(អូស្រ្ដាលី)៖ តបតាមការអញ្ជើញរបស់លោក Francis Wong ប្រធានរៀបចំវេទិកាធុរកិច្ចអូស្ត្រាលី-អាស៊ាន, លោកបណ្ឌិត កៅ គឹមហួន អគ្គលេខាធិការអាស៊ាន បានដឹកនាំគណៈប្រតិភូលេខាធិការដ្ឋានអាស៊ាន មកចូលរួមវេទិកាធុរកិច្ចអូស្ត្រាលី-អាស៊ានឆ្នាំ២០២៥ ដែលនឹងប្រព្រឹត្តទៅពីថ្ងៃទី ២៤ ដល់ ២៨ ខែសីហា ឆ្នាំ២០២៥ នៅទីក្រុង Adelaide ប្រទេសអូស្ត្រាលី ហើយនៅព្រឹកថ្ងៃទី២៥ ខែសីហា ឆ្នាំ២០២៥ នៅទីក្រុង Adelaide ប្រទេសអូស្ត្រាលី លោកបណ្ឌិត កៅ គឹមហួន បានធ្វើបាឋកថានៅសាកលវិទ្យាល័យ Adelaide ស្តីពី «ការពង្រឹងទំនាក់ទំនង ក្នុងនាមជាដៃគូយុទ្ធសាស្ត្រគ្រប់ជ្រុងជ្រោយ៖ អាស៊ាន និងអូស្ត្រាលី» ដោយគូសបញ្ជាក់ពីកាលានុវត្តភាព ក្នុងការពង្រឹងកិច្ចសហប្រតិបត្តិការ រវាងអាស៊ាន និងអូស្ត្រាលី។

អគ្គលេខាធិការអាស៊ាន បានចែករំលែកពីការវិវត្តន៍សំខាន់ៗ នៅក្នុងអាស៊ាន រួមទាំង ការអនុម័តឯកសារ «អាស៊ានឆ្នាំ២០៤៥៖ អនាគតរួមគ្នារបស់យើង» កាលពីខែឧសភា កន្លងទៅ។ ចំពេលមានទិដ្ឋភាពយុទ្ធសាស្ត្រស្មុគស្មាញកាន់តែខ្លាំងឡើង លោកបណ្ឌិត កៅ គឹមហួន បានសំដែងនូវសុទិដ្ឋិនិយមថា អាស៊ាន និងអូស្ត្រាលី នឹងបន្តអនុវត្តការបើកទូលាយ និងភាពធន់ ដើម្បីសម្រេចបានអនាគតរួមគ្នា ដែលជាតំបន់មួយមានសន្តិភាព ស្ថិរភាព និងមានវិបុលភាព។

នៅរសៀលថ្ងៃទី២៥ ខែសីហា ឆ្នាំ២០២៥ នៅទីក្រុង Adelaide ប្រទេសអូស្ត្រាលី លោកបណ្ឌិត កៅ គឹមហួន អគ្គលេខាធិការអាស៊ាន បានជួបពិភាក្សាការងារ ជាមួយគណៈកម្មាធិការ អាស៊ានប្រចាំទីក្រុងកង់បេរ៉ា (ACC)។ នៅក្នុងឱកាសនោះ អគ្គលេខាធិការអាស៊ាន បានថ្លែងអំណរគុណដល់គណៈកម្មាធិការ សម្រាប់ការចូលរួមចំណែក ដល់ការលើកកម្ពស់មុខ មាត់អាស៊ាន ក្នុងប្រទេសអូស្ត្រាលី និងពង្រឹងទំនាក់ទំនងអាស៊ាន-អូស្ត្រាលី ព្រមទាំងបានចែករំលែកទស្សនៈជុំវិញវិធី ដើម្បីពង្រឹងកិច្ចសហប្រតិបត្តិការអាស៊ាន-អូស្ត្រាលីបន្ថែមទៀត នៅក្រោមភាពជាដៃគូយុទ្ធសាស្ត្រគ្រប់ជ្រុងជ្រោយ។

លោកបណ្ឌិត កៅ គឹមហួន បានលើកទឹកចិត្តឱ្យគណៈកម្មាធិការនេះ បន្តដើរតួនាទីយ៉ាងសកម្ម ដល់ការពង្រឹងភាពមើលឃើញកាន់តែច្បាស់អំពីអាស៊ាន។

