(សៀមរាប)៖ ក្រសួងព័ត៌មាន នៅព្រឹកថ្ងៃទី២៨ ខែសីហា ឆ្នាំ២០២៥នេះ បានបើកសិក្ខាសាលាថ្នាក់តំបន់ស្តីពី «ការគ្រប់គ្រងសុវត្ថិភាព និងហានិភ័យក្នុងការរាយការណ៍ស្តីពីជម្លោះ» Regional Workshop On “Safety and Risk Management Conflict Reporting”។ ពិធីនេះបានធ្វើឡើងនៅលើទឹកដីខេត្តសៀមរាប។ អ្នកសារព័ត៌មានដែលបានអញ្ជើញចូលរួមក្នុងសិក្ខាសាលាថ្នាក់តំបន់ចំនួន ៣៥នាក់ មកពី ៦ប្រទេស៖ ឥណ្ឌូនេស៊ី ម៉ាឡេស៊ី វៀតណាម ចិន សិង្ហបូរី និងកម្ពុជាផងដែរ។

ពិធីបើកសិក្ខាសាលានេះប្រព្រឹត្តិធ្វើឡើងក្រោមវត្តមានលោក ហាស់ សំអាត រដ្ឋលេខាធិការ ក្រសួងព័ត៌មាន, លោក ទេព អស្នារិទ្ធ អនុរដ្ឋលេខាធិការ និងអ្នកនាំពាក្យក្រសួងព័ត៌មាន, លោក ស្លេះ អាល់ហ្វីន អនុរដ្ឋលេខាធិការ ក្រសួងព័ត៌មាន, លោក លឹម ជ័យ ទ័ត្ត ទីប្រឹក្សាក្រសួងព័ត៌មាន ព្រមទាំងថ្នាក់ដឹកនាំក្រសួងព័ត៌មានមួយចំនួនទៀត។

ការបើកសិក្ខាសាលាថ្នាក់តំបន់ ស្តីពី «ការគ្រប់គ្រងសុវត្ថិភាព និងហានិភ័យក្នុងការរាយការណ៍ស្តីពីជម្លោះ» នេះ ធ្វើឡើងដើម្បីបញ្ជាក់ពីស្ថានភាពពិតនៅកម្ពុជា ទៅដល់អ្នកសារព័ត៌មាន ជាសមាជិកអាស៊ាន បន្ទាប់ពីកម្ពុជាបានរងគ្រោះពីការវាយប្រហារ លាភពណ៌តាមរយៈការផ្សព្វផ្សាយព័ត៌មានមិនពិតចោទប្រកាន់ពីសំណាក់បណ្តាញផ្សព្វផ្សាយព័ត៌មានបរទេសមួយចំនួន នៅក្នុងដំណាក់កាលមានជម្លោះព្រំដែនជាមួយប្រទេសថៃ។

អ្នកយកព័ត៌មានអន្តរជាតិដ៏ល្បី Channel News Asia (CNA) របស់សិង្ហបុរី បានចុះថតទិដ្ឋភាពជាក់ស្តែង និងជួបសម្ភាសជាមួយបងប្អូនប្រជាពលរដ្ឋខ្មែរ នៅក្នុងភូមិជោគជ័យ និងភូមិព្រៃចាន់ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ នាថ្ងៃពុធ ទី២៧ ខែសីហា ឆ្នាំ២០២៥ ទីកន្លែងដែលទាហានថៃ ចូលមកឡោមព័ទ្ធបន្លាលួស។

អ្នកយកព័ត៌មានអន្តរជាតិដ៏ល្បី Channel Newsasia (CNA) របស់សិង្ហបុរីរូបនេះ ធ្លាប់បានចូលរួមមកយកព័ត៌មានផ្ទាល់នៅសមរភូមិព្រំដែនកម្ពុជា ដោយបង្ហាញពីការរងគ្រោះយ៉ាងធ្ងន់ធ្ងរ នៅក្នុងខេត្តឧត្តរមានជ័យ និងខេត្តព្រះវិហារ ពេលទាហានថៃបានបាញ់ផ្លោងក្នុងរយៈពេល៥ថ្ងៃមកនោះ។

គួរឱ្យដឹងថា នៅមុនពេលមានជម្លោះព្រំដែន គឺភាគីថៃ ក៏បានប្រើប្រាស់យុទ្ធសាស្ត្រផ្សព្វផ្សាយព័ត៌មានកខ្វក់ បំភាន់ការពិតគ្រប់បែបយ៉ាង ក្នុងចេតនាភូតកុហុសប្រជាពលរដ្ឋថៃខ្លួនឯង និងសាធាណមតិអន្តរជាតិ ឱ្យយល់ច្រឡំមកលើកម្ពុជាជាដើម។ បន្ទាប់ពីការភូតកុហុសកាន់តែច្រើនឡើងមានអ្នកសារព័ត៌មានខ្លះ និងប្រព័ន្ធផ្សព្វផ្សាយមួយចំនួនរងការចោទប្រកាន់ថាបានក្លាយជាអ្នកបន្ទរព័ត៌មានមិនពិត ដកស្រង់ប្រភពតែពីភាគីថៃ ជុំវិញស្ថានភាពជាក់ស្តែងនៃជម្លោះព្រំដែន ដោយពួកគេបរាជ័យក្នុងការផ្ទៀងផ្ទាត់ព័ត៌មានផ្ដល់ដោយខាងរដ្ឋាភិបាល និងកងទ័ព។ ពួកគេត្រូវបានគេមើលឃើញថាបានផ្សាយព័ត៌មានតែម្ខាង រហូតដល់ដើរតួនាទីជាអ្នកគាំទ្រសង្រ្គាមទៀតផង៕