(កំពង់ធំ)៖ លោកស្រី ឃួន ឃុនឌី សមាជិកព្រឹទ្ធសភា និងប្រធានក្រុមការងារគណបក្សចុះមូលដ្ឋានស្រុកកំពង់ស្វាយ ថ្ងៃទី២៧ ខែសីហា ឆ្នាំ២០២៥នេះ ជួបសំណេះសំណាស ជាមួយអាណាព្យាបាល សិស្សខ្វះខាតសម្រាប់ប្រឡងសញ្ញាបត្រមធ្យមសិក្សាទុតិយភូមិឆ្នាំ២០២៥ មកពីវិទ្យាល័យក្បិល និងវិទ្យាល័យក្បែង ចំនួន៣៩នាក់ ក្នុងស្រុកកំពង់ស្វាយ ខេត្តកំពង់ធំ នៅទីស្នាក់ការគណបក្សប្រជាជន ស្រុកកំពង់ស្វាយ។

ក្នុងឱកាសនោះលោកស្រី ឃួន ឃុនឌី បានពាំនាំមកនូវការផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែន ប្រធានព្រឹទ្ធសភា ដែលលោកតែងគិតគូរពីសុខទុក្ខ និងដោះស្រាយរាល់ទុក្ខលំបាករបស់ប្រជាពលរដ្ឋ ពិសេសសម្ដេចតែងតែគិតគូ ចំពោះសិស្សានុសិស្សដែលមានជីវភាពខ្វះខាតសម្រាប់ប្រឡងសញ្ញាបត្រមធ្យមសិក្សាទុតិយ និងជូនពរឱក្មួយៗទាំងអស់ ប្រឡងជាប់សញ្ញាបត្រមធ្យមសិក្សាទុតិយ ក្នុងថ្ងៃទី២៨-២៩ ខែសីហា ឆ្នាំ២០២៥ ខាងមុខនេះ។

លោកស្រី បន្ដថា លទ្ធផលនៃការសិក្សាដែលប្អូនៗ កូនក្មួយ បានប្រឹងប្រែងរៀនសូត្រ និងការប្រឡងពេលនេះ គឺជាសក្ខីភាព និងចេញជាលទ្ធផល នៃចំណេះដឹងទូទៅដែលប្អូនៗ ក្មួយៗ សម្រេចបានបន្ទាប់ពីការលះបង់ពេលវេលា ព្យាយាមរៀនសូត្រកន្លងមក។ សូមថែរសក្សាសុខភាពឪ្យបានល្អ ជាមួយការធ្វើដំណើរទៅប្រឡងប្រកបដោយសុវត្ថិភាព និងទាន់ពេលវេលាប្រទ្បង ជាមួយភាពជឿជាក់លើសមត្ថភាពរបស់ខ្លួនឯង និងត្រូវគោរពបទប្បញ្ញត្តិនៃការប្រឡងឱ្យបានត្រឹមត្រូវ។

ការខិតខំប្រឹងប្រែងដ៏លំបាកជាច្រើនឆ្នាំកន្លងមកនេះ បានបំពាក់បំប៉នសមត្ថភាពជាកម្លាំងកាយកម្លាំងចិត្ត គំនិតប្រាជ្ញា និងជំនាញ ភាពប៉ិនប្រសប់ប្រកបដោយគំនិតឆ្នៃប្រឌិត ដែលកើតចេញពីការសិក្សា គឺជាធនធានបញ្ញាដ៏ចាំបាច់មិនអាចខ្វះបាន ដើម្បីធានានិរន្តភាពនៃការសិក្សា ព្រមទាំងចូលរួមការអភិវឌ្ឍន៍ ប្រទេសជាតិនាពេលអនាគត។

លោកស្រី ឃួន ឃុនឌី បានលើកទឹកចិត្តដល់ក្មួយៗ ឱ្យសម្លឹងមើលឱកាស ជ្រើសរើសជំនាញណាមួយដែលខ្លួនពេញចិត្តចូលរៀនថ្នាក់ឧត្តមសិក្សាឲ្យខាងតែបាន ទោះជាជួបការលំបាកយ៉ាងណា ត្រូវតែតស៊ូ ជំនះរាល់ការលំបាកព្រោះការលំបាកក្នុងការសិក្សានៅកម្រិតឧត្តមសិក្សាបន្តទៀត។ ដែលធ្វើឱ្យជីវិតយើងមានភាពងាយស្រួលល្អស្ទើរពេញមួយជីវិត និងជីវិតជៀសផុតពីការលំបាក ពីភាពក្រីក្រ ដើម្បីឈានទៅរកភាពជោគជ័យ របស់ខ្លួនឯង ដែលកើតចេញពីការសិក្សា៕