នៅល្ងាចថ្ងៃទី២៥ ខែសីហា ឆ្នាំ២០២៥ នៅទីក្រុង Adelaide ប្រទេសអូស្ត្រាលី លោកបណ្ឌិត កៅ គឹមហួន បានថ្លែងសន្ទរកថា ក្នុងពិធីជប់លៀងកម្រិតខ្ពស់រៀបចំដោយលោកស្រី Jane Lomax-Smith អភិបាលក្រុង Adelaide។ ពិធីជប់លៀងនេះ គឺដើម្បីស្វាគមន៍ភ្ញៀវកិត្តិយសទាំង ដែលអញ្ជើញមកចូលរួមវេទិកាធុរកិច្ចអូស្ត្រាលី-អាស៊ានឆ្នាំ២០២៥។ នៅក្នុងឱកាសនោះ លោកអគ្គលេខាធិការអាស៊ាន បានគូសបញ្ជាក់ពីភាពជាដៃគូយូរអង្វែងរវាងអាស៊ាន និងអូស្ត្រាលី ព្រមទាំង កិច្ចសហប្រតិបត្តិការដែលបានពង្រឹងក្នុងរយៈពេលជាង ៥ ទសវត្សរ៍។
លោកបានសង្កត់ធ្ងន់ពីឱកាសសេដ្ឋកិច្ចដ៏ច្រើនសន្ធឹកសន្ធាប់ នៅក្នុងអាស៊ាន សម្រាប់ធុរកិច្ចអូស្ត្រាលី និងបានលើកទឹកចិត្តឱ្យអ្នកចូលរួមទាំងអស់ រិះរកសក្តានុពលដែលមិនទាន់ បានប្រើប្រាស់ជាច្រើន ដើម្បីពង្រឹងទំនាក់ទំនងសេដ្ឋកិច្ចរវាងអាស៊ាន និងអូស្ត្រាលី។

នៅល្ងាចថ្ងៃទី ២៥ ខែសីហា ឆ្នាំ២០២៥ នៅទីក្រុង Adelaide ប្រទេសអូស្ត្រាលី លោកបណ្ឌិត កៅ គឹមហួន អគ្គលេខាធិការអាស៊ាន បានអញ្ជើញចូលរួមពិសាអាហារពេលល្ងាច រៀបចំដោយ លោក Francis Wong ប្រធានរៀបចំវេទិកាធុរកិច្ចអូស្ត្រាលី-អាស៊ាន ដែលមានការចូលរួមពីគណៈកម្មាធិការអាស៊ានប្រចាំទីក្រុងកង់បេរ៉ា អនុរដ្ឋមន្ត្រីការបរទេស ទទួលបន្ទុកកិច្ចការអាស៊ានរបស់ទីម័រខាងកើត ប្រធានក្រុមប្រឹក្សាពិគ្រោះយោបល់ធុរកិច្ចអាស៊ាន (ABAC) ព្រមទាំង តំណាងមកពីសាកលវិទ្យាល័យ Adelaide។

ពិធីជួបជុំនេះ បានផ្តល់ជាវេទិកាដើម្បីធ្វើការផ្លាស់ប្តូរទស្សនៈ ជុំវិញការពង្រឹងទំនាក់ទំនងអាស៊ាន-អូស្ត្រាលី និងជំរុញការចូលរួមឱ្យកាន់តែស៊ីជម្រៅរវាងមន្ត្រីជាន់ខ្ពស់ តំណាងរដ្ឋាភិបាល ព្រមទាំងមេដឹកនាំធុរកិច្ច។

នៅព្រឹកថ្ងៃទី២៦ ខែសីហា ឆ្នាំ២០២៥ នៅទីក្រុង Adelaide ប្រទេសអូស្ត្រាលី បណ្ឌិត កៅ គឹមហួន បានជួបសំដែងការគួរសម និងពិភាក្សាការងារជាមួយ ឯកឧត្តម Peter Malinauskas នាយករដ្ឋមន្ត្រីអូស្ត្រាលីខាងត្បូង ក្នុងឱកាសអញ្ជើញមកចូលរួមវេទិកាធុរកិច្ចអូស្ត្រាលី-អាស៊ានឆ្នាំ២០២៥។

នៅក្នុងឱកាសនោះ ភាគីទាំងពីរ បានពិភាក្សាជុំវិញវិធីដើម្បីប្រើប្រាស់កិច្ចសហប្រតិបត្តិការសេដ្ឋកិច្ច ដើម្បីពង្រឹងពាណិជ្ជកម្ម ការវិនិយោគ និងកិច្ចសហការតាមវិស័យរវាងអាស៊ាន និងអូស្ត្រាលី។

