(សៀមរាប)៖ លោក គង់ សុភី រដ្ឋលេខាធិការក្រសួងមុខងារសាធារណៈ បានលើកឡើងថា សិក្ខាសាលាស្តីពីឌីជីថលូបនីយកម្មក្នុងរដ្ឋបាលសាធារណៈ នៅខេត្តសៀមរាប សម្រេចបានសមិទ្ធផលធំៗចំនួន ៥ រួមមាន៖ ១- ការផ្លាស់ប្តូរឧត្តមានុវត្តន៍, ២- ការប្តេជ្ញាចិត្តចំពោះការកសាងសមត្ថភាព, ៣- ការធ្វើសុខដុមនីយកម្មផ្នែកទិន្នន័យ និងអភិបាលកិច្ចឌីជីថលថ្នាក់តំបន់, ៤- កិច្ចសហប្រតិបត្តិការបច្ចេកទេសរួមគ្នា និង៥- ការគូសបញ្ជាក់ឡើងវិញពីសាមគ្គីភាពរបស់អាស៊ាន។

កាលើកឡើងយ៉ាងដូច្នេះលោក គង់ សុភី នៅក្នុងពិធីបិទសិក្ខាសាលាអាស៊ានស្តីពីឌីជីថលូបនីយកម្មក្នុងរដ្ឋបាលសាធារណៈ នារសៀលថ្ងៃទី២៧ ខែសីហា ឆ្នាំ២០២៥នេះ សម្រាប់ប្រទេសសមាជិកអាស៊ាន និងប្រទេសទីម័រឡេស្តេ ព្រមទាំងក្រសួង ស្ថាប័ននៃព្រះរាជាណាចក្រកម្ពុជា និងមន្ត្រីពាក់ព័ន្ធផ្សេងទៀត ដែលបានប្រព្រឹត្តទៅនៅខេត្តសៀមរាប។

លោកបានបន្តថា ឆ្លងកាត់រយៈពេល២ថ្ងៃនេះ ការធ្វើបទបង្ហាញរបស់វាគ្មិន និងសំណួរ ចម្លើយ ក្នុងអង្គសិក្ខាសាលាអាស៊ាននេះ យើងទាំងអស់គ្នាពិតជាឃើញយ៉ាងជាក់ច្បាស់នូវការខិតខំប្រឹងប្រែង និងការប្តេជ្ញាចិត្តរបស់ប្រទេស ជាសមាជិកអាស៊ាននីមួយៗ ក្នុងការធ្វើបរិវត្តកម្មឌីជីថលក្នុងរដ្ឋបាលសាធារណៈ។

លោកបន្តថា លើសពីនេះ អ្នកជំនាញរបស់ប្រទេសអាស៊ានបូកបី និងមន្រ្តីជំនាញរបស់ប្រទេសសមាជិកអាស៊ាន បានចែករំលែកនូវមេរៀន និងបទពិសោធល្អៗ ដែលខ្លួនបានជួបប្រទះក្នុងការធ្វើបរិវត្តកម្មឌីជីថលនេះ និងការប្រើប្រាស់បច្ចេកវិទ្យាព័ត៌មានវិទ្យា (Digital Technology) ក្នុងការលើកកម្ពស់គុណភាព និងវិសាលភាពសេវាសាធារណៈ។

លោក គង់ សុភី បានវាយតម្លៃថា សិក្ខាសាលាអាស៊ានស្តីពីឌីជីថលូបនីយកម្មក្នុងរដ្ឋបាលសាធារណៈ ដែលយើងទាំងអស់គ្នា បានចូលរួមក្នុងនាពេលនេះ បានក្លាយជាវេទិកាដ៏សំខាន់ និងមិនអាចខ្វះបាន ប្រកបដោយផលិតភាពខ្ពស់ សម្រាប់ការផ្លាស់ប្តូរជាអតិបរមានូវ ចំណេះដឹង ជំនាញនិងឧត្តមានុវត្តន៍ល្អៗពីបណ្តាប្រទេសអាស៊ាន និងអាស៊ានបូកបី។

លោកក៏បានធ្វើការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែង ប្រកបដោយវិជ្ជាជីវៈក្នុងការចូលរួមពិគ្រោះយោបល់ និងផ្លាស់ប្តូរទស្សនៈយ៉ាងសកម្ម ក៏ដូចជាការចែករំលែកឧត្តមានុវត្តន៍ល្អៗ នៅក្នុងសិក្ខាសាលារបស់យើង ដែលសម្រេចបានជោគជ័យយ៉ាងពិតប្រាកដក្នុងពេលនេះ។

សូមជម្រាបថា ក្រោយបានស្តាប់បទបង្ហាញ និងបានពិភាក្សាយ៉ាងផុលផុសរយៈពេល២ថ្ងៃ​ សិក្ខាសាលាស្តីពីឌីជីថលូបនីយកម្មក្នុងរដ្ឋបាលសាធារណៈ នឹងរៀបចំកិច្ចប្រជុំបូកសរុប ដែលនឹងសម្របសម្រួលដោយលេខាធិការដ្ឋានអាស៊ាន នាថ្ងៃបន្ទាប់។ បន្ទាប់មកសិក្ខាសាលា នឹងរៀបចំដំណើរកំសាន្ត ជូនប្រតិភូទៅកាន់តំបន់រម្មណីដ្ឋានប្រាសាទនានា នៅក្នុងខេត្តសៀមរាបផងដែរ៕