(ភ្នំពេញ)៖ ជាថ្មីម្តងទៀត ក្រសួងអប់រំ យុវជន និងកីឡា តាមរយៈបណ្តាញ Facebook ផ្លូវការរបស់ខ្លួន បានអំពាវនាវដល់បេក្ខជនដែលត្រូវប្រឡងសញ្ញាបត្រមធ្យមសិក្សាទុតិយភូមិ (បាក់ឌុប) នៅថ្ងៃទី២៨ ខែសីហា ឆ្នាំ២០២៥ស្អែកនេះ ត្រូវរំលឹកមេរៀន ទទួលទានទឹកឱ្យបានគ្រប់គ្រាន់ សម្រាកឱ្យបានគ្រប់គ្រាន់ ក្រោកពីព្រលឹម រក្សាសុវត្ថិភាពចរាចរណ៍ ទៅមណ្ឌលឱ្យបានទៀងម៉ោង ខិតខំថែរក្សាអនាម័យ និងសុខភាពឱ្យបានល្អ ជាពិសេសទទួលទានអាហារពេលព្រឹកឱ្យបានគ្រប់គ្រាន់ ត្រូវមានភាពក្លាហាន អារម្មណ៍នឹងនរ ប្រកបដោយភាពជឿជាក់ និងប្រុងប្រយ័ត្នក្នុងពេលប្រឡង។

ជាមួយគ្នានេះ ក្រសួងបានណែនាំដល់ប្អូនៗជាបេក្ខជនប្រឡង ត្រូវគោរពច្បាប់ចរាចរណ៍ និងប្រុងប្រយ័ត្នខ្ពស់ ក្នុងពេលធ្វើដំណើរទៅ និងមកមណ្ឌលប្រឡង និងសូមជូនពរប្អូនៗ ជាបេក្ខជនទាំងអស់ ទទួលបានលទ្ធផលល្អ នៅក្នុងការប្រឡងគ្រប់ៗគ្នា។

មិនខុសពីឆ្នាំរាល់ដង នៅព្រឹកថ្ងៃទី២៨ ខែសីហា ឆ្នាំ២០២៥ស្អែកនេះ ឧបនាយករដ្ឋមន្ត្រី ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា នឹងអញ្ជើញបើកប្រធានវិញ្ញាសាប្រឡងបាក់ឌុបជានិមិត្តរូប នៅមណ្ឌលវិទ្យាល័យព្រះស៊ីសុវត្ថិ ក្នុងរាជធានីភ្នំពេញ៕