(កំពង់ចាម)៖ ក្រុមសមាជិកព្រឹទ្ធសភាប្រចាំភូមិភាគទី២ (ខេត្តកំពង់ចាម និងខេត្តត្បូងឃ្មុំ) ដឹកនាំដោយ លោក អ៊ុច បូររិទ្ធ ប្រធានស្តីទីព្រឹទ្ធសភា និងជាប្រធានក្រុមសមាជិកព្រឹទ្ធសភាប្រចាំភូមិភាគទី២ នាថ្ងៃទី២៦ និងថ្ងៃទី២៧ ខែសីហា ឆ្នាំ២០២៥ បានអញ្ជើញជួបសំណេះសំណាលជាបន្តបន្ទាប់ជាមួយអង្គបោះឆ្នោត មន្រ្តីរាជការ ប្រជាពលរដ្ឋក្នុងស្រុកព្រៃឈរ, ស្រុកជើងព្រៃ និងស្រុកបាធាយ ខេត្តកំពង់ចាម សរុបចំនួន៩១៣នាក់។

នៅគ្រប់អង្គពិធីសំណេះសំណាល លោកប្រធានក្រុមភូមិភាគទី២ បានពាំនាំនូវប្រសាសន៍ផ្តាំផ្ញើសាកសួរសុខទុក្ខពីសំណាក់សម្តេចតេជោ ហ៊ុន សែន ប្រមុខរដ្ឋស្ដីទី និងសម្តេចកិត្តិព្រឹទ្ធបណ្ឌិត និងបានជម្រាបជូនអំពីមូលហេតុ និងស្ថានការណ៍វិវត្តន៍ថ្មីៗនៅតាមបណ្តោយព្រំប្រទល់កម្ពុជា-ថៃជាពិសេសសកម្មភាពឈ្លានពាន យ៉ាងគឃ្លើន សាហាវព្រៃផ្សៃ អមនុស្សធម៌ និងល្បិចកលមិនចេះអៀនខ្មាសរបស់កងទ័ពថៃ លើបូរណភាពដែនដីរបស់កម្ពុជា។ ជាមួយនឹងការចូលរួមមរណៈទុក្ខ និងគោរពចំពោះវិញ្ញាណក្ខន្ធរបស់វីរយុទ្ធជនដែលបានពលីនៅក្នុងសមរភូមិដើម្បីប្រទេសជាតិ លោកប្រធានក្រុមភូមិភាគទី២ បានសម្តែងនូវគារវកិច្ចដ៏ជ្រាលជ្រៅបំផុតចំពោះវីរភាពអង់អាចក្លាហានរបស់វីរយុទ្ធជន ដែលបាននិងកំពុងឈរជើងយ៉ាងរឹងមាំ តស៊ូក្រាញននៀល ការពារទឹកដីមាតុភូមិកម្ពុជា។

ទន្ទឹមនឹងនេះ លោកបានសម្តែងនូវមោទនភាពជាតិខ្ពស់ចំពោះការរួបរួមសាមគ្គីឯកភាពជាតិជាធ្លុងមួយរបស់បងប្អូនប្រជាពលរដ្ឋគ្រប់ស្រទាប់វណ្ណៈ ទាំងក្នុងនិងក្រៅប្រទេស គាំទ្រទាំងកម្លាំងកាយ ចិត្ត និងសម្ភារៈ ដល់វីរយុទ្ធជននៅសមរភូមិ និងបានអំពាវនាវដល់ថ្នាក់ដឹកនាំ និងប្រជាពលរដ្ឋក្នុងមូលដ្ឋានទាំងអស់បន្តរួបរួមសាមគ្គីគ្នាជុំវិញរាជរដ្ឋាភិបាល និងមានជំនឿជឿជាក់លើការដឹកនាំប្រកបដោយគិតិបណ្ឌិត និងវៃឆ្លាតរបស់សម្តេចតេជោ ប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីកម្ពុជា ក្នុងការចាត់វិធានការនានាដើម្បីការពារបូរណភាពដែនដី និងដោះស្រាយវិវាទព្រំប្រទល់ជាមួយប្រទេសថៃដោយសន្តិវិធី ដោយផ្អែកលើច្បាប់អន្តរជាតិ លើធម្មនុញ្ញអង្គការសហប្រជាជាតិ និងធម្មនុញ្ញអាស៊ាន សំដៅធានាបាននូវសន្តិភាពប្រកបដោយចីរភាពជូនប្រជាជនទាំងពីរគឺ កម្ពុជា និងថៃ។

