សមាគមអតីតនិស្សិតអាហារូបករណ៍ហ៊្វូលប្រាយ និងអាហារូបករណ៍អាមេរិក នឹងរៀបចំកម្មវិធី «ពិព័រណ៍ជំនាញសិក្សា និងការងារឆ្នាំ២០២៥» នៅខែកញ្ញា ខាងមុខនេះ

28-08-2025 11:59

(ភ្នំពេញ)៖ សមាគមអតីតនិស្សិតអាហារូបករណ៍ហ៊្វូលប្រាយ និងអាហារូបករណ៍សហរដ្ឋអាមេរិក (FUSAAC) នឹងរៀបចំកម្មវិធី «ពិព័រណ៍ជំនាញសិក្សា និងការងារឆ្នាំ២០២៥» ដោយទទួលបានការគាំទ្រពីស្ថានទូតសហរដ្ឋអាមេរិកប្រចាំកម្ពុជា និងក្រសួងការងារ និងបណ្តុះបណ្តាលវិជ្ជាជីវៈនៃកម្ពុជា ដើម្បីជាប្រព្រឹត្តិការណ៍ប្រចាំឆ្នាំក្រោមប្រធានបទ «ដំណើរឆ្ពោះទៅឧស្សាហកម្ម ៥.០» ក្នុងគោលបំណងផ្តល់ឱកាសដល់យុវជន ជាពិសេសសិស្ស និស្សិត ក្នុងការភ្ជាប់ទំនាក់ទំនង និងដឹងយល់អំពីប្រព័ន្ធស្ថានឧត្តមសិក្សា និងស្ថាប័នអប់រំ, ឱកាសអាហារូបករណ៍ និងកម្មសិក្សា និងឱកាសការងារ។

កម្មវិធី «ពិព័រណ៍ជំនាញសិក្សា និងការងារឆ្នាំ២០២៥» នឹងធ្វើឡើងនៅថ្ងៃទី១៣ ខែកញ្ញា ឆ្នាំ២០២៥ ចាប់ពីម៉ោង ៩:០០ព្រឹក ដល់ ៦:០០ល្ងាច នៅសាលសន្និសីទវិទ្យាស្ថានបច្ចេកវិទ្យាកម្ពុជា (ITC) រាជធានីភ្នំពេញ ក្រោមអធិបតីភាពលោកជំទាវ បណ្ឌិត ពេជ ចន្ទមុន្នី ហ៊ុន ម៉ាណែត អគ្គសន្និសីទសមាគមកាយរិទ្ធិនារី និងអនុប្រធានសមាគមពេទ្យស្ម័គ្រចិត្តយុវជន, លោក ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ, លោកស្រី Bridgette Walker ភារធារីស្ថានទូតសហរដ្ឋអាមេរិកប្រចាំកម្ពុជា លោកស្រី ស៊ូ ហ្សូលីដា ប្រធានសមាគមអតីតនិស្សិតអាហារូបករណ៍ហ៊្វូលប្រាយ និងអាហារូបករណ៍សហរដ្ឋអាមេរិក រួមទាំងមានការចូលរួមពីលោក លោកស្រី ជាតំណាងក្រុមហ៊ុនដៃគូសហការឧបត្ថម្ភនានាជាច្រើនទៀត។

សមាគមអតីតនិស្សិតអាហារូបករណ៍ហ៊្វូលប្រាយ និងអាហារូបករណ៍សហរដ្ឋអាមេរិក (FUSAAC) សូមគោរពអញ្ជើញ លោក លោកស្រី អ្នកនាង កញ្ញា ចូលរួមការបើកកម្មវិធី និងយកព័ត៌មានឱ្យបានច្រើនកុះករ សម្រាប់ព័ត៌មានបន្ថែម សូមទាក់ទង លោក ឃិន ភាគ្តី តាមរយៈលេខទូរស័ព្ទ ០១៧ ៥២២ ៩២៩៕