បណ្ឌិត កៅ គឹមហួន បានបន្ដថ្លែងសន្ទរកថាគន្លឹះ ក្នុងវេទិកាធុរកិច្ចអូស្ត្រាលី-អាស៊ានឆ្នាំ២០២៥ ដោយបង្ហាញពីទិសដៅ ប្រកបដោយបរិវត្តសម្រាប់អនាគតរបស់តំបន់។ អគ្គលេខាធិការអាស៊ាន បានសង្កត់ធ្ងន់ពីភាពជាដៃគូរវាងវិស័យសាធារណៈ និងឯកជន ដែលពេលនេះ សំខាន់ជាងពេលណាៗទាំងអស់ សម្រាប់ជោគជ័យរួមគ្នា។ រដ្ឋាភិបាលត្រូវតែដើរតួជាអ្នកដោះស្រាយ ដោយសម្រួលគោលនយោបាយ និងពន្លឿនការតភ្ជាប់ឌីជីថល និងរូបវន្ត ដើម្បីបង្កើតលក្ខខណ្ឌអំណោយផល សម្រាប់កំណើនប្រកប ដោយបរិយាប័្នន រីឯ ធុរកិច្ចត្រូវតែវិនិយោគប្រកបដោយទំនុកចិត្ត ប៉ុន្តែដោយភាពទទួលខុសត្រូវដើម្បីជំរុញកំណើនប្រកបដោយចីរភាព។

នៅព្រឹកថ្ងៃទី២៦ ខែសីហា ឆ្នាំ២០២៥ នៅទីក្រុង Adelaide ប្រទេសអូស្ត្រាលី លោកបណ្ឌិត កៅ គឹមហួន បានជួបពិភាក្សាការងារជាមួយលោកស្រី Wendy Black ប្រធានគោលនយោបាយ ក្រុមប្រឹក្សាធុរកិច្ចអូស្ត្រាលី។

នៅក្នុងឱកាសនោះ ភាគីទាំងពីរ បានពិភាក្សាជុំវិញការស្វែងរកវិធី ដើម្បីបង្កើនលំហូរពាណិជ្ជកម្ម និងការវិនិយោគ ពន្លឿនថាមពលបៃតង និងហិរញ្ញប្បទានបណ្តាញអគ្គិសនីអាស៊ាន ព្រមទាំងរិះរកវិស័យសហការ ដែលអាចធ្វើទៅបាន។ ជាមួយនឹងកំណើនយ៉ាងឆាប់រហ័សរបស់អាស៊ាន ព្រមទាំងជំនាញរបស់អូស្ត្រាលី ភាពជាដៃគូនេះ គឺជាកាតាលីករសម្រាប់ការអភិវឌ្ឍប្រកបដោយចីរភាព និងវិបុលភាពរួម។

បណ្ឌិត កៅ គឹមហួន បានបន្ដជួបពិភាក្សាការងារជាមួយលោក Andrew McKeller នាយកប្រតិបត្តិសភាពាណិជ្ជកម្ម និងឧស្សាហកម្មអូស្ត្រាលី (ACCI)។ នៅក្នុងឱកាសនោះ ភាគីទាំងពីរបានស្វែងរកកាលានុវត្តភាព ដើម្បីពង្រឹងការតភ្ជាប់រវាងធុរកិច្ច និងធុរកិច្ច ពង្រឹងការជំរុញពាណិជ្ជកម្ម និងប្រើប្រាស់សក្តានុពលពាណិជ្ជកម្ម និងវិនិយោគរវាងអាស៊ាន និងអូស្ត្រាលីដើម្បីបើកឱកាសថ្មីៗទៀត។

នៅរសៀលថ្ងៃទី ២៦ ខែសីហា ឆ្នាំ២០២៥ នៅទីក្រុង Adelaide ប្រទេសអូស្ត្រាលី លោកបណ្ឌិត កៅ គឹមហួន បានជួបពិភាក្សាការងារជាមួយសមាជិកក្រុមប្រឹក្សា ពិគ្រោះយោបល់នៃមជ្ឈមណ្ឌលអាស៊ាន-អូស្ត្រាលី។ នៅក្នុងឱកាសនោះ អគ្គលេខាធិការអាស៊ាន បានកោតសរសើរ ពីការងាររបស់មជ្ឈមណ្ឌលនេះ ចាប់តាំងពីបង្កើតឡើង និងដាក់ដំណើរការកាលពីឆ្នាំមុន ក្នុងការជំរុញទំនាក់ទំនងរវាងអាស៊ាន និងអូស្ត្រាលី។

លោកបណ្ឌិត កៅ គឹមហួន បានបង្ហាញក្តីសង្ឃឹមថា មជ្ឈមណ្ឌលនេះ នឹងបន្តចូលរួមចំណែក ដល់ការពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយអាស៊ាន-អូស្ត្រាលី តាមរយៈការលើកទឹកចិត្តឱ្យមានពាណិជ្ជកម្ម ការវិនិយោគ ទេសចរណ៍ និងការផ្លាស់ប្តូរវប្បធម៌ កាន់តែច្រើនរវាងអាស៊ាន និងអូស្ត្រាលី។