លោក បានគូសបញ្ជាក់ថា «កម្ពុជាជាប្រទេសដែលស្រឡាញ់សន្តិភាព ចង់រស់នៅប្រកបដោយសន្តិសហវិជ្ជមានជាមួយបណ្តាប្រទេសទាំងអស់នៅក្នុងពិភពលោក។ ក៏ប៉ុន្តែ សូមកុំយល់ច្រឡំថា ការស្រឡាញ់សន្តិភាពរបស់កម្ពុជា មិនមានន័យថាជាការបោះបង់សិទ្ធិអធិបតេយ្យក្នុងការការពារបូរណភាពដែនដីរបស់ខ្លួននោះទេ»។

ឆ្លៀតក្នុងឱកាសនោះផងដែរ លោកប្រធានក្រុមភូមិភាគទី២ក៏បានធ្វើការឆ្លើយបំភ្លឺចំពោះការព្រួយបារម្ភមួយចំនួនដែលបានលើកឡើងនាពេលថ្មីៗនេះ ចំពោះសេចក្តីព្រាងវិសោធនកម្មច្បាប់ស្តីពីសញ្ជាតិ ដោយបានគូសបញ្ជាក់ថា៖

១៖ សេចក្តីព្រាងវិសោធនកម្មច្បាប់នេះត្រូវបានរៀបចំតាក់តែងដោយផ្អែកលើច្បាប់អន្តរជាតិ និងឯកសារគតិយុត្តអន្តរជាតិពាក់ព័ន្ធច្បាស់លាស់ និងសូមស្នើឱ្យសិក្សាឱ្យបានស៊ីជម្រៅម៉ត់ចត់ពីសេចក្តីប្រកាសជាសកលស្តីពីសិទ្ធិមនុស្ស និងអនុសញ្ញាអង្គការសហប្រជាជាតិឆ្នាំ១៩៦១។

២៖ ដោយផ្អែកលើកត្តាប្រវតិ្តសាស្ត្រ ដែលកន្លងមក ព្រះរាជាណាចក្រកម្ពុជាធ្លាប់មានច្បាប់ស្តីពីការបាត់សញ្ជាតិខ្មែរ (ក្រមរដ្ឋប្បវេណីឆ្នាំ ១៩២០ វិសោធនកម្មដោយច្បាប់ឆ្នាំ ១៩៥៩ និងច្បាប់ឆ្នាំ ១៩៦៨)

៣៖ ដោយផ្អែកលើទិដ្ឋភាពជាក់ស្តែងនៅក្នុងពិភពលោកបច្ចុប្បន្ន ដែល មានប្រមាណ១៥០ប្រទេសមានច្បាប់ដកសញ្ជាតិ ហើយនៅក្នុងចំណោមប្រទេសអាស៊ានទាំង១០ គឺ៩ប្រទេសមានច្បាប់នេះរួចទៅហើយ លើកលែងតែកម្ពុជាតែប៉ុណ្ណោះ។

៤៖ សេចក្តីព្រាងវិសោធនកម្មច្បាប់នេះដែលត្រូវអនុម័តនាពេលខាងមុខ មានទិសដៅសំខាន់ពង្រឹងនីតិរដ្ឋ អនុវត្តតែទៅលើជនណាដែលគប់គិតជាមួយបរទេសប្រព្រឹត្តិអំពើក្បត់ជាតិឯង ឬធ្វើសកម្មភាពប៉ះពាល់ធ្ងន់ធ្ងរដល់វិស័យសន្តិសុខជាតិ សេចក្តីសុខសាន្តរបស់ប្រជាជន និងឧត្តមប្រយោជន៍របស់ប្រទេសជាតិតែប៉ុណ្ណោះ ពុំមានន័យណាមួយគាបសង្កត់ ឬធ្វើឱ្យប៉ះពាល់ ដល់សេរីភាព ក្នុង ការ បញ្ចេញមតិ ដូចដែលបានលើកឡើងនោះទេ។

មុននឹងបញ្ចប់ លោកប្រធានក្រុមភូមិភាគទី២ បានផ្តាំផ្ញើដល់អាជ្ញាធរនិងបងប្អូនប្រជាពលរដ្ឋទាំងអស់នៅមូលដ្ឋានមេត្តាមានការប្រុងប្រយ័ត្នខ្ពស់ចំពោះវោហារសាសន៍អុជអាលបំបែកបំបាក់សង្គមជាតិរបស់ជនក្បត់ជាតិតជំនាន់ និងសុំឱ្យបងប្អូនវិនិច្ឆ័យចំពោះពាក្យពេចន៍របស់ជននេះដែលបានបន្តុះបង្អាប់វីរភាពអង់អាចក្លាហានរបស់វីរយុទ្ធជន នៅក្នុងកាលៈទេសៈដែលប្រទេសជាតិកំពុងប្រឈមមុខនឹងអំពើឈ្លានពានមកលើបូរណភាពដែនដីរបស់ជាតិមាតុភូមិយើង៕