(ភ្នំពេញ)៖ លោកសាស្ដ្រាចារ្យ ឈាង​ រ៉ា រដ្ឋមន្ដ្រីក្រសួងសុខាភិបាល នៅគូសបញ្ជាក់ពីហានិភ័យនៃសារធាតុអាបេស្តុស និងស៊ីលីកា ដែលអាចសម្លាប់ជីវិតមនុស្សក្នុងរយៈពេលយូរណាមួយ ហើយបានបង្ហាញយ៉ាងជាក់លាក់ថា សារធាតុនេះ នឹងបង្កឱ្យគ្រោះថ្នាក់ដល់អាយុជីវិត ហើយក៏បង្កឱ្យមានជំងឺមហារីកផងដែរ។

ការថ្លែងយ៉ាងដូច្នេះរបស់លោកសាស្ដ្រាចារ្យ ក្នុងឱកាសបានអញ្ជើញក្នុងពិធីបើកសិក្ខាសាលាបណ្តុះបណ្តាល ស្តីពីការធ្វើឱ្យប្រសើរឡើងនូវការធ្វើរោគវិនិច្ឆ័យ និងការឆ្លើយតបចំពោះជំងឺមហារីកដោយសារធាតុអាបេស្តុស និងធូលី រៀបចំនៅសណ្ឋាគារ Fairfield នៅថ្ងៃទី២៧ ខែសីហា ឆ្នាំ២០២៥។

លោកសាស្រ្តាចារ្យ បានថ្លែងបន្ដថា «សារធាតុអាបេស្តុសនឹងបណ្តាលឱ្យកើតជំងឺមហារីក មហារីកសួត និងផ្លូវដង្ហើមធ្ងន់ធ្ងរបំផុត។ ដូចនេះត្រូវចូលរួមស្វែងយល់បន្ថែមពីសារៈសំខាន់ណាក្នុងការរកវិធានការពារយ៉ាងម៉ឹងម៉ាត់បំផុត។ ទន្ទឹមនឹងនេះ ក្រសួងសុខាភិបាល បានលើកទឹកចិត្តដល់ការប្រើប្រាស់សម្ភារៈ ជំនួយឱ្យសម្ភារៈអាបេស្តុស និងស៊ីលីការនេះ ក្នុងជំហរក្រសួងដែលគិតគូរពីលើកកម្ពស់សុខុមាលភាពប្រជាជន ក្នុងការកាត់បន្ថយអត្រាព្យាបាល។ ក្រសួងសុខាភិបាល សូមអំពាវនាវឱ្យមានកិច្ចសហការ និងកិច្ចសហប្រតិបត្តិការ ជាមួយក្រសួងពាក់ព័ន្ធ ដើម្បីដាក់ឱ្យមានច្បាប់ទំលាប់ក្នុងការនាំចូល នូវផលិតផលដែលមានគ្រោះថ្នាក់នេះ»។

ឆ្លៀតក្នុងឱកាសនេះ លោកសាស្រ្តាចារ្យរដ្ឋមន្រ្តី បានផ្តល់អនុសាសន៍មួយចំនួនដល់អង្គសិក្ខាសាលា ដូចជា៖

១៖ ត្រូវបង្កើនការអនុវត្តផែនការជាតិប្រយុទ្ធនឹងជំងឺមហារីកឆ្នាំ២០២៥-២០៣០ឱ្យបានជោគជ័យ ប្រកបដោយប្រសិទ្ធភាព
២៖ អង្គភាពពាក់ព័ន្ធ ត្រូវធ្វើការផ្សព្វផ្សាយបញ្ជ្រាបចំណេះដឹងដល់ប្រជាជនពីផលប៉ះពាល់នៃសារធាតុអាសបេស្តុស ដើម្បីបង្ការ ទប់ស្កាត់ និងកាត់បន្ថយការកើតជំងឺពាក់ព័ន្ធសារធាតុអាបេស្តុសនៅកម្ពុជានាពេលអនាគត
៣៖ អ្នកជំនាញវិជ្ជាជីវៈសុខាភិបាលពាក់ព័ន្ធ ត្រូវបង្កើនចំណេះដឹង ដើម្បីធ្វើរោគវិនិច្ឆ័យបានត្រឹមត្រូវ និងផ្តល់ការព្យាបាលជំងឺពាក់ព័ន្ធសារធាតុអាសបេស្តុស។ នៅតាមមន្ទីរពេទ្យ ត្រូវជំរុញលើកទឹកចិត្តស្រង់ទិន្នន័យនឹងជំងឺមហារីក ដែលពាក់ព័ន្ធនឹងសារធាតុអាបេស្តុស
៤៖ ក្រសួង ស្ថាប័នពាក់ព័ន្ធចូលរួមសហការកាត់បន្ថយការនាំចូល និងប្រើប្រាស់សម្ភារៈដែលមានផ្ទុកសារធាតុអាបេស្តុស ជាពិសេសសម្ភារៈសំណង់ប្រើប្រាស់ប្រចាំថ្ងៃ ដែលអាចនាំឱ្យមានហានិភ័យខ្ពស់ដល់សុខភាពប្រជាជន
៥៖ អាជ្ញាធររាជធានី ខេត្ត ចូលរួមធ្វើការផ្សព្វផ្សាយដល់ប្រជាជនក្នុងសហគមន៍ ចៀសវាងធ្វើការកែច្នៃឡើងវិញនូវសម្ភារៈសំណង់ដែលអាចមានផ្ទុកសារធាតុអាសបេស្តុស។

លោកសាស្រ្តាចារ្យរដ្ឋមន្ដ្រីក៏បានសង្ឃឹមយ៉ាងមុតមាំថា សិក្ខាសាលានិងវគ្គបណ្តុះបណ្តាលជំនាញ ដែលមានការសហការរវាង ក្រសួងពាក់ព័ន្ធចំនួន១២នៅកម្ពុជា និងរដ្ឋាភិបាលអូស្ត្រាលី និងរួមគ្នាពិភាក្សា និងចូលរួមចែករំលែកនូវចំណេះដឹងបន្ថែមទៅលើឯកទេសដែលកំពុងអនុវត្តនាពេលបច្ចុប្បន្ន ហើយរៀបចំជាកម្រងព័ត៌មានជាតិអំពីសារធាតុអាបេស្តុស និងផែនការមេសុខភាពសុវត្ថិភាពការងារ ដែលមានផែនការសកម្មភាពថ្នាក់ជាតិសម្រាប់សារធាតុអាបេស្តុស (ឆ្នាំ២០២៣-២០២៧)៕