(ពោធិ៍សាត់)៖ លោក ខូយ រីដា អភិបាលនៃគណៈអភិបាលខេត្តពោធិ៍សាត់ និងលោក អ៊ឹម កុច រដ្ឋលេខាធិការ ក្រសួងអប់រំ យុវជន និងកីឡា និងជាប្រធានគណៈមេប្រយោគប្រចាំខេត្តពោធិ៍សាត់ នាព្រឹកថ្ងៃទី២៨ ខែសីហា ឆ្នាំ២០២៥នេះ បានអញ្ជើញបើកវិញ្ញាសារ ប្រឡងសញ្ញាប័ត្រមធ្យមសិក្សាទុតិយភូមិ សម្រាប់ឆ្នាំសិក្សា២០១៤-២០២៥ នៅមណ្ឌលវិទ្យាល័យពោធិ៍សាត់។

គួរជម្រាបជូនថា បេក្ខជនដែលបានចុះឈ្មោះប្រឡងមធ្យមសិក្សាទុតិយភូមិ (ប្រឡងបាក់ឌុប) សម្រាប់ឆ្នាំសិក្សា ២០២៤-២០២៥ សម័យប្រឡងថ្ងៃទី២៨-២៩ ខែសីហា ឆ្នាំ២០២៥នេះ មានចំនួន៣,៩២៥អង្គ/នាក់, ស្រី២,២៩០នាក់ ក្នុងព្រះសង្ឃចំនួន០៥អង្គ។ ដោយបែងចែកជា០៦មណ្ឌលប្រឡង សរុបចំនួន១៥៩បន្ទប់ ក្នុងនោះមានវិទ្យាល័យពោធិ៍សាត់ ចំនួន០២មណ្ឌល, អនុវិទ្យាល័យពោធិ៍សាត់ ចំនួន០២មណ្ឌល, បឋមសិក្សាពោធិ៍សាត់ ចំនួន០១មណ្ឌល និងអនុវិទ្យាល័យព្រែកស្តី ចំនួន០១មណ្ឌល។

ដោយឡែកសម្រាប់លទ្ធផល នៃការប្រឡងមធ្យមសិក្សាទុតិយភូមិ ឆ្នាំសិក្សា២០២៣-២០២៤កន្លងទៅ បេក្ខជនមកប្រឡងមានចំនួន៣,០៣១នាក់ ស្រីចំនួន១,៧៨៤នាក់ ប្រឡងជាប់២,៣៦៨នាក់ ស្រី១,៤៤៥នាក់ ស្មើនឹង៧៨.១៣%៕