(ភ្នំពេញ)៖ លោកសាស្ដ្រាចារ្យ ឈាង រ៉ា រដ្ឋមន្ដ្រីក្រសួងសុខាភិបាល បានថ្លែងថាដោយសាររដូវធ្លាក់ភ្លៀងបានចូលមកដល់ ដូច្នេះសូមអំពាវនាវដល់ប្រជាពលរដ្ឋ សូមប្រុងប្រយ័ត្នខ្ពស់ចំពោះជំងឺគ្រុនឈាម ដោយការការពារ និងលុបបំបាត់ជម្រកមូសនៅជុំវិញបរិវេណគេហដ្ឋាន និងសហគមន៍យើង ព្រោះជំងឺមួយនេះអាចឆក់យកជីវិតយើងបានគ្រប់ពេល និងគ្រប់វ័យ ពិសេសទារក-កុមារ ស្ដ្រីមានផ្ទៃពោះ និងមនុស្សចាស់ បើយើងមានការធ្វេសប្រហែស។

ការថ្លែងយ៉ាងដូច្នេះរបស់លោកសាស្ដ្រាចារ្យ ក្នុងឱកាសដឹកនាំប្រតិភូក្រសួងសុខាភិបាល អញ្ជើញចុះពិនិត្យការរៀបចំកន្លែងចត្តាឡីស័ក នៅអាកាសយានដ្ឋានអន្តរជាតិ តេជោ ដែលមានការអញ្ជើញចូលរួមពី ថ្នាក់ដឹកនាំក្រសួង មន្ទីរពេទ្យជាតិ និងមន្រ្តីចត្តាឡីស័ក រួមទាំងតំណាងរដ្ឋលេខាធិការដ្ឋានអាកាសចរណ៍ស៊ីវិល និងលោកឧកញ៉ានាយកក្រុមហ៊ុនវិនិយោគអាកាសយានដ្ឋានកម្ពុជា CAIC នៅរសៀលថ្ងៃទី២៧ ខែសីហា ឆ្នាំ២០២៥នេះ។

លោកសាស្ដ្រាចារ្យរដ្ឋមន្ដ្រីបានថ្លែងបន្ដថា «សូមប្រជាពលរដ្ឋយើងការពារខ្លួនពីមូសខ្លា តាមរយៈសម្រាន្ដក្នុងមុងជានិច្ច កំចាត់ជម្រកមូសខ្លា ដាក់អាបែតនៅក្នុងអាងទឹក ឬពាងទឹក និងបាញ់ថ្នាំមូសជាដើម។ លោករដ្ឋមក៏ន្ដ្រីបានគូសបញ្ជាក់ថា បើមានបញ្ហាសុខភាព សង្ស័យថាមានជំងឺគ្រុនឈាម សូមប្រញាប់ទៅកាន់មន្ទីរពេទ្យបន្ទាន់»។

សូមជម្រាបថាករណីជំងឺគ្រុនឈាមនៅឆ្នាំ២០២៥នេះ មានការកើនឡើងជាងឆ្នាំ២០២៤ ប៉ុន្ដែករណីស្លាប់ដោយជំងឺនេះ បានថយចុះជាងឆ្នាំមុនុះ៕