រុមហ៊ុនចម្រុះរដ្ឋ និងឯកជន ដែលកាន់កាប់ភាគហ៊ុនធំដោយក្រុមហ៊ុន OCIC របស់លោកអ្នកឧកញ៉ា ពង់ ឃាវសែ និងភាគហ៊ុនមួយផ្នែក ដោយរដ្ឋលេខាធិការដ្ឋានអាកាសចរស៊ីវិល៕