នៅរសៀលថ្ងៃទី២៦ ខែសីហា ឆ្នាំ២០២៥ នៅទីក្រុង Adelaide ប្រទេសអូស្ត្រាលី លោកបណ្ឌិត កៅ គឹមហួន បានចូលរួមក្នុង «កិច្ចប្រជុំតុមូលថាមពលកកើតឡើងវិញ និងសេដ្ឋកិច្ចបៃតង»។ នៅក្នុងឱកាសនោះ លោកអគ្គលេខាធិការអាស៊ាន បានជម្រាបពីយុទ្ធសាស្ត្រអាស៊ានសំខាន់ៗ ក្នុងការជំរុញការផ្លាស់ប្តូរនៅក្នុងតំបន់ ឆ្ពោះទៅរកអនាគតមួយប្រកបដោយចីរភាព រួមទាំងយុទ្ធសាស្ត្រអាស៊ានសម្រាប់អព្យាក្រឹតភាពកាបោន ក្របខណ្ឌសេដ្ឋកិច្ចចក្រា ក្របខណ្ឌសេដ្ឋកិច្ចខៀវ ជាដើម។

លោកបណ្ឌិត កៅ គឹមហួន ក៏បានស្វាគមន៍កិច្ចសហការ កាន់តែស៊ីជម្រៅរវាងអាស៊ាន និងអូស្ត្រាលី ជាពិសេស តាមរយការផ្លាស់ប្តូរចំណេះដឹង និងឧត្តមានុវត្តន៍ ក្នុងចំណោមវិស័យឯកជន ដើម្បីគាំទ្រដល់សេដ្ឋកិច្ចតំបន់មួយប្រកបដោយចីរភាព និងវិបុលភាព។

នៅព្រឹកថ្ងៃទី២៧ ខែសីហា ឆ្នាំ២០២៥ នៅទីក្រុង Adelaide ប្រទេសអូស្ត្រាលី លោកបណ្ឌិត កៅ គឹមហួន បានជួបពិភាក្សាការងារជាមួយ លោក Joe Szakacs រដ្ឋមន្ត្រីពាណិជ្ជកម្ម និងវិនិយោគអូស្ត្រាលីខាងត្បូង។

នៅក្នុងឱកាសនោះ ភាគីទាំងពីរបានសង្កត់ធ្ងន់ពីចក្ខុវិស័យរួម ដើម្បីពង្រឹងកិច្ចសហប្រតិបត្តិការសេដ្ឋកិច្ចរវាងអាស៊ាន និងអូស្ត្រាលីខាងត្បូង ព្រមទាំង បានស្វែងរកវិធី ដើម្បីប្រើប្រាស់កាលានុវត្តភាព នៅក្រោមក្របខណ្ឌកិច្ចព្រមព្រៀងតំបន់ពាណិជ្ជកម្មសេរីអាស៊ាន-អូស្ត្រាលី-នូវែលសេឡង់ (AANZFTA) និងកិច្ចព្រមព្រៀងភាពជាដៃគូ សេដ្ឋកិច្ចគ្រប់ជ្រុងជ្រោយតំបន់ (RCEP) ជាដើម។

នៅល្ងាចថ្ងៃទី២៧ ខែសីហា ឆ្នាំ២០២៥ នៅទីក្រុង Adelaide ប្រទេសអូស្ត្រាលី លោកបណ្ឌិត កៅ គឹមហួន បានអញ្ជើញថ្លែងសន្ទរកថា ក្នុងពិធីជប់លៀងអាហារពេលល្ងាចអាស៊ាន ដែលគូសបញ្ជាក់ពីការរៀបចំ ដោយជោគជ័យនៃវេទិកាធុរកិច្ចអូស្ត្រាលី-អាស៊ាន ឆ្នាំ២០២៥ និងគូសបញ្ជាក់ពីភាពជាដៃគូយូរអង្វែង និងកាលានុវត្តភាពយ៉ាងធំធេង សម្រាប់កំណើន រវាងអាស៊ាន និងអូស្ត្រាលី។

នៅក្នុងឱកាសនោះ អគ្គលេខាធិការអាស៊ាន បានប្រគល់បណ្ណថ្លែងអំណរគុណជូន លោក Francis Wong ប្រធានរៀបចំវេទិកាធុរកិច្ចអូស្ត្រាលី-អាស៊ាន សម្រាប់តួនាទីយ៉ាងសកម្ម សម្រាប់ការដឹកនាំ វេទិកាធុរកិច្ចអូស្ត្រាលី-អាស៊ាន ចាប់តាំងពីឆ្នាំ២០១៤ រហូតដល់បច្ចុប្បន្ន និងសម្រាប់ការជំរុញការចូលរួមពីវិស័យឯកជន ក្នុងចំណោមអាស៊ាន និងអូស្ត្រាលី៕